HIBRIYO 5

1Hin hato, ha kawka-apo-apowan tamo ay ma--in pinilì konla para mag--in pinakamatag--ay ya parì ya anggomawà nin sirbisyo ha Diyos nin para ha tawtawo. Balang pinilì ay hiya ya mangidolog ha Diyos nin aw-ayop ya pinati nin para ha ikapatawad nin kawkasalanan boy ma--in et kanayon ya an-igwà ya para ha Diyos. 2Habaytoy tawoy pinakamatag--ay ya parì ya ampangipakisondò nin tawtawo ha Diyos ay ma--in itaman kakapeyan. Kayà tandà na no pangno na mapagpasinsyawan nin pakilamowan ya tawtawoy ampitawon ya anggomawà nin alwan mahampat. 3Banà ta ma--in yan kakapeyan, hay an-igwà na ha Diyos ya para ha ikapatawad nin kawkasalanan ay alwan bongat para ha kawkasalanan nin tawtawo, no alwan para et ha sarili nan kawkasalanan. 4Hay tawoy nag--in pinakamatag--ay ya parì ya mangipakisondò nin tawtawo ha Diyos ay ampagkama--in karangalan, piro ahè ma-arì pili--en nin tawo ya sarili na nin mag--in nin ombayro. Hiya ay ka-ilangan pili--en nin Diyos nin bilang koni Aron hin hato ya pinilì na nin mag--in ka-ona-onawan pinakamatag--ay ya parì. 5Ombayro itaman koni Pangino--on Hisokristo. Agna pinarangalan ya sarili na ya mag--in yan pinakamatag--ay ya parì ya anggomawà nin sirbisyoy mangipakisondò nin tawtawo ha Diyos, no alwan hay Diyos ya namarangal kona, ta Diyos ya nangigwà kona nin ombayroy sirbisyo ta wana kona, "Hika ya Anak ko; hapa--eg ay impatnag ko ya hiko ya Tatay mo." 6Hay kanayon et ya hinalità nin Diyos koni Apo Hisos ay ombayri: "Hika ay parì anggan makakanoman nin bilang ombayro koni Milkisidik hin hato." 7Hin anti et bayri hi Apo Hisos ha babon lotà ay nanalangin ya ha Diyos ya makapilibri kona ha kamatyan. Ha pamakirawat na ay ampantolò ya lowà na boy makhaw ya tangih na. Hay andawaten na ay nilengè nin Diyos banà ta hi Apo Hisos ay nagmaka-aypà nin hinomonol ha Diyos. 8Ha pagdanas ni Apo Hisos nin kadya-dya--an, maski Anak ya nin Diyos ay natoto yan lalò homonol ha Diyos. 9Habaytoy ginawà na ya kabo-o--an nin hiya ay ayin pagkokolang. Kayà kaganawan ampipanhomonol kona ay ma-ilibri na ha kasalanan, boy biyan na hilan biyay ya ayin anggawan. 10Diyos ya ginomawà emen hi Apo Hisos ay mag--in pinakamatag--ay ya parì ya mangipakisondò nin tawtawo ha Diyos bilang ombayro hin hato koni Milkisidik. 11Malakè ya labay nawen halita--en ya tongkol ha pagkaparì ni Milkisidik boy pagkaparì ni Apo Hisos, piro ma-irap nawen ipalinaw komoyo ta makapey ya pangingintindi moyo. 12Hikawo ay naboyot anan antompel ha Pangino--on; kayà dapat dayi ay ampanorò kawoyna ha kanayon. Piro angga hapa--eg ay ka-ilangan itorò komoyon oman baytoy Halità nin Diyos, hatoy maparan intindiyen ya intorò komoyo hin primiro. No ha pamamangan ay bagay ana dayi komoyo ya mangatyà ya pamamangan, piro angga hapa--eg ay gatas et ya ka-ilangan moyo ta bilang kawo et kolaw. 13Banà ta emen kawo et kolaw ya ayin kanayon ya angkabiyayen no alwan gatas ay agmoyo et kayan intindiyen ya tongkol ha kahampatan, ta hikawo ay emen babayo tinompel. 14Piro hay mangato-ayna ay mangatyà ana ya pamamangan la. Ombayro itaman ya tawtawoy ma--in anan matibay ya pantotompel. Nasanay hilaynan gomawà nin kahampatan ta tandà layna no anyay kala-etan.

will be added

X\