HIBRIYO 10

1Hay kawkapanogo--an ya an-ipahonol hin hato nin Diyos ay alimbawà bongat nin mangahampat ya bawbagay ya ampalatngen. Kayà hatoy ta-onta--on la nin anggaw--en ya ampangidolog ha Diyos nin pinati ya aw-ayop ay talagan ahè maka-alih nin kasalanan nin tawtawoy ampakaranin homamba ha Diyos boy hila ay ahè mag--in nin ayin kakolangan. 2No maka-alih nin kasalanan la baytoy anggaw--en lay ampangidolog hila ha Diyos nin pinati ya aw-ayop ay antà agla integen bayto? No maka-alih nin kasalanan la baytoy ombayroy anggaw--en la ay ayin hilayna dayin ihipen ya kasalanan, boy aglayna dayi pi-oman-oman gaw--en baytoy ampangidolog hila nin pinati ya aw-ayop nin banà ha kasalanan la. 3Piro ha ombayroy anggaw--en la ay ahè maka-alih nin kasalanan la, ta hay pangidolog la nin pinati ya aw-ayop ta-onta--on para ikapatawad kasalanan la ay lalò bongat ampakapipa-ihip konla nin kawkasalanan la. 4Hay an-idolog ha Diyos ya dayà nin bawbakà boy kawkanding ay talagan ahè maka-alih nin kasalanan. 5Kayà hin makoyna bayri hi Apo Hisos ha babon lotà ta magkama--in ya nin nawini nin emen ha tawtawo ay ombayri ya hinalità na ha Diyos: "Hika ay ahè ampangonsowilo ha pambi komon tawtawo nin pinati ya aw-ayop o maski anyay bagay ya idolog komo. Kayà hay nawini ko ay ginawà mo emen mati ta habaytoy idolog ko komo. 6Habaytoy aw-ayop ya ipo--ol nin idolog komo boy kanayon et ya bawbagay ya an-igwà komo nin banà ha kasalanan ay ahè ampakapakonsowilo komo. 7Kayà hinalità ko komo, 'Anti ko bayri; O Diyos; gaw--en ko ya kalabayan mo.' Habayti ya hinalità ko komo ay kompormi ha nakaholat ya tongkol kongko, hatoy nakaholat ha libroy pinangiholatan nin kawkapanogo--an." 8Habaytoy onan hinalità ni Pangino--on Hisos ay matanda--an bayro ya hay pambi ha Diyos nin aw-ayop ya pinati boy pambi et nin kanayon ya bawbagay nin banà ha kawkasalanan ay ahè labay boy ahè ampangonsowilowan nin Diyos. Maski ombayroy an-ipagawà boy habayto ay kompormi ha kawkapanogo--an ay hinalità ni Pangino--on Hisokristo ya habayto ay ahè makapakonsowilo ha Diyos. 9Hay hinalità et ni Pangino--on Hisokristo ay ombayri: "Anti ko bayrin gomawà nin kalabayan mo." Kayà hatoy pinati ya aw-ayop ya an-idolog ha Diyos hin kawkapanogo--an et ya an-ipahonol ay pinahiliyan nin Diyos. Hay kapahiliyan ay mismon hi Pangino--on Hisokristo ya nangigwà nin sarili na nin mati. 10Banà ha panhohomonol ni Pangino--on Hisokristo ha kalabayan nin Diyos, hitamo ay nilominis ha kawkasalanan ha pangigwà nan sarili na nin mati. Habaytoy minghan nan pangigwà nin sarili na nin mati ay alwaynan ka-ilangan pi-oman-oman. 11Balang pari̇̀ nin Aw-israylita ay allo-allon ampireng nin gomawà nin sirbisyo lay para ha Diyos. Piro maski allo-allo lan anggaw--en baytoy pambi ha Diyos nin aw-ayop ya pinati ay talagan ahè maka-alih nin kawkasalanan nin tawtawo. 12Piro kahalako koni Pangino--on Hisokristo ta minghan nan bongat inggawà ya sarili na nin mati para ha kawkasalanan nin tawtawo. Hin nayari̇̀ na bayto ay nako yaynan niknò ha bandan wanan nin Diyos. 13Bayro na an-anti--en ya pana--on nin hay kawka-away na ay talowen nin Diyos boy igwà hila nin Diyos ha hilong nin kapangyariyan ni Pangino--on Hisokristo. 14Hay minghan bongat pangigwà ni Pangino--on Hisokristo nin biyay na ay ginawà na nin ayin pagkokolang anggan makakanoman baytoy tawtawoy anlinisan na. 15Habayti ya hinalità ko komoyo ay talagan peteg ta hay tongkol bayri ay pinaptegan et nin Ispirito nin Diyos ta ombayri ya hinalità na: 16"Habayti ya kasondo--an ko konla ha lomateng ya allo, wana nin Diyos: hay kawkapanogo--an ko ay ipapanemteman ko konla boy itanem ko ha nakem la emen la matanda--an no anyay labay ko nin gaw--en la." 17Ombayri et ya hinalità nin Ispirito nin Diyos, "Hay kasalanan la boy kaganawan gawà la ya mangala--et ay liwawan koyna." 18Hapa--eg ha pinatawad ana ya kawkasalanan tamo ay alwaynan ka-ilangan gaw--en baytoy mambi ha Diyos nin pinati ya aw-ayop o maski anyaman ya bagay ya an-igwà nin banà ha kasalanan. 19Pawpatel ko, hapa--eg ay ma--in tamoynan karapatan pakarani nin homamba ha Diyos. Ha ombayro ay kowinta ampakalo--ob tamoyna ha Pinakamasagradoy Kowarto nin Diyos. Makapaki-ilgo tamoyna kona banà ha pantolò dayà ni Pangino--on Hisos hin nati ya. 20Hay makodpaw ya doloy pinagkortina ya ampakaharang hin hato nin lomo--ob ha Pinakamasagradoy Kowarto nin Diyos ay napigitnà nin nawakwak hin hay nawini ni Pangino--on Hisos ay nangahohogatan hin impakò ya ha koroh. Habayto ya pangyayari ay bayoy paraan emen tamo magkama--in biyay ya ayin anggawan, ta hi Pangino--on Hisokristo ay angkabiyay hapa--eg do ha katatag-ayan. 21Hi Pangino--on Hisos ya pinakamatag--ay ya pari̇̀ ya anggomawà nin sirbisyoy mangipakisondò kontamo ha Diyos. Hiya ya ampama-alà ha kaganawan tawo nin Diyos. 22Kayà agtamo mag-alangan nin pakarani ha Diyos, no alwan hay nakem tamo ay pakatibolosen tamo boy magkama--in tamon pamahimalà boy pantotompel nin pakarani kona. Pakarani tamo kona nin hay nakem tamo ay nalinisan ana ha kala-etan, boy hay nawini tamo ay kowinta nalinisan nin pagkalilinaw lanom. Ha ombayro ay mapaptegan ya na-alih ana ya kasalanan tamo. 23Pakapapangoligtanan tamo ya an-asawan tamo, ta hay Diyos ay tapat ya nagpangakò kontamo. 24Sikapen tamon mangapilalabi boy sikapen tamo et manggawà nin kahampatan. 25Hatoy pamititipon ya naka-ogali--an tamon ampipantompel ha Pangino--on ay agtamo itegen gaw--en emen agtamo matowad do ha kanayon ya integen laynay pamakitipon kontamo. Ka-ilangan pakhawen tamoy pantotompel nin miha ta miha, lalò ana hapa--eg ha angkakit tamoynay marani anay panlomateng ni Pangino--on Hisos. 26Hi Apo Hisos ay nati emen ma-alih ya kasalanan tamo. No natanda--an tamoyna boy natanggap baytoy kaptegan biha somigi tamon magkasalanan ay ayin kanayon ya paraan ya ikapatawad kasalanan. 27No ma--in tawoy ombayro ay ayin anan kanayon ya para kona, no alwan hatoy lomateng ya kapapalimoy panonosga nin Diyos boy manliyobliyob ya apoy ya pangigwa--an nin kawka-away nin Diyos. 28Hin an-ipahonol et ya kawkapanogo--an ya inggawà ni Moysis, hinoman ya nilomabag ha kawkapanogo--an ta hay panlomabag na ay pinaptegan nin lowa o tatlo katawo ay ayin ingangalon patyen baytoy tawoy nilomabag. 29Hapa--eg, no ombayroy nangyari ha tawoy nilomabag ha kawkapanogo--an ay igit et bayroy kaparosawan ya tanggapen nin tawoy ahè nangipagpatoloy nin pantotompel na ha Anak nin Diyos. Habaytoy agna pagpatoloy nin pantotompel na ay emen nan niyabok hi Pangino--on Hisos, boy agna ampa-alaga--an ya nanlinis kona ha kasalanan ya dayà ni Pangino--on Hisos ya kaptegan nin sondo--an. Ha ombayroy ginawà nin habaytoy tawo ay ininsolto na ya Ispirito nin Diyos ya ampangingangalon mambin kahampatan. 30Tandà tamo ya Pangino--on ya naghalità nin ombayri: "Hiko ya gomanti nin mamarosa ha nipanggawà kala-etan." Tandà tamo simpri no hinoy naghalità nin ombayri: "Pangino--on ya manosga nin tawtawo na." 31Kapapalimo ya ihosga nin makapangyariyan ya Diyos ya angkabiyay. 32Hapa--eg ay ihipen moyo hin babayo kawo tinompel koni Apo Hisos ta nahawangan kawo nin kaptegan. Maski nagdanas kawo nin kawkadya-dya--an ay napagte-ehan moyo. 33Paminghanminghan, hikawo ay an-ipareng--ey nin tawtawoy ahè ampipantompel koni Pangino--on Hisos boy ampakakhitan la kawo ha arapan nin kalak--an tawo. Ha kanayon ya oras ta anggaw--en baytoy ombayro ha kawkalamowan moyo ay andamayan moyo hila. 34An-ingalowan moyon damayan baytoy nikapiriso ya kawkapariho moyo nin katetpel; boy maliga kawo maski kinamkam ya kamama--in moyo, ta tandà moyo ya do ha katatag-ayan ha kama-inan nin Diyos ay ma--in an-i-anti̇̀ komoyo ya kayamanan ya ampanatili anggan makakanoman. 35Kayà agmoyo alihen ya pamahimalà moyo ha Diyos ta ha ombayro, hikawo ay magkama--in nin malhay ya primyo. 36Ka-ilangan magpasinsya kawon magte--eh emen moyo magawà ya kalabayan nin Diyos, boy emen moyo matanggap ya impangakò na; 37ta ma--in ombayri ya nakaholat ha Halità nin Diyos: "Agana maboyot, hatoy mako bayri ya an-anti--en ay lomateng ana. Hiya ay agana mi-antalà. 38Hay tawoy nag--in mahampat nin banà ha pantotompel na ha Diyos ay ma--in anan biyay ya ayin anggawan. Piro no halibokotan nay Diyos, hay Diyos ay ahè matowà kona." 39Hitamo ay alwan kabilang ha tawtawoy anhomalibokot ha Diyos, hatoy mipalako ha kaparosawan ya ayin angga, no alwan hitamo ay kabilang ha mangama--in katetpel, hatoy ma--in anan kalibriyan boy biyay ya ayin anggawan.

will be added

X\