GALASYA 6

1Pawpatel ko, no ma--in komoyo nin makapagkasalanan ya agna an-asawan, hay mangitoto kona ha kahampatan ay hikawoy ampomayag nin hay Ispirito nin Diyos ay mamo--on komoyo. Dapat moyon gaw--en ha mapanawa ya pamamaraan boy mag-atap kawo ta maka hikawo itaman ya matoksò. 2Pitatambayan moyon gitan ya pawproblima, ta ha ombayro ay mahonol moyoy panogò ni Pangino--on Hisokristo ya milalabi kawo. 3No ma--in ampangihip nin ampaka-igit ya ha kanayon nin ahè magkasalanan ay anlokowen nay sarili na. Ha kaptegan ay ayin yan silbi. 4Sori--en nin balang miha ya sarili nan gawà. No mahampat ay mag--in yan kontinto ha ginawà na boy agna ipakipariho ha ginawà nin kanayon. 5Dapat balang miha ay matoton mantan nin sarili nan kakapeyan. 6Hay ampangitorò nin Halità nin Diyos ay dapat tambayan nin biyan mangahampat ya bawbagay nin hatoy antoro--an na. 7Agmoyo lokowen ya sarili moyo. Hay Diyos ay ahè maloko nin maski hino. No anyay intanem nin tawo ay habaytoy alawahanen na. 8Hay tawoy anggomawà nin kalabayan nawini na ay mananggap nin kaparosawan ya ayin anggawan. Piro hay tawoy anggomawà nin kalabayan nin Ispirito nin Diyos ay mananggap nin biyay ya ayin anggawan ya an-igwà nin Ispirito nin Diyos. 9Kayà agtamo homawà nin manggawà kahampatan, ta ha lomateng ya pana--on ya intaning nin Diyos ay ma--in tamon tanggapen no agtamo homawà. 10Peleg tamon angkabiyay ay manggawà tamo nin kahampatan ha kaganawan tawo, lalo-lalò ana ha pawpatel ya kapariho tamon katetpel. 11Hapa--eg, habayti ya angkakit moyo ya mangalhay ya lawlitra ay mismon hiko hi Pablo ya nanolat. 12Hay ampamilit komoyo nin patoli̇̀ ay hila baytoy labaylabay nin mamakonsowilo ha tawtawo. Ombayroy anggaw--en la emen aghila padya-dya--an, ta no i-aral la ya hay makapilibri nin tawtawo ha kaparosawan ay pantotompel koni Pangino--on Hisokristo ya impakò ha koroh ay padya-dya--an hila. 13Maski toli̇̀ hilayna baytoy ampamilit komoyo ay aghila anhomonol ha kawkapanogo--an ya inggawà ni Moysis. Hay labay lan bongat ay homonol kawo konla emen la ma-ipagmalhay ha kapara lan Hodiyo ya hikawo ay napahonol lan patoli̇̀. 14Para kongko, hay ipagmalhay ko ay pagkamati ni Pangino--on Hisokristo hin impakò ya ha koroh, ta habaytoy nakapilibri kongko ha kasalanan. Banà et ha pagkamati na, hay bawbagay ya ampakapangyayari kongko ay na-alih ana, kateng kalabayan kon gomawà nin habaytoy ombayroy bawbagay. 15Hapa--eg ay alwaynan ma-alagà ha Diyos no hay tawo ay toli̇̀ o alwa. Hay ma-alagà ha Diyos ay hay pagbayo nin tawo. 16Kaganawan antompel ha Diyos boy anhomonol ha tawtorò ya habayti, Hodiyo o alwan Hodiyo, hay Diyos ay mambi dayi konla nin katinekan boy ingangalo. 17Kayà pa-ibat hapa--eg ay an-ipaki-ilgo ko ya maski hino ay ahè ana dayi mambi nin ikagolo ko. Sapat ana bayti ya hiko ay nagkama--in pawpiyat ha nawini. Habayti ya nangyari kongko ay kaptegan nin hiko ay talagan magsisirbi ni Pangino--on Hisokristo. 18Pawpatel ko, hi Pangino--on tamon Hisokristo ay mangingangalo dayi nin mambin kahampatan komoyo. Amin.

will be added

X\