GALASYA 1

1Hay ampanolat nin habayti ay hiko hi Pablo ya hogò nin Diyos. Alwan tawo ya namili̇̀ boy nangihogò kongko, no alwan hi Pangino--on Hisokristo boy Tatay ya Diyos ya namiyay oman koni Pangino--on Hisos. 2Kaganawan kalamo ko bayri ya pawpatel ha Pangino--on ay ampangomosta komoyon gawgropon mangama--in katetpel ha Diyos bahen ha probinsyan Galasya. 3Hay Tatay tamoy Diyos boy hi Pangino--on Hisokristo ay mangingangalo dayi komoyo nin mambin kahampatan boy katinekan. 4Ha kalabayan nin Tatay tamoy Diyos ay inggawà ni Pangino--on Hisokristo ya sarili na nin mati nin banà ha kawkasalanan tamo emen hitamo ay ma-ilibri ha kawkala-etan ya makapangyayari hapa--eg bayri ha babon lotà. 5Hay Diyos ay poriyen nin ayin angga. Amin. 6Ampag-ispanta ko komoyo ta hay Diyos ya nangingat komoyo nin banà ha kahampatan pangingangalo ni Pangino--on Hisokristo ay hay parah moyon binokotan, ta nagkambya kawo ha kahalakoy aral ya kanwari̇̀ ay mahampat ya balità. 7Ha kaptegan ay ayin kanayon ya mahampat ya balità, no alwan hatoy imbalità nawen ana komoyo. Kayà bongat, ma--in ampanggolo nin nakem moyo, ta ampagsikapan lan itikò ya Mahampat ya Balità ya tongkol koni Pangino--on Hisokristo. 8Piro maski hikayi o maski mihay anghil ya mangibat ha katatag-ayan ha kama-inan nin Diyos ay ahè makalibri ha iparosa nin Diyos no hay i-aral nawen komoyo ay alwan ombayro ha Mahampat ya Balità ya in-aral nawen ana komoyo. 9Omanen kon halita--en komoyo bayti ya hinalità koyna komoyo hin hato et: no ma--in mangaral komoyo ta hay an-i-aral na ay alwan ombayro ha Mahampat ya Balità ya tinanggap moyo ay agya makalibri ha iparosa nin Diyos. 10An-ihipen moyo nayi̇̀ nin anhangaren koy poriyen ako nin tawtawo? Agko anhangaren ya poriyen akon tawtawo. Hay anhangaren ko ay poriyen ako nin Diyos. Wari̇̀ tawtawo ya ampagsikapan kon pakonsowilowen? No anhangaren ko et bayto ay agko nag--in magsisirbi ni Pangino--on Hisokristo. 11Pawpatel ko, labay kon matanda--an moyo ya hay Mahampat ya Balità ya in-aral ko ay alwan gawà nin tawo. 12Habayti ay tinanggap ko nin ahè na-ibat ha tawo boy ahè intorò kongko nin tawo, no alwan mismon hi Pangino--on Hisokristo ya nangipatnag kongko. 13Nabalita--an moyo no pangno ya biyay ko hin hato ha panhohomonol ko ha rilihyon nawen nin Hawhodiyo. Hay kaganawan gropon mangama--in katetpel ha Diyos ay ayin ingangalo ya pamadya--dyà ko konla boy sinikap ko hilan hira--en. 14Ha kalak--an katatawo ko ha kapara kon Hodiyo ay ayin maka-igit kongko ha panhohomonol ha rilihyon nawen nin Hawhodiyo, boy nagmalasakit akon hinomonol ha kawka-ogali--an nin kawka-apo-apowan nawen. 15Piro banà ha kahampatan pangingangalo nin Diyos, pa-ibat hin nilomwah ako nin nangibat ha tiyan nin nanay ko ay pinili̇̀ na koyna ta gaw--en na kon magsisirbi na. 16Hapa--eg, ha kalabayan na ay impatnag na kongko ya hi Pangino--on Hisokristo ay Anak na. Ombayri ya ginawà na emen hay Mahampat ya Balità ya tongkol koni Pangino--on Hisokristo ay ma-i-aral ko ha alwan Hawhodiyo. Habayti ay agko impakipapano ha maski hino, 17boy agko nako ha siyodad nin Hirosalim nin makibalay ha nika-ona kongko nin nag--in hogò nin Diyos, no alwan nako ko ha dogal nin Arabya biha ko nagbira ha siyodad nin Damasko. 18Nalabah ya tatloy ta--on ay nako ko ha Hirosalim nin nakibalay koni Pidro. Nanatili ko bayro kona nin labinlimay allo. 19Hin habayto ay ayin akoynan nakit bayro ya kanayon ya hogò nin Diyos no alwan hi Santiyagon bongat ya patel ni Pangino--on Hisos. 20Kaganawan nin habayti ya an-iholat ko ay peteg. Tandà nin Diyos ya agko ampagbongkok. 21Hapa--eg, nako ko ha dawdogal ya angkasakopan nin probinsyan Sirya boy probinsyan Silisya. 22Hay gawgropon mangama--in katetpel koni Pangino--on Hisokristo do ha probinsyan Hodiya ay ahè et nakakit kongko nin pirsonal. 23Nabalita--an lan bongat ha ampipag-ilgo nin ombayri: "Hay ampamadya--dyà pon kontamo ay ampangi-aral ana hapa--eg nin tongkol ha pantotompel koni Pangino--on Hisokristo ya hin hato ay ampagsikapan nan hira--en." 24Kayà hay Diyos ay pinori la nin banà ha nangyari kongko ya nagkama--in akon katetpel nin bilang konla.

will be added

X\