IPISO 5

1Hapa--eg banà ta hitamo ay aw-anak nin Diyos ya ampanlabi kontamo ay dapat tamon manowad kona. 2Dapat tamo et manlabi nin bilang ha panlalabi kontamo ni Pangino--on Hisokristo. Intarmoli nan inggawà ya sarili na nin mati nin para kontamo. Hay pagkamati na ay bilang bangoh ya nakapakonsowilo ha Diyos. 3Hitamo ay nag--in tawtawo nin Diyos; kayà agtamo manggawà ni mamanggit nin anyaman ya kala-etan boy karemekan gawgawà ya tongkol ha pamilabayan nin babayi boy lalaki, boy agtamo pakasakim ta alwan tamà kontamo nin manggawà ombayro. 4Dapat tamon mag-atap ha an-ilgowen tamo, ta alwan nararapat kontamo ya maghalità nin katowà. Agtamo magkowinto nin kala-etan ya tongkol ha pamilabayan nin babayi boy lalaki. Agtamo simpri mag-ilgo nin hawhalità ya ayin kawkakokowinta boy hawhalità ya kapapareng--ey, no alwan dapat tamo nin magpasalamat ha Diyos. 5Masigoro moyo ya hay tawoy ampamabayi o ampakilalaki, ampanggawà nin manga-alay ya gawgawà, o makamkam ta labay nan pag-ikon ya kaganawan bagay ya andiyosen na ay ahè makapagmana ha ka-ari--an ni Pangino--on Hisokristo ya ka-ari--an et nin Diyos. 6Agkawo paloko ha tawoy ampaghalità nin ayin kabalikahan ta habaytoy ombayro ay kasalanan. Hay ampipanggomawà nin ombayroy kasalanan ay ampahangan nin Diyos ta ampipanhomombalang hila kona; banà bayro ay parosawan na hila. 7Kayà agkawo maki-emen ha ombayroy tawtawo. 8Hikawo hin hato ay anti pon ha kowinta karegleman ta agmoyo et tandà ya Diyos. Piro hapa--eg ay anti kawoyna ha kowinta kahawangan ta antompel kawoyna koni Pangino--on Hisokristo. Kayà hay biyay moyo ay mag--in nararapat ha tawtawoy anti ha kahawangan ni Pangino--on Hisokristo. 9No ombayro tamo, hay makit kontamo ya bonga nin kahawangan ay panay kahampatan, katoynongan, boy kaptegan. 10Pag-aralan moyo no anyay makapakonsowilo ha Pangino--on. 11- 12Agkawo maki-emen manggawà nin bawbagay ya ayin kowinta ya anggaw--en nin tawtawoy anti et ha kowinta karegleman. Para kontamon ampipantompel ha Diyos, hatoy bawbagay ya anggaw--en lan patagò ay kapapareng--ey banggiten. Ipakit moyo konla ya kahampatan ha biyay moyo ta maka habaytoy makapatgen konla nin gomawà kala-etan. 13Hay kahampatan ha biyay tamo ay kowinta hawang ya no homawang konla ay matanda--an lay mala--et ya anggaw--en la. Ha ombayro ay itegen lay panggawà lan kala-etan, 14ta kaganawan angkahawangan ay ampag--in mahawang. Kayà ma--in ombayri ya kahalita--an: "Mimata ka ya makakatoloyen. Hika ya kowinta nati, mibangon ka ta hi Pangino--on Hisokristo ay mambin kahawangan ha nakem mo." 15Kayà mag-atap kawo no pangno kawo mamiyay. Mamiyay kawo nin bilang ha mawmangaronong, alwan emen ha ayin nakem. 16Hay an-omiral ha tawtawo hapa--eg pana--on ay kala-etan; kayà mintras ma--in kawo et pana--on nin manggawà kahampatan ay agmoyo sayangen ya pana--on. 17Agkawo pakatangah, no alwan intindiyen moyo no anyay labay nin Pangino--on nin gaw--en moyo. 18Hay paglalahing ay makahirà komoyo. Kayà agkawo maglahing, no alwan hay sikapen moyo ay mapnò kawo nin Ispirito nin Diyos. 19Pamititipon moyo, hay pi-i-ilgowan moyo ay tongkol haPangino--on. Hay kantawen moyo ay kantay panhohomamba boy pamomori kona. Kantawen moyo bayti nin leseb ha nakem moyo. 20Kaganawan bagay ya ampangyari komoyo ay pirmi moyon pasalamatan ha Tatay ya Diyos ha ngalan ni Pangino--on Hisokristo. 21Pasakop kawo ha miha ta miha ha panggogomalang moyo koni Pangino--on Hisokristo. 22Hikawoy bawbabayi ya mangama--in ahawa, pasakop kawo ha ahawa moyo, ta ombayroy kalabayan nin Pangino--on nin gaw--en moyo; 23ta hay lalaki ay pinagka-olo nin ahawa na ya bilang koni Pangino--on Hisokristo ya pinagka-olo nin kaganawan gropon mangama--in katetpel kona. Hitamo ya pinagkanawini ni Pangino--on Hisokristo boy hiya mismo ya Mapangilibri kontamo. 24Kayà ha kaganawan bagay, hay bawbabayi ay dapat pasakop ha ahawa la nin bilang ombayro kontamon kaganawan gropon mangama--in katetpel koni Pangino--on Hisokristo ay ampasakop kona. 25Hikawoy lawlalaki, no pangnoy panlalabi ni Pangino--on Hisokristo kontamon kaganawan gropon mangama--in katetpel kona ay ombayroy gaw--en moyon panlalabi ha ahawa moyo. Inggawà ni Pangino--on Hisokristo ya sarili na nin magdya--dyà para ha ikahampat tamo 26emen hitamo ya pinatawad na ha kawkasalanan ay mag--in tawtawo na. Hin tinompel tamo koni Pangino--on Hisokristo, hay Halità na ya kowinta lanom ya pinangoyah kontamo. 27Ombayro ya ginawà na emen ha pagbira na bayri nin mangwa kontamon kaganawan gropon mangama--in katetpel kona ay makit nay kagandawan nin kahampatan ya anti kontamo boy ayin anyaman ya mansa o maski anya ya ma-ipintas na kontamo. 28- 29Kayà no pangno tamo anlabiyen ni Pangino--on Hisokristo ay dapat ombayro itaman ya panlalabi nin lalaki ha ahawa na. Hay ahawa na ay itoring na nin nawini na, ta ayin lalaki ya ahè malabay ha sarili nan nawini, no alwan hay nawini na ay an-asiwa--en na. Kayà no anlabiyen nin lalaki ya ahawa na ay kowinta an-asiwa--en nay sarili nan nawini. Ombayro hi Pangino--on Hisokristo ya ampangasiwà kontamon kaganawan gropon mangama--in katetpel kona, 30ta hitamo ay pinagkanawini ni Pangino--on Hisokristo. 31Ha Halità nin Diyos ay nakaholat ya hay lalaki ay mog-alih ha mawmato-antawo na, ta makilamo ya ha ahawa na boy hilay lowa ay mag--in mimiha. 32Maldeg ya labay totolen nin habayti, piro hay antokoyen ko ha ombayro ya in-alimbawà ko ha mita-ahawa ay hi Pangino--on Hisokristo boy kaganawan gropon mangama--in katetpel kona. 33Ombayro et komoyon mawmitata-ahawa: hikawoy lawlalaki, balang miha komoyo ay manlabi nin ahawa bilang panlalabi moyo ha sarili moyo; hikawo man ya bawbabayi, igalang moyoy ahawa moyo.

will be added

X\