IPISO 3

1Hiko hi Pablo ay anti bayrin impiriso nin banà ha panhohomonol ko koni Pangino--on Hisokristo nin mangi-aral komoyon alwan Hawhodiyo nin tongkol kona. 2Tandà ko ya nabalita--an moyoyna ya banà ha kahampatan pangingangalo kongko nin Diyos ay pinahimala--an na ko nin mangi-aral para ha ikahampat moyo. 3Hay plano nin Diyos ya ahè pon impatandà ay impatnag na kongko. Ha ompisa nin habayti ya holat ko ay binanggit koynay amò ya tongkol bayri. 4Kayà no pakabahawen moyo ay ma-intindiyan moyo bayti ya natotowan koy tongkol ha ahè pon impatandà ya plano nin Diyos ya tongkol koni Pangino--on Hisokristo. 5Hin nakaraan ya pana--on, habayti ya plano ay ahè impatandà ha tawtawo. Piro hapa--eg, ha panggogomawà nin Ispirito nin Diyos ay impatandà nin Diyos konnawen hawhogò na boy ha ampipangi-aral nin banà ha panggogomawà konla nin Ispirito nin Diyos. 6Habayti ya impatandà na: alwan bongat hikayi ya Hawhodiyo ya ilibri nin Diyos no alwan kateng hikawo ya alwan Hawhodiyo. Ilibri na kawo nin banà ha pantotompel moyo boy pananggap moyo nin Mahampat ya Balità. Hikawo ya alwan Hawhodiyo ay kalamo nawen ana nin pinagkanawini ni Pangino--on Hisokristo boy ha impangakò nin Diyos. 7Ha kahampatan ingangalo nin Diyos, hiko ay ginawà nan magsisirbi ya mangi-aral nin Mahampat ya Balità. Habayti ya kakayawan ya inggawà na kongko ay gawà nin kapangyariyan na. 8Hiko ya pinaka-oltimo ha kaganawan nag--in tawtawo nin Diyos. Ombayro man ay kongko inggawà nin Diyos ya pribilihyo nin mangibalità komoyon alwan Hawhodiyo nin tongkol ha ahè makwan ihipen ya kalibriyan ya ahè mangaka-anggawan ya anti koni Pangino--on Hisokristo, hatoy kalibriyan ha kasalanan. 9Kayà hiko ya anggamiten nin Diyos nin mangipatandà ha kaganawan tawo no pangnoy plano na. Hay babon lotà ay naboyot anan pinalsa nin Diyos, piro hapa--eg nan bongat impatandà ya plano na; 10ta no makit nin ampipamo--on boy ampipama-alà ha katatag-ayan ha kama-inan nin Diyos ya panggogomawà nin Diyos kontamon kaganawan gropon mangama--in katetpel koni Pangino--on Hisokristo ay matanda--an lan mahampat ya karonongan nin Diyos ya makit ha hari-hari̇̀ ya paraan. 11Pinangyari nin Diyos ya nati hi Pangino--on tamon Hisokristo ta hin hato et ay ombayroynay plano na. 12Hapa--eg, banà ha pamakilamo tamo koni Pangino--on Hisokristo ta tinompel tamo kona ay ma--in tamon kakhawan nakem boy pamahimalà nin pakarani ha Diyos. 13Kayà hay labay ko ay agmoyo ikakapey nakem ya kawkadya-dya--an ya andanasen ko nin para komoyo, ta habayto ay ikahampat moyo. 14Ha pangingihip ko nin habayti ya bawbagay ay ampagmaka-aypà akon makirawat ha Tatay tamoy Diyos 15ya pinangibatan nin nagkama--in nin kaganawan anti ha katatag-ayan ha kama-inan nin Diyos boy anti ha babon lotà. 16Ahè mangaka-oboh ya an-itambay nin Diyos. Kayà andawaten ko kona ya ha panggogomawà nin Ispirito na ay lalò homkaw ya nakem moyo nin banà koni Pangino--on Hisokristo. 17Banà ha pantotompel moyo kona, hi Pangino--on Hisokristo ay ampa-iri ha nakem moyo. Hay panlalabi moyo ha Diyos boy ha miha ta miha ay lalò dayin tomibay 18emen hikawo kateng kaganawan nag--in tawtawo nin Diyos ay maka-intindi nin tongkol ha panlalabi ni Pangino--on Hisokristo, hatoy panlalabi ya ahè makwan hokaten no pangno kalapad boy kakarà, boy no pangno katag--ay boy kalalè. 19Habaytoy panlalabi ya ahè kayan intindiyen ay labay kon matanam moyo emen no pangno ya Diyos ay ombayro mabo--ò nin anti komoyo. 20Poriyen tamoy Diyos ta magawà nay igit et ha ma-ihip tamo o pakirawaten tamo kona. Mangyari bayti nin banà ha panggogomawà kontamo nin makapangyariyan ya Ispirito nin Diyos. 21Poriyen ya Diyos banà ha kalibriyan ya inggawà na ha kaganawan gropon mangama--in katetpel kona boy banà koni Pangino--on Hisokristo. Poriyen tamo ya anggan makakanoman. Amin.

will be added

X\