KOLOSAS 1

1Hiko hi Pablo ya hogò ni Pangino--on Hisokristo nin banà ha kalabayan nin Diyos. Hi Timotiyo ya patel tamo ha Pangino--on ay kalamo ko nin ampanolat nin habayti 2ya para komoyon nag--in tawtawo nin Diyos bahen ha siyodad nin Kolosas, komoyon pawpatel ya mangatibay ana ha pantotompel nin banà ha pamakilamo moyo koni Pangino--on Hisokristo. Hay Tatay tamoy Diyos ay mangingangalo dayi komoyo nin mambin kahampatan boy katinekan. 3Ha pangipanalangin nawen komoyo ay pirmi kayin ampasalamat ha Diyos ya Tatay ni Pangino--on tamon Hisokristo 4banà do ha nabalita--an nawen ya tongkol ha pantotompel moyo koni Pangino--on Hisokristo boy panlalabi moyo ha kaganawan nag--in tawtawo nin Diyos. 5Angkagawà moyo bayti ta ma--in kawon an-asawan tanggapen lano ya inhandà anan para komoyo do ha katatag-ayan ha kama-inan nin Diyos. Habayti ya an-asawan moyo ay nalengè moyoyna pa-ibat et hin primiron in-aral komoyo ya kaptegan ya Mahampat ya Balità. 6Habayti ya Mahampat ya Balità ay ampibahwag ana ha kaganawan dogal bayri ha babon lotà, boy ampamayo nin biyay nin tawtawo bilang ombayro komoyo pa-ibat hin nalengè boy na-intindiyan moyo ya kaptegan ya tongkol ha kahampatan pangingangalo nin Diyos ha mawmakasalanan. 7Hay nangitorò komoyo nin habayti ay hi Ipapras ya anlabiyen nawen. Hiya ay kalamowan nawen nin ampagsirbi koni Pangino--on Hisokristo boy angkapahimala--an ya. Gineperan nay gawà nawen bahen komoyo. 8Hiya ya nangibalità konnawen nin tongkol ha panlalabi moyo ha kanayon banà ha panggogomawà komoyo nin Ispirito nin Diyos. 9Kayà pa-ibat hin nalengè nawen bayti ya tongkol komoyo ay pirmi nawen kawon an-ipanalangin. Andawaten nawen ha Diyos ya ipatandà na komoyo ya kalabayan na emen kawo magkama--in karonongan mangintindi nin an-itorò komoyo nin Ispirito nin Diyos. 10Ombayro ya an-ipanalangin nawen emen hay biyay moyo ay mag--in karapatdapat ha Pangino--on, boy emen ha kaganawan paraan ay mapakonsowilo moyo ya, boy emen pirmi kawon makagawà nin kawkahampatan, boy emen mapahanan et ya pagkatandà moyo ha Diyos. 11Andawaten nawen et ya hay ahè makwan ihipen ya kapangyariyan nin Diyos ay patoloy mamakhaw komoyo emen ha kaganawan bagay ay maliga kawon makapagte--eh nin ma--in kapasinsyawan. 12Hikawo dayi ay pasalamat ha Tatay ya Diyos ya ginomawà komoyo emen kawo mag--in karapatdapat nin makapaki-atag ha mana ya an-i-anti̇̀ nan igwà ha nag--in tawtawo na lano do ha kahawangan ha ka-ari--an na. 13Inlibri na tamon inalih ha karegleman ya angkasakopan ni Satanas boy ingkambya na tamo ha angkasakopan nin pinakalabilabi nay Anak na 14ya nantolò ya dayà nin nambeh kontamo boy namatawad nin kawkasalanan tamo. 15Hay Diyos ay ahè angkakit, piro no pangno hi Pangino--on Hisokristo ay ombayro ya Diyos. Ha kaganawan pinalsa ay ayin maka-igit koni Pangino--on Hisokristo ta biha pinalsay kaganawan, hiya ay hiyayna. 16Ha panggogomawà kona nin Diyos ay pinalsa nay kaganawan anti ha katatag-ayan ha kama-inan nin Diyos boy kaganawan anti bayri ha babon lotà, kaganawan angkakit boy ahè angkakit, mag--in aw-anghil ya mangahampat kateng aw-anghil ya nipanloma--et, ompisa ha kapo-onpo-onan angga ha ka-o-oltimowan. Kaganawan nin habayti ay pinalsa na ha panggogomawà kona nin Diyos boy habayti ay para et kona. 17Biha pinalsa ya kaganawan, hiya ay hiyayna; boy ha kapangyariyan na, kaganawan bagay ay ampanatili nin anti ha ayos. 18Hiya ya ampamo--on ha kaganawan gropon mangama--in katetpel ha Diyos, ta hiya ya pinagka-olo la boy hila itaman ya pinagkanawini na. Hay biyay nin habayti ya pinagkanawini na ay kona ampangibat. Hiya ya ka-ona-onawan nabiyay oman ya agana nati. Bayro matanda--an ya ayin maka-igit kona ha maski anyay bagay. 19Labay nin Diyos nin ma-ipatandà ya lobos ya pagkaDiyos ni Pangino--on Hisokristo, 20boy nilabay na ya banà koni Pangino--on Hisokristo ay pakarani kona ya tawtawo. Kayà banà ha pagkamati ni Pangino--on Hisokristo ha koroh boy pantolò nin dayà na, kaganawan pinalsa ha langit boy ha babon lotà ay nagkama--in nin pamakisondò ha Diyos. 21Hin hato, hikawo ay marayò ha Diyos boy ka-away na kawo pon nin banà ha kala-etan nin pangingihip boy gawgawà moyo. 22Piro hapa--eg, hikawo ay kasondò nin Diyos. Hay nangipakisondò komoyo ha Diyos ay hay pangyayari ya nag--in tawo hi Pangino--on Hisokristo boy nati ya emen kawo maka-arap ha Diyos nin hikawo ay malinis ta ayin kasalanan ya ma-ipintas komoyo. 23Ka-ilangan balè nin hikawo ay manatilin mapteg boy matibay ha katetpel moyo. Agmoyo pa-olayan nin ma-alih ya pag-asa moyo ha nalengè moyoy Mahampat ya Balità. Habayti ya Mahampat ya Balità ay na-i-aral ana ha maski ayrin dogal bayri ha babon lotà. Hiko hi Pablo ay nag--in magsisirbi ya mangi-aral nin habayti. 24Hapa--eg ay ma--in akon kaligawan ha pagdanas ko nin kadya-dya--an nin banà komoyo. Habayti ya antanamen ko ha nawini ko ay kapopon--an nin kadya-dya--an ya dinanas ni Pangino--on Hisokristo alang-alang ha kaganawan gropon mangama--in katetpel kona ya kowinta nawini na. 25Hiko ay ginawà nin Diyos nin magsisirbi na ha ampipantompel kona lalo-lalò komoyon alwan Hawhodiyo emen hay Halità na ay ma-ipatandà nin lobosan. 26Pa-ibat hin hato, habayti ay ahè impatandà nin Diyos ha ka-ona-onawan lawlipi̇̀ angga ha nipanhomonoy lawlipi̇̀, piro hapa--eg ay impatandà na kontamon nag--in tawtawo na. 27Inihip nin Diyos ya hay agna pon impatandà ya pinakamahampat boy papag-ispantawan ay ipatnag na ha kaganawan kateng komoyon alwan Hawhodiyo. Habayti ay hay pama-iri ni Pangino--on Hisokristo ha nakem moyo. Banà bayri ay ma--in kawon pag-asa ya lano ay anti kawo ha katatag-ayan do ha kama-inan nay dogal ya ahè makwan ihipen ya kagandawan. 28Kayà hi Pangino--on Hisokristo ya an-i-aral nawen ha kaganawan tawo boy ampanoro--an nawen hila emen aghila magkamali̇̀. Hay karonongan nawen nin mangi-aral konla ay gawà nin Diyos emen tomibay ya pantotompel la koni Pangino--on Hisokristo anggan lano ha omarap hila ha Diyos. 29Banà ha panggogomawà kongko ni Pangino--on Hisokristo ay ma--in akon kakhawan ya ampagsikap gomawà nin habayti.

will be added

X\