Acts 9

1Hapa--eg, ahè angka-alih ya inakit ni Sawlo ha tawtawoy ampipantompel koni Pangino--on Hisos anggan agna hila mapati; kayà nako ya ha pinakapo--on nin pawparì ya anti ha siyodad nin Hirosalim, 2ta ampangwa yan kawkaholatan ya mamapteg nin ma--in yan katongkolan nin lomo--ob ha hawhimba--an nin Hawhodiyo ha siyodad nin Damasko, ta no makakit ya bayro nin ampipanhomonol ha Pangino--on ay dakpen na, mag--in lalaki o babayi, ta ibira na ha siyodad nin Hirosalim nin ipiriso. 3Hapa--eg, hin maraninan mi-abot hi Sawlo bayro ha siyodad nin Damasko ay biglà ma--in hinomawang ya nangibat ha tag--ay ya nakahawang kona. 4Natomba ya ha lotà boy nakalengè ya nin bosis ya naghalità kona nin ombayri: "Sawlo, Sawlo, antà ampadya-dya--an mo ko?" 5"Hino ka, Pangino--on?" wani Sawlo. "Hiko," wana, "hi Pangino--on Hisos ya ampadya-dya--an mo. 6Mireng ka ta mako ka ha siyodad, ta bayro ipatandà komo ya dapat mon gaw--en." 7Hay tawtawoy kalamo ni Sawlo ay natetegnan boy nipag-ispanta ta ma--in hilan nalengè ya bosis, piro ayin hilan makit ya tawo. 8Hapa--eg, nibangon hi Sawlo piro hin immokat nay mata na ay agyayna makakit; kayà inakay la yayna nin gintan ha siyodad nin Damasko. 9Ha lo--ob nin tatloy allo ay agya makakit boy agya ampangan ni ampinom. 10Bayro ha siyodad nin Damasko ay ma--in lalaki ya nagngalan Ananyas ya antompel ha Pangino--on. Hapa--eg, emen nan nakit ya Pangino--on ya ampangingat kona nin ombayri: "Ananyas," wana. "Anya bayto, Pangino--on?" wani Ananyas. 11Hinalità nin Pangino--on, "Mako ka," wana, "ha bali ni Hodas ya anti ha an-ingaten Matoynong ya Daan. Tikapen mo bayro ya tawoy nagngalan Sawlo ya taga Tarso. Hiya ay ampanalangin, 12boy pinakitan ya nin Diyos nin mihay lalaki ya nagngalan Ananyas ya nakon nangipababo nin gamet na kona emen ya makakit oman." 13"Piro, Pangino--on," wani Ananyas, "malakè anay tawo ya naghombong kongko nin tongkol bayri ha tawo, boy tongkol ha mangala--et ya ginawà na ha nag--in tawtawo mo ha siyodad nin Hirosalim; 14boy hay pamako na bayri ha siyodad nin Damasko ay ma--in yan katongkolan ya na-ibat ha pawpo--on nin pawparì nin mandakep nin hinoman ya antompel komo boy ampakirawat ha ngalan mo." 15Hinalità nin Pangino--on koni Ananyas, "Manigè ka," wana, "ta habayti ya tawo ay pinilì ko nin magsirbi kongko. Hiyay mangi-aral nin tongkol ha kalibriyan ha ngalan ko ha alwan Hawhodiyo boy ha aw-arì la kateng komoyon aw-inalalak ni Israyil. 16Mismon hiko ya mangipatandà kona no pangno kalakè ya kadya-dya--an ya ka-ilangan nan danasen alang-alang ha ngalan ko." 17Hapa--eg, nakoyna hi Ananyas. Nilomo--ob ya do ha bali biha na pinababowan nin gamet na hi Sawlo, boy hinalità na, "Patel kon Sawlo," wana, "hi Pangino--on Hisos ya napakit komo hin anti ka ha daan ya palako bayri ay nangihogò kongko nin mako komo emen ka makakit oman boy emen ka mapnò nin Ispirito nin Diyos." 18Antimano nakakit oman hi Sawlo ta ma--in bilang hikhik konà ya na-alih ha mata na. Hapa--eg, nireng ya ta napabinyag. 19Nangan ya boy hinomkaw ya nawini na. Hi Sawlo ay nanatilin ongnoy allo ha siyodad nin Damasko nin kalamo nay ampipantompel ha Pangino--on. 20Peleg nan anti bayro ay ampako ya ha hawhimba--an nin Hawhodiyo ta an-i-aral na ya hi Apo Hisos ay talagan Anak nin Diyos. 21Ampipag-ispantay kaganawan tawoy ampakalengè ha an-i-aral na. "Alwa nayì," wanla, "nin hiya bayti ya tawoy ampamadya--dyà nin ampipantompel ha ngalan ni Hisos do ha siyodad nin Hirosalim? Alwa nayì hay bara--nan nin pamako na bayri ay dakpen na hila nin bilang pawpiriso ta gitan na hila ha pawpo--on nin pawparì?" 22Piro lalò hinomkaw ya nakem ni Sawlo ha pangangaral, boy pinaptegan na ya hi Apo Hisos ay talagan Kristo ya impangakò nin Diyos. Kayà hay Hawhodiyoy ampa-iri bayro ha siyodad nin Damasko ay ayin ma-itobay kona. 23Malakè ya alloy nalabah, hay Hawhodiyo ay nititipon ta pini-i-ilgowan la no pangno la patyen hi Sawlo. 24Piro natanda--an ni Sawlo ya tongkol bayri. Allo yabi hay Hawhodiyo ay ampagbantay ha pawpolta nin siyodad ta an-abangan la hi Sawlo nin patyen. 25Piro mihay yabi, hay kawkalamo ni Sawlo ya ampipantompel koni Apo Hisos ay kinwa la hi Sawlo, ta ingkarga ha tiklis nin imparaan ha abirtoy lingling ya padir nin intohtoh ha kagmang. 26Hi Sawlo ay nako ha siyodad nin Hirosalim ta labay nan makilamo ha ampipantompel ha Pangino--on. Piro angkalimo hila kona ta aghila ampinto--o nin hiya ay antompel koni Apo Hisos. 27Hapa--eg hi Sawlo ay kinwa ni Birnabi ta gintan ha aw-alagad. Imbalità na konla ya ha daan ya magpalako ha siyodad nin Damasko, hi Apo Hisos ay napakit boy naki-ilgo koni Sawlo. Hinalità et ni Birnabi konla ya tongkol ha katapangan ni Sawlo nin nangaral ha tawtawo ha ngalan ni Apo Hisos do ha siyodad nin Damasko. 28Hapa--eg, hi Sawlo ay tinanggap nin aw-alagad; kayà kalamolamo la yayna nin makon mangaral ha kaganawan dogal ya angkasakopan siyodad nin Hirosalim. Hay tapang nan mangaral ha ngalan nin Pangino--on. 29Piro hi Sawlo ay amplanowen patyen nin hatoy angkapagkadiskosyon nay Hawhodiyoy ampaghalità nin halità Grigo. 30Hin natanda--an nin ampipantompel ha Pangino--on ya labay patyen hi Sawlo nin hatoy Hawhodiyo ay gintan la ya ha siyodad nin Sisarya, biha la ya pina-orong ha siyodad nin Tarso ya sarili nan dogal. 31Hapa--eg, nagkama--in katinekan ya ampipantompel ha Pangino--on ha angkasakopan nin probinsyan Hodiya, probinsyan Galiliya, boy probinsyan Samarya. Antomibay ya pantotompel la koni Apo Hisos ta antambayan hila nin Ispirito nin Diyos. Angkatoto hilan gomalang ha Pangino--on boy lalò hilan anlomakè. 32Ha pantomalà ni Pidro nin mangaral ay nako ya ha banowan Lida nin manibaw ha nag--in tawtawo nin Diyos. 33Bayro ay nakit nay mihay lalaki ya nagngalan Inyas. Ha lo--ob waloy ta--on, hi Inyas ay pirmin ampirà ta polonen. 34"Inyas," wani Pidro kona, "ampakahampaten ka ni Pangino--on Hisoskristo. Mibangon ka ta lolonen moy amak mo." Antimano, hinomampat hi Inyas. 35Kaganawan tawo ya ampa-iri ha banowan Lida boy ha Patal Saron ay tinompel ha Pangino--on hin nakit lay naka-owako hi Inyas. 36Hapa--eg do ha banowan Hopi ay ma--in mihay babayi ya antompel koni Apo Hisos ya nagngalan Tabita ya ha halità Grigo ay Dorkas ya hay labay totolen ay oyha. Mahampat ya gawgawà na boy ampanambay ya ha manga-irap. 37Hin habayton pana--on, hi Dorkas ay nagmasakit boy nati. Hay bangkay na ay pinaliyò boy in-olì la ha tag--ay bali nin inggawà ha mihay kowarto. 38Hay banowan Hopi ay alwan marayò ha banowan Lida. Hin nabalita--an nin hatoy ampipantompel ha Pangino--on ya hi Pidro ay anti ha banowan Lida ay nangihogò hila nin loway lalaki ya maki-ilgo kona nin ombayri: "Manandalì ka ta makilako ka konnawen ha banowan Hopi." 39Kayà nakilako konla hi Pidro. Hin ni-abot hila ha banowan Hopi ay in-olì la hi Pidro ha tag--ay bali ha kowartoy pinangigwa--an nin bangkay ni Dorkas. Bayro, hi Pidro ay pini-o-opongan nin bawbawoy babayi ya ampipanangih koni Dorkas. An-ipakit la koni Pidro ya bawbaro boy sawsambray ginawà ni Dorkas hin angkabiyay ya et. 40Hapa--eg, pina-alih ni Pidro baytoy tawtawoy anti do ha lo--ob kowarto biha ya nanalimokod ta nanalangin. Hin nayarì yan nanalangin ay inomarap ya do ha bangkay biha na hinalità, ya wana, "Tabita, mibangon ka." Hapa--eg, immokat ni Dorkas ya mata na boy hin nakit na hi Pidro ay nibangon ya ta niknò. 41Inoligtanan ni Pidro ya gamet ni Dorkas ta tinambayan na yan nireng, biha na pinititipon nin oman baytoy tawtawoy ampipantompel ha Pangino--on kateng hatoy bawbawoy babayi ta in-arap na konla hi Dorkas ya angkabiyay. 42Habayti ya pangyayari ay nibahwag ha kaganawan tawo ha banowan Hopi; kayà malakè ya tawoy tinompel ha Pangino--on. 43Hi Pidro ay naboyot bayro ha banowan Hopi, boy nakihandà ya koni Simon ya mananarabahon kawkatat nin ayop.

will be added

X\