Acts 6

1Hapa--eg, mintras anlomakè ya ampipantompel ha Pangino--on, hay Hawhodiyoy ampanggamit nin halità Grigo ay ampagriklamo ha Hawhodiyo ya talagan taga bayro, ta anhalita--en la ya hay bawbawoy babayi ha gropo la ay ahè angkabiyan nin pamamangan ha allo-alloy pangipatpel nin ikabiyay. 2Banà bayro, kaganawan hatoy ampipantompel ha Pangino--on ay impa-ingat nin hatoy labinloway alagad nin mititipon ta ombayri ya hinalità la konla: "Alwan tamà nin para konnawen ya pa-olayan ya pangi-aral nin Halità nin Diyos emen nawen mapama-ala--an ya pangipatpel nin inggawà ya ikabiyay. 3Kayà, pawpatel, mamili̇̀ kawo ha lawlamo moyo nin pitoy lalaki ya balaybalay ha kahampatan, ma--in karonongan, boy pono-ponò nin Ispirito nin Diyos. Igwà nawen konla ya pamama-alà nin habayti, 4ta hikayi itaman ay gamiten nawen ya kaganawan oras ha pananalangin boy ha pangi-aral nin Halità nin Diyos." 5Nalabayan nin hatoy ampititipon baytoy hinalità nin aw-alagad; kayà pinili̇̀ la hi Istiban ya makhaw ya pantotompel boy pono-ponò Ispirito nin Diyos, kateng hi Pilipi, Prokoro, Nikanor, Timon, Parminas, boy hi Nikolas. Hi Nikolas ya taga Antiyokiya ay alwan Hodiyo piro anhomonol ha ka-ogali--an nin Hawhodiyo. 6Habayti ya pitoy lalaki ay in-arap do ha aw-alagad. Impanalangin hila nin aw-alagad boy impababo lay gamet la konla ta kaptegan nin hila ay binyan katongkolan nin mama-alà. 7Banà ha pamapteg nin aw-alagad boy hatoy tawtawoy kapariho lan katetpel ay nibahwag ya Halità nin Diyos. Ha siyodad nin Hirosalim ay kapampopomahan nin tawtawoy ampipantompel ha Pangino--on, kateng pawpari̇̀ nin Hawhodiyo ay malakè ya tinompel. 8Hi Istiban ya ponò nin kahampatan boy kapangyariyan nin Diyos ay ampakagawà nin pawpapag-ispantawan ha tawtawo. 9Hiya ay ma--in kawka-away ya ampipangalaban kona. Hila bayti ay Hawhodiyoy ampipanhomamba ha an-ingaten Himba--an Nin Tawtawoy Libri. Hay kanayon konla ay taga Sirini; hay kanayon itaman ay taga Alihandriya; ma--in taga Silisya boy ma--in et nin taga Asya. 10Ha pandiskosyon la koni Istiban ay agla ya angkapatalo, ta Ispirito nin Diyos ya ampambi konan karonongan nin maghalità. 11Banà bayro, hay ginawà la ay nangopà hila nin ongnoy tawoy pinahalità lan kawkabongkokan ya ombayri: "Nalengè nawen yay naghalità nin kontra koni Moysis boy ha Diyos." 12Ha ombayroy hinalità la, hay tawtawo, mawmato--ay mangama--in katongkolan, boy mawmangitorò nin kawkapanogo--an ay namahang koni Istiban. Antimano, dinakep la ya ta gintan la yan in-arap ha Hawhodiyoy ampipamo--on. 13Hapa--eg, nangwa hilayna et nin ongnoy tawo ya pinahalità la nin kabongkokan ya tongkol koni Istiban, ya wanla, "Habayti ya tawo ay pirmin ampaghalità nin kontra ha masagradoy bali nin Diyos boy kontra ha kawkapanogo--an nin Diyos ya inggawà kontamo ni Moysis; 14ta nalengè nawen yay naghalità nin habayti ya bali nin Diyos ay hira--en ni Hisos ya taga Nasarit boy hagiliyan nay kawka-ogali--an ya na-iknawan tamoy inggawà ni Moysis." 15Kaganawan nin hatoy ampipampiknò ya ampipamo--on ay nanegteg koni Istiban. Nakit lay kahawangan lopa na ya bilang kahawang lopa nin mihay anghil nin Diyos.

will be added

X\