Acts 5

1Ma--in mita-ahawa ya naglakò nin lotà. Hay ngalan nin lalaki ay Ananyas; hay ngalan itaman nin babayi ay Sapira. 2Napisondo--an lan mita-ahawa ya hay napaglako--an la ay baw-ahan la. Hapa--eg hay tilà ay gintan ni Ananyas nin inggawà ha aw-alagad. 3Piro hinalità kona ni Pidro, "Ananyas," wana, "binongkok moy Ispirito nin Diyos ta hi Satanas ya ampamo--on ha nakem mo. Hay kanayon ya sintimos ya napaglako--an moyo nin lotà ay impapawà moyo nin para ha sarili moyo. 4Hin ahè et inlakò ya lotà, alwa nayi̇̀ nin hikawo ya ma--in ikon nin habayto? Hin na-ilakò ana, alwa nayi̇̀ nin hikawo simpri ya ma--in ikon nin napaglako--an? Antà na-ihipan moyon gaw--en ya ombayroy bagay? Agka nagbongkok ha tawo no alwan nagbongkok ka ha Diyos." 5Hin nalengè bayto ni Ananyas ay natomba yan biglà ta nati ya. Kaganawan tawoy nakalengè nin hatoy nangyari koni Ananyas ay nikalimo. 6Hapa--eg, pinakaraniyan ya nin ongnoy mangalagò ya lalaki. Pinotot la ya biha la ya gintan nin intabon. 7Mangatatloy oras ya nalabah ay nakalateng hi Sapira ya ahè nakatandà nin nangyari ha ahawa na. 8Hinalità kona ni Pidro, "Ombayri nayi̇̀," wana, "ya kantidad ya tinanggap moyoy kabayaran nin lotà moyo?" "Awò," wani Sapira, "haba--in ya kaganawan kantidad." 9"Antà," wani Pidro, "nin napisondo--an moyon mita-ahawa nin hoboken ya Ispirito nin Diyos no parosawan na kawo ha pamongkok moyo kona? Hay tawtawoy nangitabon ha ahawa mo ay anti ana ha polta ta hika ya kowen la nin ihono." 10Antimano, natomba hi Sapira ta nati ya. Hatoy tawtawoy nangitabon ha ahawa na ay nilomo--ob. Nakit la yay nati; kayà kinwa la ya ta gintan la yan intabon do ha danin pinangitabonan nin ahawa na. 11Kaganawan tawoy antompel koni Apo Hisos ay masyadon nalimo kateng kaganawan nin hatoy nakalengè nin tongkol bayro ha nangyari. 12Hay aw-alagad ni Apo Hisos ay ampakagawà nin malakè ya papag-ispantawan nin tawtawo. Do ha an-ingaten balkon ni Solomon ha bali nin Diyos ay pirmin ampititipon ya ampipantompel ha Pangino--on. 13Maski an-igalang baytoy tawtawo ya ampititipon bayro ay ahè makaregdeg nin makitipon konla ya tawtawoy ahè antompel ha Pangino--on. 14Ombayro man ay anlomakè hila ta ma--in lawlalaki boy bawbabayi ya antompel ha Pangino--on ya ampomahan konla. 15Banà ha pawpapag-ispantawan ya anggaw--en nin aw-alagad, hay mangama--in masakit ay gintan ha pingit daan nin impa-irà ha amak emen pagdaan ni Pidro ay madanan hila nin maski anino nan bongat. 16Hapa--eg, nakalateng bayro ha siyodad nin Hirosalim ya malakè ya tawoy na-ibat ha mangarani ya bawbanowa, ta gintan lay mangama--in masakit kateng tawtawoy pinahokan nin mangala--et ya aw-ispirito. Hilay kaganawan ay hinomampat. 17Hapa--eg hay po--on nin pawpari̇̀ kateng Sawsadosiyo ya kawkalamowan na ay masyadon angka-inggit ha aw-alagad. 18Kayà imparakep la baytoy aw-alagad ta impiriso. 19Piro habayton yabi, hay polta nin pirisowan ay nilo-atan nin anghil nin Pangino--on ta pinalikol na hila, boy naghalità konla, 20"Mako kawo," wana, "ha bali nin Diyos ta bayro moyo halita--en ha tawtawo ya tongkol ha biyay ya ayin anggawan ya igwà konla nin Diyos." 21Kayà hinonol la baytoy hinalità nin hatoy anghil. Hay hambak et ay nilomo--ob hilayna ha bali nin Diyos ta nag-ompisan manorò ha tawtawo. Hatoy po--on nin pawpari̇̀ kateng kawkalamowan na ay impa-ingat lan mititipon ya kaganawan Hodiyo ya mato--ay mangama--in katongkolan. Hapa--eg, nangihogò hilan mangwa nin hatoy aw-alagad bayro ha pirisowan. 22Piro hin ni-abot do ha pirisowan baytoy inhogò ay ayin hilan nakit ya aw-alagad bayro; kayà nagbira hila do ha nangihogò konla ta imbalità la, ya wanla, 23"Hin ni-abot kayi ha pirisowan ay nakit nawen ya hay polta ay nakakandado. Hay gawgowardya ay anti bayro ha polta nin ampagbantay; piro hin nilo-atan nawen ay ayin kayin nakit ya tawo bayro." 24Hin nalengè bayti nin hatoy kapitan ya ampamo--on ha ampipagbantay ha bali nin Diyos boy hatoy pawpo--on nin pawpari̇̀ ay agla makwan ihipen no anyay nangyari do ha aw-alagad boy no anyay homono nin mangyari. 25Hapa--eg, ma--in mihay lalaki ya nakalateng ya naghalità konla, ya wana, "Leng--en moyo bayti! Hatoy lawlalaki ya impiriso moyo ay anti bayri ha bali nin Diyos ta ampanorò nin tawtawo." 26Kayà nanigè baytoy kapitan kateng tawtawowan na, ta dinakep lan oman baytoy aw-alagad. Piro aghila nanggamit nin powirsa ha pandakep la konla, ta angkalimo hilan mabato nin tawtawo. 27Hatoy aw-alagad ay gintan lan in-arap ha ampipamo--on. Hapa--eg, naghalità baytoy pinakapo--on nin pawpari̇̀, 28"Mahigpit nawen anan imbawal komoyo ya agkawo mangaral ha ngalan nin haba--in ya tawoy anhonolen moyo. Piro biliwen moyoy ginawà moyo! Nibahwag ana ha siyodad nin Hirosalim ya in-aral moyo, boy ampapalwahen moyo et nin hikayi ya ma--in kasalanan ha pagkamati nin haba--in ya tawo." 29Tinombay konla hi Pidro kateng hatoy kanayon ya aw-alagad, "Ka-ilangan honolen nawen ya Diyos kisan homonol kayi ha tawtawo. 30Hay Diyos ya ampahimala--an nin kawka-apo-apowan tamo ay namiyay oman koni Apo Hisos hin pinati moyo yan impakò ha koroh. 31Hapa--eg hi Apo Hisos ya Mapangilibri ay gintan nin Diyos nin miknò ha bandan wanan na nin mamo--on. Ginawà bayti nin Diyos emen hitamo ya aw-inalalak ni Israyil ay makapaghehe, boy emen tamo patawaren ha kawkasalanan tamo. 32Hikayi boy Ispirito nin Diyos ya ampakapapteg ha bawbagay ya habayti. Inggawà nin Diyos ya Ispirito na nin mamo--on ha nakem nin tawtawoy anhomonol kona." 33Hin nalengè bayto nin hatoy ampipamo--on ya hinalità nili Pidro ay masyado hilan namahang; kayà labay lan patyen ya aw-alagad. 34Piro miha konla ya nagngalan Gamalil ya mihay Parisiyoy mangitorò nin kawkapanogo--an boy anggalangen nin kaganawan tawo ay nireng ha arapan nin ampipamo--on ta immanda nay ilikol baytoy aw-alagad. 35Hapa--eg, hinalità na do ha kawkalamowan na, "Hikawo ya kapara kon aw-inalalak ni Israyil, pag-aralan moyon mahampat ya dapat moyon gaw--en bayri ha lawlalaki ya habayti. 36Panemtemen moyo baytoy nangyari koni Tiyodas ya ongnoy pana--on anay nakaraan. Ha pagkakanwari̇̀ na nin hiya ay makapangyariyan ay apat gato katawoy nakilamo kona. Hin pinati ya ay nangapihihiyay baytoy nipampakilamo kona; kayà ayin anan nangyari hin ayin yayna. 37Nalabah bayto, hin pana--on nin pagsinsos ay ombayro simpri ya ginawà ni Hodas ya taga probinsyan Galiliya. Nanagyat yan ongnoy tawoy paglamo na, piro pinati ya simpri nin kanayon ya tawtawo, biha nangapihihiyay ya kaganawan kalamowan na. 38Kayà hay mahalità ko komoyo hapa--eg ay pa-olayan moyo bayti ya lawlalaki, ta no habayti ya tawtorò la boy gawgawà la ay na-ibat konla ay ayin et bongat mangyari. 39Piro no nangibat ha Diyos ay agmoyo hila mapatgen no alwan lomwah et nin hikawo ay anlomaban ha Diyos." 40Hinomonol baytoy ampipamo--on do ha wawali ni Gamalil. Impakwa la baytoy aw-alagad ta binarog, biha la binawalan nin manorò oman ha ngalan ni Apo Hisos. Hin nayari̇̀ ay pinalwahan la hilayna. 41Hapa--eg, nog-alih baytoy aw-alagad bayro ha pinititiponan nin hatoy ampipamo--on. Maliga hila ta imbilang nin Diyos nin hila ay nararapat magdanas nin kareng-eyan alang-alang ha ngalan ni Apo Hisos. 42Allo-allo ay ampako hila ha bali nin Diyos boy ha bawbinali, ta ampanorò boy an-i-aral lay Mahampat ya Balità ya tongkol koni Kristo ya impangakò nin Diyos.

will be added

X\