Acts 4

1Ampaghalità et hi Pidro boy hi Howan hin napakarani konla ya pawpari̇̀ kalamoy kapitan ya ampamo--on ha ampipagbantay nin bali nin Diyos, boy ma--in ongno ha gropon Sadosiyoy rilihyoso ya ahè ampinto--o nin mabiyay oman ya nikati. 2Hay pahang la koni Pidro boy koni Howan ta anhalita--en nili Pidro ya hi Apo Hisos ay nabiyay oman. Ha ombayro ay angkapaptegan ya hay nikati ay mabiyay oman. 3Hapa--eg, dinakep la hi Pidro boy hi Howan. Banà ta anyomabi ana ay impahok hila ha pirisowan anggan na-abot ya ika-ibokah. 4Piro kalak--an do ha tawtawoy nanlengè koni Pidro ay tinompel koni Apo Hisos. Kayà inomabot nin liman libo ya kalak--an nin lawlalaki. 5Ika-ibokah, hay Hawhodiyoy ampipamo--on, mawmato--ay mangama--in katongkolan, boy mawmangitorò nin kawkapanogo--an ay nititipon ha siyodad nin Hirosalim. 6Kalamo la bayro hi Anas ya pinakapo--on nin pawpari̇̀, hi Kaypas, hi Howan, hi Alihandro, boy kalamo et bayro ya kaganawan lalaki ha pamilya ni Anas. 7Hi Pidro boy hi Howan ay gintan nin in-arap konla ta pinastang la, "Hino," wanla, "ya nambi komoyo nin kapangyariyan, boy hinoy ma--in ngalan ya ginamit moyo nin namakahampat do ha tawoy ahè pon maka-owako?" 8Hapa--eg hi Pidro ya napnò nin Ispirito nin Diyos ay naghalità konla, "Anggalangen kon ampipamo--on boy mawmato--ay mangama--in katongkolan, leng--en moyo bayti ya halita--en ko. 9Pinastang moyo kayi nin tongkol ha mahampat ya nangyari bayri ha tawoy ahè pon maka-owako. Pinastang moyo kayi simpri no pangno ya hinomampat. 10Hikawo boy kaganawan inalalak ni Israyil, paka-intindiyen moyo bayti ya halita--en ko. Habayti ya lalaki ya hinomampat ya anti bayrin ampireng ha arapan moyo ay napakahampat nin kapangyariyan nin ngalan ni Pangino--on Hisokristo ya taga Nasarit. Hi Pangino--on Hisokristo ya impakò moyo ha koroh, piro biniyay yan oman nin Diyos. 11Hiya simpri bayti ya binanggit ha Halità nin Diyos ya ombayri ya pagkahalità: 'Hay bato ya ahè tinanggap nin manggagawà bali ay nag--in pinakama-alagà ya bato.' 12Ayin kanayon ya makapilibri kontamo ha kasalanan no alwan hi Pangino--on Hisos bongat, ta ayin kanayon ya ngalan ya inggawà ha tawtawo bayri ha babon lotà ya ma-ari̇̀ mangilibri." 13Nag-ispanta baytoy tawtawoy ampipamo--on hin nakit lay katapangan ni Pidro boy Howan nin mag-ilgo, ta tandà la ya hila ay pangkaraniwan bongat tawo boy ayin pinag-aralan. Hapa--eg, napanemteman la ya hi Pidro boy hi Howan ay nakilamo koni Apo Hisos hin angkabiyay ya et. 14Piro ayin hilan mahalità ta hatoy lalaki ya hinomampat ay anti bayro nin ampireng ha arapan la ha dani ni Pidro boy Howan. 15Kayà pinalikol la hili Pidro do ha kowartoy ampititiponan la biha hila nididiskosyon. 16"Anya," wanla, "ya gaw--en tamo bayri ha loway tawoy habayti? Agtamo ma-ipogla--oh ya nakagawà hilan papag-ispantawan, ta kaganawan tawo ha siyodad nin Hirosalim ay nakatandà ana nin tongkol ha ginawà la. 17Piro emen agana mibahwag bayti ay ha-aren tamo hilan maghalità ha hinoman ya tawo nin tongkol ha ngalan ya habayti." 18Hapa--eg, impa-ingat la hi Pidro boy hi Howan ta inhigpit lan hinalità konla ya aghila maghalità o mangi-aral nin tongkol koni Hisos. 19Piro tinombay hi Pidro boy hi Howan, ya wanla, "Ihipen moyo no anyay tamà gaw--en ha tegteg nin Diyos; homonol kayi komoyo o Diyos ya honolen nawen? 20Agnawen ma-ari̇̀ itegen ya pangibalità nin habayti ya tongkol ha nakit nawen ya ginawà ni Apo Hisos boy hawhalità nay nalengè nawen." 21- 22Hapa--eg hili Pidro ay lalò binawalan nin hatoy ampipamo--on. Pinalayà la hila ta ayin hilan makit ya bara--nan nin pamarosawan la koni Pidro boy koni Howan, ta kaganawan tawo ay ampipamori ha Diyos banà ha pangyayari ha pamakahampat nin hatoy lalaki ya ma-igit anan apatapò ya idad. 23Hin napalayà hi Pidro boy hi Howan ay nagbira hila do ha kawkalamo lay ampipantompel ha Pangino--on, ta imbalità la baytoy hinalità nin hatoy pawpo--on nin pawpari̇̀ boy hatoy mawmato--ay mangama--in katongkolan. 24Hin nalengè la bayto ay nilalamo hilan nanalangin ha Diyos, ya wanla, "Pinakamakapangyariyan ya Pangino--on, hika ya namalsa nin langit, lotà, dagat, boy kaganawan bagay ya anti bayro. 25Hi Ari̇̀ Dabid ya ka-apo-apowan nawen ay magsisirbi mo. Impahalità kona nin Ispirito mo ya ombayri: 'Antà masyadon ampamahang ya tawtawoy alwan Hodiyo, boy antà ampangihip hila nin ayin kawkakokowintan bagay? 26Hay aw-ari̇̀ ha babon lotà boy kaganawan ampipamo--on ay nakahandà ana boy nititipon nin lomaban ha Pangino--on Diyos boy koni Kristo ya impangakò na.' 27Habayti ay talagan nangyari ana bayri ha siyodad nin Hirosalim ta hi Hirodis ya ari̇̀, hi Ponsyo Pilato ya gobirnador, tawtawoy alwan Hodiyo, boy kawkapariho nawen Hodiyo ay nangapimimiha nin nilomaban koni Apo Hisos ya magsisirbi mo ya ayin kapintasan ya hi Kristo ya impangakò mo. 28Hay ginawà la koni Apo Hisos ay talagan kalabayan mon mangyari ta habayti ay plano mo hin hato et. 29Hapa--eg, Pangino--on, tandà moy ampalimowen la kayi. Kayà hikayi ya mawmagsisirbi mo ay tambayan mo emen kayi magkama--in nin katapangan mangi-aral nin Halità mo ha tawtawo. 30Ipakit moy kapangyariyan mon mamakahampat nin tawtawo, boy manggawà ka nin pawpapag-ispantawan ha ngalan ni Apo Hisos ya magsisirbi mo ya ayin kapintasan." 31Hin nayari̇̀ hilan nanalangin, do ha ampititiponan la ay nayegyè. Hilay kaganawan ay napnò nin Ispirito nin Diyos boy nag--in hilan matapang ha pangi-aral nin Halità nin Diyos. 32Kaganawan antompel ha Pangino--on ay nangapimimihan pagnanakem boy pangingihip. Ayin konlan nangibilang nin hay anti konla ay sarili lan ikon, no alwan hay anti konla ay para ha kaganawan. 33Hay aw-alagad ay ma--in kapangyariyan mamapteg nin tongkol ha pangabiyay oman ni Apo Hisos, boy inggawà nin Diyos ha kaganawan antompel kona ya kahampatan ingangalo na. 34Ayin ampagkakolang konla ha panganga-ilangan, ta hay kawkalamowan la ya ma--in lotà o bali ay an-ilakò la, ta hay napaglako--an 35ay an-igwà la ha aw-alagad, biha itaman an-igwà nin aw-alagad ha balang miha ya ampanga-ilangan kompormi ha panganga-ilangan na. 36Ombayro itaman ya ginawà ni Hosi ya taga islan Sipri. Hiya ay lipi̇̀ ni Libi ya hay impangalan kona nin aw-alagad ay Birnabi ya hay labay totolen ay ampakapakhaw nakem. 37Inlakò ni Birnabi ya paliyan na ta hay napaglako--an ay inggawà na ha aw-alagad.

will be added

X\