Acts 28

1Hin nakalibri kayi boy nakalakat ay natanda--an nawen ya habaytoy dogal ay isla awod ya an-ingaten Malta. 2Hay tawtawo bayro ay namakit nin kahampatan konnawen. Banà ta ampangoran boy malay--ep ya pana--on ay namagket hilan apoy ya pinanengeyan nawen. 3Hi Pablo ay nangwa nin mihay peteh nin kayo biha na inggawà ha apoy. Hin angkalanglang ana bayto ay ma--in nilomway otan ya ma--in dità ya nangyat nin gamet ni Pablo. 4Nakit nin tawtaga bayro baytoy otan ya naka-ombitin nin nakakayat ha gamet ni Pablo; kayà ni-i-ilgo hila, ya wanla, "Haba--in ya lalaki ay sigoradon mapamatin tawo; kayà maski nakalibri ya ha dagat ay ahè i-aboloy kona nin Pinakamakapangyariyan ya hiya ay mabiyay et." 5Piro impagpag bongat ni Pablo baytoy otan ha apoy, boy hiya ay ahè napangno. 6An-anti--en nin tawtawo ya hi Pablo ay bomayà o biglà nin mati. Piro ha kaboyotan panganti̇̀ la ay ahè napangno hi Pablo; kayà impalagay la ya hi Pablo ay mihay diyos. 7Hi Pobliyo ya ampamo--on bayro ha islan Malta ay ma--in malawang ya lotà ya marani bayro ha kama-inan nawen. Hiya ay maba--it; kayà maliga yan nagkahandà konnawen lo--ob tatloy allo. 8Hin habayto, hay tatay ni Pobliyo ay naka-irà ta an-amoten boy andisintiriyawen. Hin natanda--an bayto ni Pablo ay nako ya do ha kama-inan nin hatoy ampagmasakit, ta impanalangin na ya boy inaptoh. Hapa--eg, hinomampat baytoy tatay ni Pobliyo. 9Hin nibahwag baytoy pangyayari, kaganawan tawoy ampipagmasakit bayro ha isla ya habayto ay nako konnawen boy hinomampat hila itaman. 10Banà bayri ay nakatanggap kayi nin malakè ya rigalo ya na-ibat konla. Hin manigè kayina ay kinargawan lay barko nawen nin pawpanganga-ilangan nawen ha pagbibiyahi. 11Tatloy bowan pon ya nalabah biha kayi naka-alih bayro ya hinomakay ha barkoy na-ibat ha siyodad nin Alihandriya ya namalabah nin abagat bayro ha islan Malta. Habayti ya barko ay an-ingaten Kastor boy Polok. 12Pa-ibat do ha islan Malta ay ni-abot kayi ha siyodad nin Sirakosa. Bayro kayi nanatili nin tatloy allo. 13Hapa--eg, nanigè kayina et anggan ni-abot kayi ha siyodad nin Rigiyo. Ika-ibokah, hin nag-ompisan nangangin nin ampangibat ha bagatan ay nanigè kayina et. Nalabah ya loway allo ay ni-abot kayi ha siyodad nin Potiyoli. 14Bayro ay nakakit kayi nin ongnoy ampipantompel ha Pangino--on. Pinaki-ilgowan la kayin manatili bayro nin pitoy allo. Nalabah bayto ay nowako kayi anan magpalako ha siyodad nin Roma. 15Hapa--eg, nabalita--an nin pawpatel ha Pangino--on bayro ha Roma ya hikayi ay anti ha daan nin magpalako bayro. Kayà hikayi ay hinakbat la ha Palingkin Apiyo boy hay kanayon ay ha dogal ya an-ingaten Tatloy Bali ya Pamakihanda--an. Hin nakit ni Pablo baytoy ampipantompel ha Pangino--on ay nagpasalamat ya ha Diyos boy hinomkaw ya nakem na. 16Hin ni-abot kayi ha siyodad nin Roma, hi Pablo ay pinayagan magsarili nin pa-iriyan, piro bantayan ya nin mihay hondalò. 17Nalabah ya tatloy allo ay impa-ingat ni Pablo nin mititipon ya Hawhodiyoy ampipamo--on. Hin nangapititipon hilayna ay hinalità na konla, ya wana, "Pawpatel ko, maski ayin akon nagawà ya kontra ha kawkapariho tamon Hodiyo, o ha kawka-ogali--an nin kawka-apo-apowan tamo ay impiriso la ko ha siyodad nin Hirosalim, biha la ko inggawà ha gamet nin Rawromano. 18Hin nayari̇̀ akon inimbistiga nin hatoy Rawromano ay labay la koyna dayin palwahan, ta ayin hilan nakit ya nagawà koy dapat lan pamatyan kongko. 19Piro hin ahè pinomayag ya kawkapariho tamon Hodiyo ay napilitan akon magriklamo koni Ari̇̀ Sisar maski ayin akon ma-iriklamo ya kontra ha Kawkahodiyo ko. 20Hay bara--nan nin pangipa-ingat ko komoyo ay emen katawo makit boy mapagka-ilgo. Hiko ay nakabalol nin tikalà banà ha pantotompel ko ha an-asawan tamo nin aw-inalalak ni Israyil." 21Hapa--eg, hinalità la koni Pablo, ya wanla, "Ayin kayin natanggap ya holat ya na-ibat ha probinsyan Hodiya ya tongkol komo. Ayin simprin hinalità o inhombong ya kontra komo ya pawpatel tamo ya nika-ibat bayro. 22Ombayro man ay labay nawen malengè no anyay mahalità mo, ta tandà nawen ya maski ayrin dogal, hay tawtawo ay ampaghalità nin kontra ha gropo ya ampakilamowan mo." 23Hapa--eg, intaning lay allo nin pamititipon la. Hin na-abot bayto ay malakè ya nititipon bayro ha ampa-iriyan ni Pablo. Pa-ibat bayombokah anggan yabi, hi Pablo ay nag-ilgo konla boy impalinaw na ya tongkol ha pamomo--on nin Diyos. Impalinaw na et konla ya kawkapanogo--an ya hinolat ni Moysis kateng hinolat nin pawpropita emen hila tompel koni Apo Hisos. 24Hay kanayon ya anti bayro ay ninto--o ha hinalità ni Pablo; hay kanayon balè ay ahè ninto--o. 25Kayà hin aghila mangapikakanokat ha hinalità ni Pablo konla ay mog-alih hilayna. Piro biha hila nog-alih ay ma--in et mihay bagay ya hinalità ni Pablo konla ya ombayri ya pagkahalità: "Hay impaholat nin Ispirito nin Diyos ya tongkol ha kawka-apo-apowan tamo ay talagan peteg. Habayto ya impaholat na koni propita Isayas ay ombayri: 26'Mako ka ha tawtawoy habayti ta halita--en mo konla: manlengè kawo man anan manlengè piro agkawo maka-intindi; manegteg kawo man anan manegteg piro agkawo makakit. 27Habayti ya tawtawo ay nag--in mangatyà ya nakem; ampagteekteek hila boy ampagbowagbowag. No alwa hila dayin ombayro ay makakit hila, makalengè, maka-intindi, boy pakarani hila kongko ta biyan ko hila nin mahampat ya kanakeman.' " 28Hinalità et ni Pablo, ya wana, "Hapa--eg ay labay kon matanda--an moyo ya hay kalibriyan ha kasalanan ya an-igwà nin Diyos ay impatandà ana ha tawtawoy alwan Hodiyo; hila ay manlengè." 29Hin nayari̇̀ baytin hinalità ni Pablo ay nog-alih baytoy kawkapariho nan Hodiyo ya masyadon ampididiskosyon. 30Ha lo--ob nin loway ta--on, hi Pablo ay napa-iri bayro ha siyodad nin Roma ha bali ya an-abangan na. Maliga yay ampananggap nin hinoman ya tawoy ampako konan manibaw. 31An-i-aral nay tongkol ha pamomo--on nin Diyos, boy an-itorò nay tongkol koni Pangino--on Hisokristo nin ma--in katapangan boy ayin ampakabawal kona.

will be added

X\