Acts 2

1Hin nalabah ya pitoy dominggo pa-ibat hin nabiyay oman hi Apo Hisos ay Pistan Pintikostis. Habayton allo ay nititipon ya kaganawan nin ampipantompel koni Apo Hisos. 2Ha pamititipon la ay biglà hilan nakalengè nin tonoy ya nangibat ha tag--ay langit ya bilang howeng nin makhaw ya angin. Kayà nahwengan ya kaganawan nin hatoy nititipon ya ampipampiknò bayro ha lo--ob bali. 3Hapa--eg, nakakit hila nin bilang dawdeket apoy ya ampandilot biha nangapihihiyay nin nagpalako ha balang miha konla. 4Hilay kaganawan ay napnò nin Ispirito nin Diyos, biha hila nipaghalità nin hari-hari̇̀ ya hawhalità ya agla angka-intindiyan ya impahalità konla nin Ispirito nin Diyos. 5Hin habayto, bayro ha siyodad nin Hirosalim ay ma--in ampa-iri ya Hawhodiyoy rawrilihyoso ya nika-ibat ha hari-hari̇̀ ya nasyon bayri ha babon lotà. Kayà alwa hila nin pariparihon halità. 6Hin nalengè nin hatoy rawrilihyosoy Hawhodiyo baytoy telek do ha bali ya ampititiponan nin hatoy ampipantompel ha Pangino--on ay nowayo hilan nako nin nakitipon bayro. Hila ay nipag-ispanta ta balang miha konla ay ampakalengè nin sarili lan halità ya anhalita--en nin hatoy ampipantompel ha Pangino--on. 7Banà ha pag-ispanta la ay nahalità lay ombayri: "Wari̇̀ alwan tawtaga Galiliya bayti? 8Pangno hila ampakapaghalità nin hawhalità nin balang miha kontamo? 9Bayri kontamo ay ma--in taga Partiya, ma--in taga Midya, ma--in taga Ilam, ma--in taga Misopotamya, ma--in taga bayri ha Hodiya, ma--in taga Kapadosya, ma--in taga Ponto, ma--in taga Asya, 10- 11ma--in taga Prigya, ma--in taga Pampilya, ma--in taga Ihipto, ma--in taga Sirini ha dogal nin Libya, ma--in taga Krita, ma--in taga Arabya, boy ma--in et ampakipa-iri ha siyodad nin Roma. Hay kanayon kontamo ay lipi̇̀ Hodiyo boy hay kanayon ay nag--in Hodiyo nin banà ha panhohomonol la ha kawkapanogo--an nin Hawhodiyo. Piro hila bayti ya tawtaga Galiliya ay ampipaghalità nin hawhalità tamo ya tongkol ha kapapa-ispantay gawgawà nin Diyos." 12Masyadoy pag-ispanta la; kayà hilahila ay ampipapastang. "Anya," wanla, "ya labay totolen nin habayti ya ampangyari?" 13Hay kanayon ay naghalità nin ma--in lamoy panginginsolto do ha tawtawoy ampipantompel, ya wanla, "Lawlahing ba--in." 14Hapa--eg, nireng hi Pidro kateng hatoy labimmihay alagad biha na impakakhaw ya bosis na nin naghalità, ya wana, "Hikawoy Kawkahodiyo ko boy hikawoy kaganawan ampa-iri bayri ha siyodad nin Hirosalim, pakaleng--en moyo boy paka-intindiyen moyon mahampat bayti ya halita--en ko. 15Alwan lahing bayti ya tawtawo nin bilang ombahen ha ola-lem moyo, ta alas nowibin bongat nin bayombokah. 16Habayti ya nangyari hapa--eg ay nagkapeteg baytoy holà hin hato ni propita Dyowil ya ombayri ya pagkahalità: 17'Ombayri ya gaw--en ko ha hoyot ya allo, wanan Diyos: Igwà koy Ispirito ko ha kaganawan tawo. Hay Halità ko ay ipahalità ko ha aw-anak moyoy lawlalaki boy ha aw-anak moyoy bawbabayi. Hay mangalagò ya lawlalaki ay makakit nin bawbagay ya ahè makit nin kanayon. Hay mangato--ay lawlalaki ay mipanaynep nin ipataynep ko konla. 18Ha allon habayto, hay Ispirito ko ay igwà ko ha lawlalaki boy bawbabayi ya ampagsirbi kongko, biha ko hila pahalita--en. 19Ipakit koy kapangyariyan ko ha panggawà kon pawpapag-ispantawan ha langit boy ha babon lotà, ta magkama--in dayà, apoy, boy makodpaw ya ahok. 20Hay allo ay domeglem boy hay bowan ay omorit nin bilang dayà, biha lomateng ya allon panonosga ko. Habayton allo, hiko ya Pangino--on ay ipakit koy kapangayariyan ko. 21Piro hinoman ya tawoy makirawat ha ngalan nin Pangino--on ay malibri.' " Habayti ya holà ni propita Dyowil hin hato. 22"Kayà hikawoy kawkapara kon Hodiyo," wana et ni Pidro, "leng--en moyo bayti! Hi Apo Hisos ya taga Nasarit ay inhogò nin Diyos. Napaptegan bayti ha panggawà ni Apo Hisos nin pawpapag-ispantawan boy pawpalatanda--an ya impagawà kona nin Diyos. Tandà moyo bayti ta nangyari bayri komoyo. 23Habayti ya tawo ya hi Apo Hisos ay pinayagan nin Diyos nin inggawà ha kapangyariyan moyo, ta talagan ombayroy plano na pa-ibat hin hato. Hikawoy nangigwà boy nangipapati koni Apo Hisos ha mangala--et ya tawtawo ya nangipakò kona ha koroh. 24Piro hi Apo Hisos ay biniyay oman nin Diyos boy pinalayà na ya ha kapangyariyan nin kamatyan, ta hay kamatyan ay ahè makapangyayari kona. 25Ombayri ya impahalità nin Diyos koni Ari̇̀ Dabid ya hinalità ni Apo Hisos: 'Pirmi kon angkakit ya Pangino--on ha dani ko. Hiya ay pirmin anti ha wanan ko; kayà ahè magoloy nakem ko. 26Maligay nakem ko boy angkatowà, ta maski nati anay nawini ko ay ma--in akon pag-asa. 27Hay kalolowa ko ay agmo pa-olayan manatili ha dogal nin nikati, boy agmo payagan mabolok ya nawini nin magsisirbi mo ya ayin kapintasan. 28Impakit mo kongko ya daan nin palako ha biyay ya ayin anggawan, boy banà ta hika ya kalamo ko ay masyadoy kaligawan ko.' 29"Pawpatel ko," wani Pidro, ' 'dapat kon ipalinaw komoyon mahampat ya tongkol koni Ari̇̀ Dabid ya ka-apo-apowan tamo. Nati ya biha intabon boy anggan hapa--eg ay angkakit tamoy tinabon na. 30Hi Ari̇̀ Dabid ay propita hin angkabiyay ya et. Tandà na ya impangakò kona nin Diyos ya miha ha i-alalak na ay mag--in ari̇̀ nin bilang kona. 31Na-intindiyan ni Ari̇̀ Dabid ya tongkol ha pangabiyay oman ni Kristo ya impangakò nin Diyos. Kayà hinalità na ya hi Kristo ay ahè manatilin nati, boy ahè mabolok ya nawini. 32Habayti hi Apo Hisos ay biniyay oman nin Diyos, boy hikayi ya kaganawan ay ampamapteg nin tongkol bayri. 33Hiya ay gintan ha tag--ay ha bandan wanan nin Diyos, boy tinanggap na ya Ispirito nin Diyos ya impangakò kona nin Tatay nay Diyos. Habayti ya angkakit moyo boy angkalengè moyo hapa--eg ay gawà nin Ispirito nin Diyos ya inggawà konnawen ni Apo Hisos. 34Hi Ari̇̀ Dabid ay ahè nako ha katatag-ayan ha kama-inan nin Diyos, piro hiya ya naghalità nin ombayri: 'Hinalità nin Pangino--on Diyos ha Pangino--on ko: Miknò ka ha bandan wanan ko 35anggan hay kawka-away mo ay talowen ko boy igwà ko hila ha hilong nin kapangyariyan mo.' 36"Kayà an-ipalinaw kon mahampat komoyon kaganawan Kahodiyo ko ya hi Apo Hisos ya impakò moyo ha koroh ay hiya ya ginawà nin Diyos nin Pangino--on boy hiya hi Kristo ya impangakò nin Diyos." 37Hin nalengè bayti nin tawtawo ay masyadon nagoloy nakem la. Kayà hinalità la koni Pidro boy ha kanayon ya aw-alagad, "Pawpatel, anya," wanla, "ya gaw--en nawen?" 38Tinombay konla hi Pidro, ya wana, "Balang miha komoyo ay maghehe boy pabinyag ha ngalan ni Pangino--on Hisokristo emen hay kawkasalanan moyo ay patawaren nin Diyos. Ha ombayro ay igwà komoyo nin Diyos ya Ispirito na. 39Hay impangakò nin Diyos ya Ispirito na ay para komoyo boy para ha aw-inalalak moyo kateng ha kaganawan tawoy anti ha mangarayò ya dawdogal. Talagan igwà nay Ispirito na ha hinoman ya tawoy tompel kona." 40Malakè ya hinalità ni Pidro ha panwawali na do ha tawtawo. Ha pamaki-ilgo na konla ay hinalità na ya ombayri: "Mag-atap kawo ha iparosa nin Diyos ha mangala--et ya tawtawo." 41Hapa--eg, malakè ya tawoy ninto--o ha hinalità ni Pidro; kayà napabinyag hila. Habayton allo ay mangatatlon libo katawo ya nipahan ha gropo nin ampipantompel ha Pangino--on. 42Habayti ya tawtawoy babayo tinompel ha Pangino--on ay pirmin ampakon manlengè nin an-itorò nin aw-alagad ni Apo Hisos. Mahampat ya pamakilamo la konla boy ampakitipon hila konla nin mangan tinapay ya ampamanemteman la nin pagkamati ni Apo Hisos. Ampakilamo hila et ha aw-alagad nin manalangin ha Diyos. 43Ha kapangyariyan nin Diyos ay malakè ya papag-ispantawan ya nangyari ya impagawà ha aw-alagad. Kayà kaganawan tawoy anti bayro ay masyadon nipag-ispanta. 44Lalò hinomene ya pamilalamo nin hatoy ampipantompel ha Pangino--on, boy nangapimimihay nakem lan pi-a-agemen ya kamama--in la ta gamiten nin balang miha konla ya manga-ilangan. 45An-ilakò lay kanayon ya kamama--in la, ta hay napaglako--an ay an-igwà la ha ampipanga-ilangan. 46Allo-allo, hay ampipantompel ha Pangino--on ay ampititipon ha bali nin Diyos. Maliga hilay ampangapimimiha nin makon mangan ha bawbinali. 47Pirmi lan amporiyen ya Diyos, boy an-igalang hila nin kaganawan tawo. Allo-allo ay ma--in ampipahan ha gropo la ya antompel ya an-ilibri nin Pangino--on.

will be added

X\