Acts 18

1Hapa--eg hi Pablo ay nog-alih bayro ha siyodad nin Atinas ta nako ya ha siyodad nin Korinto. 2Bayro na napagkabalay hi Akila ya mihay Hodiyo ya in-anak ha Ponto. Habayti hi Akila ay kapilateng nin na-ibat ha Italya kalamo nay ahawa na ya hi Prisila, ta pinalayas ni Ari̇̀ Sisar ya kaganawan Hodiyo ya ampa-iri bayro ha siyodad nin Roma. Hapa--eg, tinibaw ni Pablo hili Akila. 3Banà ta hi Pablo ay manggagawà nin tolda nin bilang ha anggaw--en nili Akila ay nakipa-iri ya konla boy nagtrabaho yan kalamo la. 4Hi Pablo, no allon pama-inawa nin Hawhodiyo ay ampako ha himba--an, ta ampalinawan nay Hawhodiyo kateng alwan Hawhodiyo emen hila tompel koni Apo Hisos. 5Hin nakalateng hi Silas boy hi Timotiyo ya na-ibat ha probinsyan Masidonya, hi Pablo ay ayin anan kanayon ya anggaw--en no alwan ampangi-aral nin Halità nin Diyos ha pamapteg na ha Hawhodiyo nin hi Apo Hisos ay talagan Kristo ya impangakò nin Diyos. 6Hin kinomontra hila koni Pablo, boy hin naghalità hila nin mangala--et ya bawbagay ya tongkol kona ay intiplag nay gabok ha dolo na biha na hinalità konla, "Kasalanan moyoyna," wana, "no mipalako kawo ha kaparosawan. Agmoyo koyna mahehe. Pa-ibat hapa--eg ay mako koynan manorò do ha alwan Hawhodiyo." 7Kayà inalihan hila ni Pablo ta nako yan napa-iri ha bali ni Tisiyo Hosto ha dani nin himba--an. Alwan Hodiyo hi Hosto piro antompel ya ha Diyos. 8Hi Krispo ya miha ha ampamo--on ha himba--an nin Hawhodiyo, kateng pamilya na ay tinompel koni Pangino--on Hisos. Malakè et ya tawo bayro ha siyodad nin Korinto ya nakalengè nin torò ni Pablo ay tinompel boy napabinyag. 9Mihay yabi, hi Pangino--on Hisos ay napakit koni Pablo boy naghalità kona, "Agka," wana, "malimo boy agmo itegen ya pangangaral mo, 10ta hiko ay anti komo. Kayà hinoman ya tawo ay ahè mamakakhit komo, ta malakè ya tawo bayri ha siyodad ya antompel kongko." 11Banà bayro ha hinalità ni Pangino--on Hisos, hi Pablo ay nanatili bayron lo--ob nin mihay ta--on boy kagitnà, ta ampangitorò ha tawtawo nin Halità nin Diyos. 12Piro hin hi Galyon ya gobirnador ha probinsyan Akaya, hay Hawhodiyo ay nangapisosondò nin komontra koni Pablo. Kayà dinakep la ya, biha la ya gintan nin in-arap ha hosgado. 13"Habayti ya tawo," wanla, "ay ampanorò ha tawtawo nin homamba ha Diyos ha kanayon ya paraan ya kontra ha layih nawen." 14Maghalità dayi hi Pablo, piro na-onawan ya ni Galyon nin naghalità ha Hawhodiyo, ya wana, "No hay kaso nin haba--in ya tawo ya gintan moyo kongko ay panggawà nin masyadoy kala-etan ay leng--en katawo; 15piro banà ta hay riklamo moyo ay tongkol ha labay totolen nin hawhalità, ngawngalan nin tawtawo, boy sarili moyon layih ay hikawoy ba-alà mangariglo nin haba--in ta agko labay manosga nin ombahen ya bawbagay." 16Hapa--eg, hila ay pina-alih na do ha panosgawan. 17Hi Sostinis ya miha ha ampamo--on do ha himba--an nin Hawhodiyo ay dinakep nin tawtawoy alwan Hodiyo, ta binogbog la ha arapan nin hosgado. Maski angkakit ni Galyon baytoy anggaw--en la ay ampa-olayan na hila. 18Hi Pablo ay nanatili bayro ha siyodad nin Korinto nin ongnoy pana--on. Hapa--eg, napatawo ya ha pawpatel ha Pangino--on bayro biha ya nanigè ya hay kalamo na ay hi Prisila boy hi Akila. Hin ni-abot hila ha banowan Singkriya ay napa-orog hi Pablo, palatanda--an nin natopad anay pangakò na ha Diyos. Hapa--eg, hinomakay hila ha barko nin magpalako ha probinsyan Sirya. 19Hin ni-abot hila ha siyodad nin Ipiso, hi Akila boy hi Prisila ay imbalag ni Pablo, ta nako ya ha himba--an nin Hawhodiyo nin nakipalinaw ha tawtawo bayro. 20Pinaki-ilgowan la hi Pablo nin maboyot ya pon bayro konla, piro agya pinomayag; 21no alwan napatawo ya konla boy hinalità na ya ombayri: "No kalabayan nin Diyos," wana, "ay magbira ko bayri." Hapa--eg hi Pablo ay hinomakay ha barko nin nog-alih ha siyodad nin Ipiso. 22Hin ni-abot ya ha siyodad nin Sisarya ay nako ya ha siyodad nin Hirosalim, ta tinibaw nay gropon mangama--in katetpel ha Pangino--on bayro; biha ya nagpalako ha siyodad nin Antiyokiya ha probinsyan Sirya. 23Nalabah ya ongnoy pana--on nin impanatili na bayro, hiya ay nagpalakoyna et ha probinsyan Galasya boy ha probinsyan Prigya. Bayro ay ampakhawen nay pantotompel nin kaganawan antompel ha Pangino--on. 24Ma--in mihay Hodiyo ya nagngalan Apolos ya nako ha siyodad nin Ipiso. Hiya ay taga Alihandriya ya angkasakopan nin nasyon Ihipto. Hi Apolos ay magaling maghalità boy angka-intindiyan nan mahampat ya Kaholatan nin Diyos. 25Hay tongkol ha biyay ni Apo Hisos ay intorò kona; kayà leseb ya nakem na nin mangi-aral boy mangitorò nin tongkol koni Apo Hisos maski hay natanda--an nan bongat ay tawtorò ya tongkol ha pamiminyag ni Howan. 26Nilomo--ob hi Apolos ha himba--an nin Hawhodiyo boy makhaw ya nakem nan manorò bayro. Hin nalengè ya ni Prisila boy Akila ay hinagyat la yan mako ha bali la, ta tinoro--an la yan malakè ya bagay ya tongkol koni Apo Hisos ya agna et tandà. 27Hapa--eg, labay ni Apolos nin mako ha probinsyan Akaya; kayà hatoy ampipantompel ha Pangino--on bayro ha Ipiso ay nanambay kona nin nanolat ha pawpatel la ha Pangino--on ya ampa-iri ha probinsyan Akaya emen mahampat ya panananggap la koni Apolos. Hin ni-abot hi Apolos bayro ha probinsyan Akaya, hay ampipantompel ha Pangino--on nin banà ha kahampatan ingangalo nin Diyos ay malhay ya na-itambay na konla. 28Ha arapan nin tawtawo, hi Apolos ay diniskosyon nin Hawhodiyo, piro ha kagalingan na ay ayin hila nin magawà kona. Ha pangibaha na konla nin Kaholatan nin Diyos ay pinaptegan na ya hi Apo Hisos ay talagan hi Kristo ya impangakò nin Diyos.

will be added

X\