2 TIMOTIYO 1

1Hiko hi Pablo ya hogò ni Pangino--on Hisokristo nin banà ha kalabayan nin Diyos. Inhogò na ko nin mangi-aral nin tongkol ha biyay ya impangakò nin Diyos ha tawtawo ya ma--in pamakilamo koni Pangino--on Hisokristo. 2Timotiyo, hika ya anlabiyen ko nin bilang sarili kon anak ay anholatan ko. Hay Tatay ya Diyos boy hi Pangino--on tamon Hisokristo ay mangingangalo dayi komo nin mambin kahampatan boy katinekan. 3Allo yabi ay pirmi katan an-ipanalangin boy hika ay ampasalamatan ko ha Diyos ya ampagsirbiyan ko nin malinis ya nakem nin bilang pagsisirbi hin hato nin kawka-apo-apowan ko. 4Angkapanemteman ko ya hin nihiyay ta ay nantolò ya lowà mo banà ha kalele--an mo. Kayà talagan labay katayna dayi nin makit emen ako mapnò nin kaligawan. 5Angkapanemteman ko et ya katibolosan nin pantotompel mo ha Diyos, hatoy ombayro ha pantotompel ni Loyda ya papò mo boy hi Iyonis ya nanay mo. Angkasigoro ko ya hay pantotompel mo ay ombayro ha pantotompel la. 6Kayà an-ibibilin ko komo hapa--eg ya lalò mon pakhawen ya kakayawan ya inggawà komo nin Diyos hin impababo ko komo ya gamet ko nin nangipanalangin komo. 7Hay pangigwà kontamo nin Diyos nin Ispirito na ay alwan para tomalaw tamo, no alwan emen homkaw ya nakem tamo, magkama--in tamo nin panlalabi, boy emen tamo mapendanan ya sarili tamo. 8Agmo ikareng--ey ya pamapteg mo nin tongkol ha Pangino--on tamo. Agmo simpri ikareng--ey ya hiko ay impiriso nin banà ha panonorò ko nin tongkol koni Pangino--on Hisokristo, no alwan ha kapangyariyan nin Diyos ay makimiha ka kongko nin magdanas nin kadya-dya--an nin banà ha Mahampat ya Balità. 9Inlibri na tamo boy iningat emen tamo mag--in malinis, hatoy ayin kapintasan. Ginawà na bayti, alwan banà ha anyaman ya nagawà tamo, no alwan banà ta talagan da--an naynan plano bayti boy banà ha kahampatan pangingangalo na. Hin ahè et pinalsa nin Diyos bayti ya babon lotà, hay Diyos ay nangingangalo kontamo nin nambin kahampatan nin banà koni Pangino--on Hisokristo. 10Hapa--eg bongat nin impatnag nin Diyos bayti ya da--an plano na hin hi Pangino--on Hisokristo ya Mapangilibri kontamo ay nako bayri ha babon lotà. Hay Mahampat ya Balità ya hi Pangino--on Hisokristo ay nati biha nabiyay oman ay habaytoy pinamatalo na nin kapangyariyan nin kamatyan boy pagkabolok nin nawini, ta nagkama--in nin biyay ya ayin kamatyan. 11Pinili̇̀ ako nin Diyos nin mag--in nan mangangaral, hogò, boy mangitorò nin habayti ya Mahampat ya Balità. 12Kayà ampagte-ehan ko ya hiko ay anti bayri nin nakapiriso. Agko angkareng--ey ta tandà ko no hino ya anteplan ko, boy angkasigoro ko ya hay impahimalà ko kona ay magawà nan i-atap angga ha allon magbira hi Pangino--on Hisokristo. 13Hay kaptegan ya intorò ko komo ay pangoligtanan mo. Banà ha pamakilamo mo koni Pangino--on Hisokristo ay panatiliyen mo ya pantotompel mo boy panlalabi mo kona. 14Ha panggogomawà nin Ispirito nin Diyos ya ampa-iri ha nakem tamo ay agmo pa-olayan ya kaptegan ya impahimalà komo. 15Tandà mo ya pina-olayan ako nin kaganawan ampipantompel ha Pangino--on do ha probinsyan Asya. Kateng hi Pigilo boy hi Hirmohinis ay nama-olay kongko. 16Hiko ay pinaligha ni Onisiporo; kayà hay pamilya na ay ingalowan dayi nin Pangino--on. Agna an-ikareng--ey ya pagkapiriso ko, 17no alwan hin ni-abot ya ha siyodad nin Roma ay agna ko tinegnan tinikap anggan agna ko nakit. 18Tandà mo no pangno kahampat ya ginawà na kongko hin anti ko ha siyodad nin Ipiso. Hay Pangino--on ay mangingangalo dayi kona ha allon magbira hi Pangino--on Hisokristo.

will be added

X\