2 KORINTO 7

1Anlabiyen kon pawpatel, banà bayri ha impangakò kontamo nin Diyos ay alihen tamoy kaganawan gawà ya ikaremek nin ihip tamo boy nakem tamo. Sikapen tamon gomalang ha Diyos nin mamiyay nin ayin kapintasan. 2Biyan moyo kayi itaman dogal ha nakem moyo ta maski hino komoyo ay agnawen ginaw--an nin kala-etan, agnawen hinira--an, ni binintahiyan. 3Agko anhalita--en bayti para hosgawan katawo, ta hinalità koyna komoyo ya hikawo ay pirmi ha nakem ko, boy kalamo katawo ha biyay o ha kamatyan. 4Masyadoy pamahimalà ko komoyo boy masyadoy pangipagmalhay ko komoyo. Ha kaganawan andanasen koy ka-irapan, hiko hapa--eg ay angkahahaliwa boy hay nakem ko ay pono-ponò nin kaligawan banà do ha nabalita--an ko ya tongkol komoyo. 5Maski hin ni-abot kayi ha probinsyan Masidonya ay agkayi mapalagay, ta maski ayri kayi magpeyeh ay ma--in ampamadya--dyà boy ampipanggolo konnawen, boy angkahlak kayi nin banà komoyo. 6Piro Diyos ya ahè ampama-olay ha ampikalelè ay nanahaliwa konnawen ha panlomateng ni Titò. 7Alwan bongat panlomateng na ya nakahahaliwa konnawen, no alwan kateng hatoy imbalità na konnawen ya pamakhaw nin nakem moyo kona. Hinalità na konnawen ya angkalengew kawo kongko boy an-ikalelè moyo ya nagawà moyoy kasalanan boy no pangno moyo ko an-imalasakit. Banà bayri ay lalò akon angkatowà. 8Maski nakablò nin nakem moyo baytoy inholat ko komoyo ay agko ampaghehean. Balè pinaghehean ko pon hin nakit koy nablò ya nakem moyo maski kadodomali̇̀ bongat. 9Hapa--eg ay angkatowà ako; alwan banà ta nablò ya nakem moyo, no alwan banà ha kalele--an moyo ya ginamit komoyo nin Diyos emen moyo paghehean boy halibokotan ya kawkasalanan. Habaytoy hinalità ko komoyo ay ahè nakala--et komoyo. 10Hay ma-ibonga nin kalele--an ha panggogomawà nin Diyos ay paghehehe ya ampakagtan ha kalibriyan ha kasalanan. Hay ombayro ay ahè mapaghehean. Piro hay tawtawoy ahè ampipanhomonol ha Diyos, hay kalele--an la ay makapipalako konla ha kaparosawan ya ayin angga banà ha agla paghehe. 11Helken moyo no anyay nagawà komoyo nin habaytoy kalele--an ya ginawà komoyo nin Diyos. Lalò kawon nagsikap boy pinagmalasakitan moyo nin impakit ya hikawo ay ayin kasalanan tongkol ha bagay ya habayto. Angka-inakitan moyoy sarili moyo banà bayro ha nangyari. Nalimo kawo ta andap moyo no parosawan kawo. Angkahabekan moyo ya mapakonsowilo moyo ko ha panlomateng ko. Nagkama--in kawo et kalabayan nin alihen baytoy kasalanan. Ha kaganawan paraan ay an-ipakit moyo ya agmoyo labay baytoy kasalanan nin habaytoy kalamowan moyo. 12Hay bara--nan nin panolat ko komoyon habayto ay alwan bongat banà do ha tawoy nagkasalanan o do ha pinanggaw--an nan kasalanan, no alwan labay kon ipatandà komoyo ya ha tegteg nin Diyos ay talagan ma--in kawon malasakit konnawen. 13Hay ginawà moyo ay nakahahaliwa konnawen. Alwan bongat nin habayto no alwan hay nakapaliga et konnawen ay hay ginawà moyo koni Titò hin anti ya bahen komoyo ta nagkama--in katinekan ha nakem na. 14Impagmalhay katawo kona boy agko itaman nipareng--ey. Pirmin kaptegan ya anhalita--en nawen komoyo. Ombayro itaman, kaganawan hinalità koy tongkol komoyo ay napaptegan ni Titò. 15Mintras an-ihipen na ya hikawo ay maronong homonol ay lalò kawon angkapalabi kona. Agna angkaliwawan ya kahampatan nin panananggap moyo boy pangigalang moyo kona. 16Angkatowà ako ta talagan mapahimala--an katawo.

will be added

X\