1 TIMOTIYO 1

1Hiko hi Pablo ay hogò ni Pangino--on Hisokristo. Nag--in akon hogò na nin banà ha manda nin Diyos ya Mapangilibri kontamo boy hi Pangino--on Hisokristo ya pag-asa tamo. 2Hika Timotiyo ya bilang kon sarilin anak nin banà ha pantotompel mo ha Diyos ay anholatan ko. Hay Tatay ya Diyos boy hi Pangino--on tamon Hisokristo ay mangingangalo dayi komo nin mambin kahampatan boy katinekan. 3Hin ampibowat akon mako ha probinsyan Masidonya ay binibilinan kata. Hapa--eg ayanhalita--en kon oman komo ya manatili ka bahen ha siyodad nin Ipiso ta ha-aren mo baytoy ongnoy ampipangitorò nin kabongkokan. 4Halita--en mo konla ya alihen layna ya ka-iligan la ha aw-istorya ya pinigawa-gawà bongat, boy agla sayangen ya pana--on la ha lawlistawan ya tongkol ha kawka-apo-apowan la ya pinangibatan la. Habayto ay pangibatan bongat nin pamikokolpya, boy ahè makatambay ha ikakhaw nin pantotompel ha Diyos. 5Hay bara--nan no antà ha-aren hila ay emen hila magkama--in nin panlalabi ya gawà nin malinis boy mahampat ya nakem boy peteg ya katetpel. 6Hay kanayon ya tawtawo ay ahè anhomonol bayri; kayà hapa--eg ay ampididiskosyonan lay bawbagay ya ayin kowinta. 7Labay la nin hila ya mangitorò nin kawkapanogo--an ya inggawà nin Diyos koni Moysis, piro mismon hila ay ahè ampaka-intindi nin anhalita--en la o bawbagay ya anhalita--en la nin talagan peteg. 8Tandà tamo ya hay kawkapanogo--an nin Diyos ay mahampat no tamà ya panggamit. 9Dapat tamo et ihipen ya hay kawkapanogo--an ay inggawà nin alwan para ha tawtawoy mangahampat no alwan para ha mangala--et boy ampipanhomombalang, para ha ahè anggomalang ha Diyos boy para ha mawmakasalanan, para ha ahè malabay ha kalinisan boy ha kahampatan, para ha mawmapamati nin tatay boy nanay, para ha mapamati nin tawtawo, 10para et ha mawmamabayi boy ha mawmamakilalaki, para ha lalaki boy babayi ya ampakilamo nin bilang ahawa ha kapariho la, para ha ampipanakaw nin kapara lan tawo, para ha mangabongkok boy ha ampipamapteg nin kabongkokan ha hosgado, boy para ha ahè ampipantompel ha peteg ya torò ya tongkol ha Diyos. 11Habayti ya peteg ya torò ya kompormi ha ahè makwan ihipen ya Mahampat ya Balità nin pinakamahampat ya Diyos ay impahimalà kongko nin Diyos. 12Ampasalamat ako koni Pangino--on tamon Hisokristo ya ampambi kongko nin kakhawan emen ko magawà ya impahimalà na kongko. Pinilì na ko nin magsirbi kona. Intoring na nin hiko ay mapahimala--an 13maski anla-eten ko ya hin hato, boy ampadya-dya--an koy ampipantompel kona, boy an-i-insoltowen ko ya. Maski ombayroy ginawà ko ay iningalowan ako nin Diyos ta andap ko no tamà baytoy anggaw--en ko hin agko et antompel kona. 14Labis ya kahampatan nin pangingangalo kongko nin Pangino--on, ta hiko ay binyan na nin katetpel boy panlalabi ya ampangibat koni Pangino--on Hisokristo. 15Peteg bayti ya ombayri ya pagkahalità boy dapat pangoligtanan nin kaganawan tawo: hi Pangino--on Hisokristo ay nako bayri ha babon lotà nin mangilibri nin mawmakasalanan. Hiko ya pinakamala--et ha kaganawan. 16Ombayro man, hiko ay iningalowan nin Diyos emen hay lobos ya kapasinsyawan ni Pangino--on Hisokristo ay makit kongko. Ha ombayro, hiko ya pinakamala--et ay mag--in alimbawà ha mipantompel kona emen hila magkama--in nin biyay ya ayin anggawan ya bilang biyay nin Diyos. 17Parangalan boy poriyen ya Diyos nin anggan makakanoman. Hiya ya Arì ya ayin anggawan boy ayin kamatyan. Hiya simpri ya mimihay Diyos boy ahè angkakit. Amin. 18Anak kon Timotiyo, an-ipambilin ko komo ya hay pantotompel mo ay ipaglaban mo nin mahampat kompormi ha holà hin hato ya tongkol komo. 19Hay pantotompel mo boy kalinisan nin nakem mo ay panatiliyen mo. Ma--in tawtawoy ahè malabay ha ombayro; kayà hay pantotompel la ay hinirà la. 20Hi Himiniyo boy hi Alihandro ay kabilang ana ha ombayroy tawtawo. Kayà impa-olay ko hila koni Satanas emen hila mategen maghalità nin kontra ha Diyos.

will be added

X\