1 TISALONIKA 5

1Pawpatel, alwa nawen anan ka-ilangan iholat komoyo no makano boy no pangno mangyari bayti, 2ta talagan tandà moyoyna ya hay panlomateng nin Pangino--on ay bilang ha mananakaw ya ahè an-asawan no makanon yabi ya biglà yan lomateng nin manakaw. 3No an-ipalagay nin tawtawo nin ayin anan kagolowan boy ayin anan kakalimowan ay biglà lomateng konla ya kaparosawan nin bilang pangyayari ha babayi ya naboktot ya ampananam pon nin ilab biha manganak. Hay tawtawoy ombayro ay ahè makalibri ha kaparosawan. 4Piro hikawo, pawpatel ko ay alwan bilang ha tawtawoy anti ha kowinta karegleman nin banà ha panggawà nin kala-etan. Kayà hay panlomateng nin Pangino--on ya bilang ha panlomateng nin mananakaw ay alwan biglà para komoyo. 5Hikawoy kaganawan ay anti ha kahawangan nin bilang ha hawang nin allo, ta hikawo ay aw-anak nin Diyos. Ayin tamo ha karegleman nin bilang ha deglem nin yabi, ta ayin ana ya ka-iligan tamo nin gomawà nin kala-etan. 6Kayà agtamo magkakatoloyan nin bilang ha kanayon, no alwan mag--in tamon pirmin handà boy magpendan ha sarili. 7Hay yabi ay oras pangatoloy boy oras paglahing nin mawmamiminom alak. 8Piro hitamoy anti ha kahawangan nin bilang ha hawang nin allo ay pendanan tamo ya sarili tamo. Lalò tamon tompel ha Diyos boy lalò tamon manlabi, ta habaytoy kowinta protiksyon nin nebneb tamo. Hay kowinta protiksyon itaman nin olo tamo ay hay pag-asa tamo ha kalibriyan ha kasalanan, hatoy kalibriyan ya an-asawan tamo ha Diyos. 9Hitamo ay ahè pinilì nin Diyos para parosawan, no alwan hay pamilì na kontamo ay emen tamo ilibri ni Pangino--on Hisokristo. 10Nati ya nin banà kontamo emen maskin nati tamoyna o angkabiyay tamo et lano ha lomateng ya ay makilamo tamo kona. 11Kayà mipapakhaw kawon nakem boy mitatambay kawo nin bilang ombahen ha anggaw--en moyoyna. 12Pawpatel, andawaten nawen komoyo ya igalang moyoy ampipama-alà komoyon ampipantompel ha Pangino--on, ta hila ay pinilì nin Diyos nin manambay boy manorò komoyo. 13Hila ay pakalabiyen moyo boy galangen nin mahampat ta ampagtrabaho hila nin para komoyo. Milalamo kawo nin ma--in katinekan. 14Pawpatel,andawaten nawen komoyo yapanoro--an moyoy mangatamlad. Hay ampikahlak ay hahaliwawen moyo, hay mangakapey ya pantotompel ay pakhawen moyo, boy pakapasinsya kawo ha kaganawan tawo. 15Agmoyo gantiyan nin mala--et ya ampanggawà komoyo nin kala-etan, boy hay kanayon ay agmoyo payagan nin gomawà nin ombayro, no alwan hay pirmi moyon gaw--en ay ikahampat nin miha ta miha boy ha maski hino. 16Pirmi kawo nin pakaliga. 17Pirmi kawo nin manalangin. 18Ha kaganawan ampangyari komoyo ay magpasalamat kawo ta hay ampangyari komoyo ay kalabayan nin Diyos banà ha pamakilamo moyo koni Pangino--on Hisokristo. 19Agkawo gomawà nin anyaman ya makapategen nin panggogomawà nin Ispirito nin Diyos ha nakem moyo. 20Agmoyo ipag-ayin ba-alà ya pangangaral nin Halità nin Diyos, 21no alwan sori--en moyo ya kaganawan ta hay mahampat ay ipalaman moyo ha nakem moyo. 22Atapan moyo ya kaganawan gawà ya mala--et. 23Dayi hay Diyos mismo ya ampangibatan nin katinekan ay gaw--en na kawo nin lobos nin malinis, hatoy ayin kala-etan. Hay ispirito moyo, kalolowa, boy nawini moyo ay panatiliyen na dayin mahampat, hatoy ayin kapintasan anggan magbira hi Pangino--on tamon Hisokristo. 24Tapat ya Diyos ya nangingat komoyo; kayà ombayroy gaw--en na komoyo. 25Pawpatel nawen, ipanalangin moyo kayi. 26Ha pamipipikit moyo ay ikomosta moyo kayi nin ma--in panlalabi ha kaganawan patel bahen. 27Pawpatel, ha ngalan nin Pangino--on ay andawaten ko komoyo ya habayti ya holat ay ibaha moyo ha kaganawan patel ha Pangino--on bahen. 28Hi Pangino--on tamon Hisokristo ay mangingangalo dayin mambi nin kahampatan komoyo.

will be added

X\