1 PIDRO 4

1Hapa--eg banà ta nagdanas kadya-dya--an hi Pangino--on Hisokristo ay dapat tamo itaman ihandà ya sarili tamo ha pagdanas nin kadya-dya--an, ta no magdanas tamo nin kadya-dya--an nin banà ha pamakilamo tamo koni Pangino--on Hisokristo ay mategen tamon manggawà kasalanan. 2Banà bayro ha pagdanas tamo nin kadya-dya--an, pa-ibat hapa--eg ay anhonolen tamo ya kalabayan nin Diyos, alwanmala--et ya kalabayan nin nawini tamo. 3Tamà ana baytoy ginawà moyo hin hato ya bilang ombayro ha labay gaw--en nin ahè ampipantompel ha Diyos. Ampanggawà kawon manga-alay ya gawgawà boy mala--et ya kalabayan nin nawini; ampaglahing kawo boy ampakilahing. Anhomamba kawo et ha alwan peteg diyos ya alwan nararapat hambawan. 4Hapa--eg hay ahè ampipantompel ha Diyos ay ampipag-ispanta ta agkawoyna ampakilamo konlan manggawà nin sobray kawkala-etan nin bilang ha anggaw--en la; kayà ampaghalita--an la kawon mala--et. 5Piro lano ay omarap hila ha Diyos ya manosga ha kaganawan tawoy angkabiyay kateng ha nikati. Balang ginawà la ay tobayen la ha Diyos. 6Kayà hin angkabiyay et ya nikati ay in-aral konlay Mahampat ya Balità nin Diyos, ta hapa--eg maski nati ana ya nawini la ya ampangyari ha kaganawan tawo ay angkabiyay ya kalolowa la nin bilang ha Diyos ya angkabiyay. 7Hay kalampohan nin kaganawan bagay ay maranina. Kayà agkawo mataranta boy pendanan moyo ya sarili moyo emen kawo makapanalangin. 8Igit ha kaganawan, milalabi kawon mahampat, ta no ampanlabi kawo, hikawo ay ampamatawad. 9Pakaligha kawon mananggap ha makihandà komoyo. 10No pangnoy inggawà nin Diyos ha balang miha kontamo ya kakayawan ay gamiten tamo ha ikahampat nin miha ta miha, ta hay hari-harì ya kakayawan ay impahimalà kontamo nin Diyos. 11Hinoman kontamo ya ampangaral ay dapat mangi-aral nin Halità nin Diyos; hinoman kontamo ya ampagsirbi ay dapat magsirbi nin ma--in kakhawan ya inggawà kona nin Diyos emen ha kaganawan bagay, ha pagsisirbi na ay mapori ya Diyos banà ha ginawà ni Pangino--on Hisokristo. Anti konay kaporiyan boy kapangyariyan anggan makakanoman. Amin. 12Anlabiyen kon pawpatel, agkawo mag-ispanta ha masyadoy kadya-dya--an nin panobok ya andanasen moyo, ta habayti ay talagan ampangyari ha ampipantompel koni Pangino--on Hisokristo. 13Hay gaw--en moyo ay magtowà kawo, ta banà bayri ha panobok ya andanasen moyo ay ampakapakiramay kawo ha pag-irap ni Pangino--on Hisokristo. Ha ombayro, lano ha lomateng ya ay magkama--in kawon masyadoy kaligawan pamakakit moyon kagandawan na. 14No an-insoltowen kawo nin banà ha pamakilamo moyo koni Pangino--on Hisokristo ay makalmà kawo, ta hay labay totolen nin habayto ay anti komoyoy Makapangyariyan ya Ispirito ya Ispirito nin Diyos. 15Alwan dapat nin hay pagdanas moyon kadya-dya--an ay banà ha pamati nin tawo, pananakaw, panggawà kala-etan, o pamaki-emen ha biyay nin ma--in biyay. 16Piro no magdanas kawon kadya-dya--an nin banà ha pamakilamo moyo koni Pangino--on Hisokristo ay agmoyo ikareng--ey, no alwan poriyen moyoy Diyos ha pamahimalà moyo ha ngalan ni Pangino--on Hisokristo. 17Nilomateng anay pana--on nin panonosga nin Diyos; habayti ay mag-ompisa pon ha ampipantompel kona. No hosgawan tamo man maski anhomonol tamo koni Pangino--on Hisokristo ay anya kalì ya mangyari ha tawtawoy ahè tinompel ha Mahampat ya Balità nin Diyos? 18Ombayri ya nakaholat ha Halità nin Diyos: "No hay tawtawoy nag--in mahampat nin banà ha pantotompel la ha Diyos ay ma-irap et makalibri, anyay mangyari ha mawmangala--et boy mawmakasalanan?" 19Kayà no ampagdanas kawo nin kadya-dya--an kompormi ha kalabayan nin Diyos ay isigi moyoy panggawà nin kahampatan boy ipahimalà moyoy sarili moyo ha Diyos ya namalsa komoyo ta agna kawo pa-olayan.

will be added

X\