1 HOWAN 5

1Peteg nin hika ay anak nin Diyos no ampinto--o ka nin hi Apo Hisos ay hi Kristo ya impangakò nin Diyos. Hinoman ya ampanlabi ha mawmato-antawo ya ma--in anak ay anlabiyen na simpri ya anak nin hatoy mawmato-antawo. 2Ombayro itaman kontamo. No anlabiyen tamo ya Diyos boy no anhonolen tamo ya pawpanogò na ay anlabiyen tamo ya aw-anak nin Diyos. 3Ombayri ya panlalabi tamo ha Diyos: honolen tamo ya pawpanogò na. Hay pawpanogò na ya an-ipahonol na kontamo ay alwan ma-irap honolen. 4Hinoman ya nag--in anak nin Diyos ay angkapatalo nay mawmangala--et bayri ha babon lotà. Angkapatalo nay mawmangala--et bayri ha babon lotà ta hiya ay ma--in pantotompel ha Diyos. 5Hinoy makapatalo nin mawmangala--et bayri ha babon lotà? Hay makapatalo nin mawmangala--et bayri ha babon lotà ay tawoy ampinto--o nin hi Apo Hisos ay Anak nin Diyos. 6Hi Pangino--on Hisoskristo ay nako bayri ha babon lotà. Bininyagan ya ha lanom boy nantolò ya dayà na biha ya nati. Agya nako bayri nin pabinyag bongat no alwan nako ya bayri emen mantolò ya dayà na boy emen ya mati. Ispirito nin Diyos ya ampamapteg nin habayti, ta hay Ispirito nin Diyos ay kaptegan. 7Ma--in tatlo ya ampamapteg: 8Ispirito nin Diyos, pamiminyag koni Apo Hisos ha lanom, boy dayà nay nantolò. Habayti ya tatlo ay mimihay ampaptegan la ya hi Pangino--on Hisos ay Anak nin Diyos. 9No antanggapen tamo ya pamapteg nin tawo ay lalò tamon tanggapen ya pamapteg nin Diyos, ta hay inggawà nin Diyos ya pamapteg ay tongkol ha Anak na. 10Hinoman ya antompel ha Anak nin Diyos ay ampakasigoro ya ha nakem na ya hay kaptegan ay anti kona. Piro hay ahè antompel ha Anak nin Diyos ay anggaw--en nan mabongkok ya Diyos, ta hay inggawà nin Diyos ya pamapteg ya tongkol ha Anak na ay agna ampinto-owen. 11Hay pamapteg nin Diyos ay ombayri: hay biyay ya ayin anggawan ay inggawà na kontamo. Habayti ya biyay ya ayin anggawan ay nangibat koni Pangino--on Hisos ya Anak nin Diyos. 12Hay tawoy antompel ha Anak nin Diyos ay ma--in biyay ya ayin anggawan; piro hay tawoy ahè antompel ha Anak nin Diyos ay ahè magkama--in nin biyay ya ayin anggawan. 13Habayti ay inholat ko komoyon ampipantompel ha ngalan nin Anak nin Diyos emen moyomatanda--an ya hikawo ay ma--in anan biyay ya ayin anggawan. 14Agtamo mag-alangan nin pakarani ha Diyos ta anyaman ya dawaten tamo kona nin kompormi ha kalabayan na ay angkasigoro tamo nin leng--en na tamo. 15No tandà tamo ya anleng--en nin Diyos ya andawaten tamo kona ay angkasigoro tamo ya hay andawaten tamo ay an-igwà na kontamo. 16No makakit tamo nin patel tamo ya ampanggawà nin kasalanan ya ahè makapipalako kona ha impirno ay ipakirawat tamo ya emen ya mipabira ha Diyos. Piro no ma--in talagan labaylabay manggawà nin kala-etan ay agtamo yayna ipakirawat ha Diyos. Hay kasalanan ya anggaw--en na ay habaytoy makapipalako kona ha impirno. 17Kaganawan gawà ya alwan mahampat ay kasalanan, piro ma--in kasalanan ya ahè makapipalako ha impirno. 18Tandà tamo ya hinoman ya anak nin Diyos ay ahè ansomigi nin manggawà kasalanan, ta hay ampangi-atap kona ay hi Apo Hisos ya Anak nin Diyos. Kayà hi Satanas ay ahè makapangno ha anak nin Diyos. 19Tandà tamo ya hitamo ay anak nin Diyos. Piro kaganawan tawoy ampangihip bongat nin bawbagay bayri ha babon lotà ay anti ha hilong kapangyariyan ni Satanas. 20Tandà tamo ya hi Apo Hisos ya Anak nin Diyos ay nako bayri ha babon lotà nin nambin pangingintindi kontamo emen tamo mabalayan ya peteg ya Diyos. Hay Diyos ay anti ha nakem tamo, ta anti tamo ha Anak na ya hi Pangino--on Hisokristo. Hay peteg ya Diyos ya nambi kontamo nin biyay ya ayin anggawan. 21Aw-anak ko, agkawo homamba ha alwan peteg diyos.

will be added

X\