1 HOWAN 2

1Aw-anak ko, habayti ya bawbagay ay inholat ko komoyo emen agkawo magkasalanan. Piro no ma--in makapagkasalanan ay ma--in mangipaki-i-ingalo kontamo ha Tatay tamoy Diyos. Hiya ay hiPangino--on Hisokristo ya pinakamahampat, 2boy hiya ya nangakò nin kasalanan tamo, alwan bongat kasalanan tamo no alwan kasalanan nin kaganawan tawo. 3Masigoro tamo ya talagan ambomalay tamo ha Diyos no anhonolen tamo ya pawpanogò na. 4Hay tawoy ampaghalità nin ambomalay ya ha Diyos, piro agna anhonolen ya pawpanogò nin Diyos ay mabongkok boy hay kaptegan ay ayin kona. 5Piro hinoman ya anhomonol ha Halità nin Diyos ay angkakit konay lobos ya panlalabi ha Diyos. Ha ombayri ay angkatanda--an tamo ya hitamo ay ma--in pamakilamo ha Diyos. 6Hay tawoy ampaghalità nin ma--in yan pamakilamo koni Pangino--on Hisokristo ay ka-ilangan gaw--en nay kahampatan nin bilang ha ginawà ni Pangino--on Hisokristo. 7Anlabiyen kon pawpatel, ayin akon an-iholat komoyo ya bayoy panogò no alwan hatoy da--an et ya panogò. Nalengè moyoyna bayti hin babayo kawo tinompel ha Pangino--on. 8Habayti ya panogò ya an-iholat ko komoyo ay pirmi et bayo. Hay kaptegan nin habayti ay nakit koni Apo Hisos boy angkakit simpri komoyo. Hay karegleman ay na-alih ana komoyo, ta hay ampakahawang ana komoyo ay peteg ya hawang ya ayin kanayon no alwan hi Apo Hisos. 9Hinoman ya ampaghalità nin hiya ay anti ha kahawangan, piro ma-inakit ya ha patel na ay anti ya et ha karegleman. 10Hay tawoy ampanlabi nin patel na ay ampanatili ha kahawangan boy ampag-atap makagawà nin kala-etan ya mag--in bara--nan nin ikapagkasalanan. 11Piro hay tawoy ma-inakit ha patel na ay anti ha karegleman boy ampanatili ya et bayro ta agna tandà ya lakwen na. Hiya ay bilang ha tawoy bowag ta hay pagnanakem na ay binowag nin karegleman. 12Aw-anak, an-iholat ko bayti komoyo banà ta pinatawad kawoyna ha kawkasalanan moyo alang-alang koni Apo Hisos. 13Anholatan katawoy tawtatay ta hikawoy magtandà nin habayti ya ayin pinangibatan ya pa-ibat hin ibat, hiya ay hiyayna. Hikawo man ya lawlalaki ya mangalagò ay anholatan ko itaman banà ta hi Satanas ya ampanoksò komoyo ay napatalo moyo. 14Hikawo man ya aw-anak ay anholatan ko simpri banà ta nabalayan moyo ya Tatay ya Diyos. Anholatan katawoy tawtatay ta hikawoy magtandà nin habayti ya ayin pinangibatan ya pa-ibat hin ibat, hiya ay hiyayna. Anholatan katawoy lawlalaki ya mangalagò ta banà ha kakhawan nin pantotompel moyo ha Halità nin Diyos ya ampanatili ha ihip moyo ay napatalo moyo hi Satanas. 15Agmoyo pa-alaga--an ya anyaman ya bagay ya anti bayri ha babon lotà, ta no pa-alaga--an moyo ay ayin komoyo ya panlalabi nin Tatay ya Diyos. 16Alwan mahampat ya an-ogali--en nin tawtawo bayri ha babon lotà, ta ombayri yaanggaw--en la: kaganawan bagay ya labaylabay nin nawini ay anhonolen la, kaganawan ampikakit lay mangaganda ay labay la nin mapag-ikon, boy kaganawan anti konla ay an-ipaghambog la. Kaganawan gawà ya ombayri ay ahè nangibat ha Tatay ya Diyos no alwan ha sarili lan kalabayan. 17Hay babon lotà boy kaganawan bagay ya anti bayri ya masyadon ampa-alaga--an nin tawtawo ay ma--in anggawan; balè hay tawoy anhomonol ha kalabayan nin Diyos ay ma--in biyay ya ayin anggawan. 18Aw-anak, anlomateng anay ka-anggawan nin kaganawan bagay. Nalengè moyoynay lomateng ya kontraryo ni Pangino--on Hisokristo, boy hapa--eg, nilomwaynay malakè ya kontraryo na. Kayà tandà tamo ya maraninay ka-anggawan nin babon lotà. 19Habayti ya kawkontraryo ni Pangino--on Hisokristo ay da--an tamon kalamowan, piro talagan alwa hilan anak nin Diyos ta aghila nanatili kontamo. Napaptegan ya alwa tamo hilan kalamowan hin hilay kaganawan ay nog-alih kontamo. 20Piro hikawo ay alwan ombayro, ta hiPangino--on Hisos ya ayin kapintasan ay nambi komoyo nin Ispirito nin Diyos; kayà hay kaptegan ay tandà moyon kaganawan. 21Hinolatan katawo, alwan banà ta agmoyo tandà ya kaptegan no alwan banà ta tandà moyo, boy hay kaptegan ay ahè ma-arì nin pangibatan nin kabongkokan. 22Hinoy mabongkok? Hay mabongkok ay tawoy ahè labay bomalay nin hi Apo Hisos ay Kristo ya impangakò nin Diyos. Hay ombayroy tawo ay kontraryo ni Pangino--on Hisokristo ta agna labay bomalay ha Tatay tamoy Diyos boy ha Anak nin Diyos. 23Hay tawoy ahè ambomalay ha Anak nin Diyos ay ahè simpri ambomalay ha Diyos. Piro hinoman ya ampaghalità nin ma--in yan pamakilamo ha Anak nin Diyos ay ma--in ya simpri nin pamakilamo ha Diyos. 24Hay Mahampat ya Balità nin Diyos ya nalengè moyo pa-ibat hin tinompel kawo ay panatiliyen moyo ha nakem moyo. No ombayro ya gaw--en moyo ay ampanatili kawon ma--in pamakilamo ha Tatay ya Diyos boy ha Anak na ya ayin kanayon no alwan hi Apo Hisos. 25Hay impangakò ni Apo Hisos ya igwà kontamo ay biyay ya ayin anggawan. 26An-iholat ko bayti komoyo ya tongkol ha tawtawoy labay mangitawon komoyo ha kaptegan. 27Hay Ispirito nin Diyos ya inggawà komoyo ni Apo Hisos ay tinanggap moyoyna. Hiya ay ampanatili ha nakem moyo; kayà alwa moyoynan ka-ilangan nin ma--in et manorò komoyo, ta hay Ispirito nin Diyos ya ampanorò komoyo nin tongkol ha kaganawan bagay, boy hay an-itorò na komoyo ay kaptegan, alwan kabongkokan. Manatili kawo koni Pangino--on Hisokristo emen kawo makahonol ha an-itorò komoyo nin Ispirito nin Diyos. 28Kayà, aw-anak, manatili tamo nin ma--in pamakilamo koni Pangino--on Hisos emen tamo magkama--in nin hokaw nakem, boy emen agtamo mareng--ey nin omarap kona panlomateng na bayri ha babon lotà. 29Tandà tamon kaganawan ya hay Diyos ay talagan mahampat. Kayà matanda--an tamo ya maski hinoy tawo ya ampanggawà nin kahampatan ay nag--in anak nin Diyos.

will be added

X\