1 KORINTO 9

1Wari̇̀ hiko ay alwan malayà? Wari̇̀ hiko ay alwan hogò nin Pangino--on? Wari̇̀ agko nakit hi Pangino--on tamon Hisos? Wari̇̀ alwan hikawoy bonga nin pagsisirbi ko kona? 2Maski ahè balayen nin kanayon ya hiko ay hogò nin Pangino--on ay angkasigoro ko ya balayen moyo nin hiko ay hogò, ta hikawo ya kaptegan nin hiko ay hogò nin Pangino--on. 3Habayti ya itobay ko ha ampipamintas kongko. 4Wari̇̀ ayin kayin karapatan nin hay pamamangan nawen ay igwà konnawen nin antoro--an nawen? 5No ma--in akon ahawa ya antompel ha Pangino--on, ayin ako wari̇̀ karapatan nin mantan kona ha maski ayri nin bilang ha anggaw--en ni Pidro, boy kanayon ya hawhogò nin Pangino--on, kateng pawpatel ni Pangino--on Hisos? 6Wari̇̀ hikayin bongat ni Birnabi ya ayin karapatan nin ahè magtrabaho nin para ikabiyay nawen? 7Wari̇̀ hay hondalò ay ka-ilangan et magkama--in kanayon ya kapanikapan para ha sarili nan kagastosan? Wari̇̀ ma--in tawo ya no nananem yan obas ay agna matawayan ya bonga nin hatoy intanem na? Wari̇̀ ma--in pastol ya ampangalagà nin aw-ayop ya ahè maka-inom nin gatas nin habaytoy an-alaga--an na? 8Hay anhalita--en ko ay agko an-ibasi ha anhalita--en bongat nin tawtawo, ta habayti ay anti itaman ha kawkapanogo--an nin Diyos. 9Ha kawkapanogo--an ya hinolat ni Moysis ay ma--in ombayri ya pagkahalità: "Agmo bosalan ya bakà mintras an-ipagi--ek." Wari̇̀ bawbakà bongat ya an-asiwa--en nin Diyos? 10Alwa. In-alimbawà na kayi bayro ta hay ampangararo boy ampanggi--ek ay an-omasan ma--in atag ha alawah. 11Hikayi ay kowinta ampangitanem komoyo nin Halità nin Diyos. Kayà makabyat wari̇̀ komoyo no hay kabiyayen nawen ay ma-ibat komoyo? 12No ma--in karapatan ya kanayon ya manonorò komoyo nin omasa ha an-igwà moyo ay lalò kayin ma--in karapatan. Ombayro man, agnawen ginamit bayti ya karapatan nawen, no alwan antagalen nawen ya kaganawan emen ayin makahadlang komoyo nin tompel ha Mahampat ya Balità ya an-i-aral nawen komoyo ya tongkol koni Pangino--on Hisokristo. 13Wari̇̀ agmoyo tandà ya hay ampagsirbi ha bali nin Diyos ay ampananggap nin pamamangan ya ampangibat bayro ha bali nin Diyos? Wari̇̀ agmoyo simpri tandà ya hay ampipanambay para ha altar ya ampamo-olan nin aw-ayop ya pinati nin para ha Diyos ay ma--in hilan atag ya karni nin habaytoy aw-ayop ya pinati? 14Ombayro itaman, impanogò nin Pangino--on ya hay ampipangi-aral nin Mahampat ya Balità ay mananggap nin pawpanganga-ilangan la nin banà ha pangi-aral la nin Mahampat ya Balità. 15Piro maski anyay karapatan ko ay agko ginamit nin mananggap tambay ya ma-ibat komoyo. Agkatawo simpri anholatan hapa--eg para makikwa komoyo nin tambay. Mahampat et ya mati kon bitil kisan ma-alih ya karapatan kon magmalhay nin ahè makikwa nin tambay komoyo. 16Ayin akon bara--nan mangipagmalhay nin pangi-aral ko nin Mahampat ya Balità ta obligasyon kon i-aral bayti. Ka-i-ingaloy mangyari kongko no agko i-aral ya Mahampat ya Balità ya tongkol koni Pangino--on Hisos. 17No bolontad nin nakem ko ya pangi-aral ko ay ma-ari̇̀ akon omasan mananggap nin primyo. Piro habayti ay obligasyon ko ya impahimalà kongko nin Diyos. 18Anya awod ya tanggapen koy primyo? Hay primyo ko ay hay pribilihyo ko nin agko mananggap nin kabayaran ha pangi-aral ko nin Mahampat ya Balità maski ma--in akon karapatan ha ombayro. 19Maski ma--in akon kalaya--an gomawà nin balang labay ko, hay sarili ko ay an-itoring kon alilà nin kaganawan emen lalò lomakè ya tompel koni Pangino--on Hisokristo nin banà kongko. 20No anti ko ha Hawhodiyo ay ampakibagay ako konla emen hila magkama--in katetpel koni Pangino--on Hisokristo nin banà simpri kongko. Maski ayin ako ha hilong nin kawkapanogo--an ya hinolat ni Moysis ay kowinta miha ko ha anti ha hilong kapangyariyan nin habayto, ta ampakibagay ako emen hila magkama--in katetpel nin banà kongko. 21No anti ko itaman ha alwan Hawhodiyo ya ahè magtandà nin kawkapanogo--an nin Hawhodiyo ay ampakibagay ako simpri konla emen hila magkama--in itaman katetpel nin banà kongko. Piro ahè ampangahologan nin agko anhonolen ya kawkapanogo--an nin Diyos, ta hiko ay anhomonol ha an-ipanogò ni Pangino--on Hisokristo. 22No kalamo koy mangakapey ya katetpel ay ampakibagayan ko hila ha kakapeyan la emen ko mapakhaw ya pantotompel la koni Pangino--on Hisos. Ha kaganawan bagay boy ha kaganawan tawo ay ampakibagay ako emen ha maski anyay paraan ay magkama--in katetpel ya maski ongno konla nin banà kongko. 23Kaganawan nin habayti ay anggaw--en ko emen hay Mahampat ya Balità ay ma-ipatandà ko ha tawtawo boy emen ako makapaki-atag ha kahampatan ya matanggap ko nin banà bayro. 24Tandà moyo ya maski malakè ya ampilolombà nin mowayo ay mihan bongat ya makatanggap nin primyo. Ombayro itaman kontamo. Kayà ha pagsisirbi moyo ha Pangino--on ay magsikap kawo emen moyo matanggap ya primyo. 25Balang ampipampakilaban ya mawmagdadagaw ay ampipagsanay mandisiplina nin sarili ha kaganawan bagay. Ombayri ya anggaw--en la emen la matanggap ya primyo maski habayto ay ahè maboyot ta tampol mahirà. Piro hay ansikapen tamo ya primyo ay ayin pagkahirà. 26Kayà hiko ay kowinta ampowayo nin mako ha sigoradoy ka-anggawan, boy hiko ay kowinta ampamontal nin angkasigoroy tama--an. 27Ha kaganawan gawà ko ay ampa-irapan koy sarili ko boy andisiplinawan nin ahè gaw--en ya sarili kon kalabayan, ta agko labay ya maka pangayari̇̀ kon mangaral ha kanayon ay hiko ya mag--in alwan nararapat.

will be added

X\