1 KORINTO 4

1Hay dapat ipalagay konnawen nin tawtawo ay mawmagsisirbi ni Pangino--on Hisokristo, ta hay bawbagay ya ahè pon impatandà nin Diyos ay hikayi ya pinahimala--an nin mangi-aral ha tawtawo. 2Ka-ilangan ha tawoy ampahimala--an ay tapat ha kaganawan an-ipagawà kona. 3Alwan ma-alagà no anyaman ya ipalagay moyo kongko, o ipalagay kongko nin hinoman ya tawo ya tongkol ha impahimalà kongko nin Diyos. Maski hiko, anyaman ya ipalagay ko ha sarili ko ay alwan ma-alagà. 4Ayin akon tandà ya ginawà koy alwan tamà, piro habayti ay ahè ampangahologan nin hiko ay ahè nagkasalanan. Pangino--on bongat ya makahosga nin pagnanakem ko. 5Kayà agkawo manosga nin kapara moyo ha alwa et pana--on, no alwan anti--en moyoy panlomateng nin Pangino--on, ta hiyay mangipatnag nin sawsikritoy gawà boy mangibolgar nin mawmotibo nin tawtawo. Ha allon habayto nin lomateng ya, Diyos ya mambin kaporiyan ha balang miha kompormi ha ginawà nay kahampatan. 6Pawpatel, hay sarili ko boy hi Apolos ay an-i-alimbawà ko komoyo para ha ikahampat moyo emen moyo matotowan ya labay totolen nin habayti ya ombayri ya pagkahalità: "Hay nakaholat ay agmoyo palampasan." Hinoman komoyo ay ahè dapat mangipagmalhay nin mawmanonorò ha kanayon et ya mawmanonorò. 7Wari̇̀ ampaka-igit kawo ha kanayon? Alwa nayi̇̀ Diyos ya nambi komoyo nin kaganawan bagay ya anti komoyo? No tinanggap moyo ba--in bilang impangiri komoyo, antà man awod an-ipagmalhay moyo? 8Hostoyna awod ya pagbibiyay moyo! Biyay mayaman kawoyna awod! Bilang kawoyna awod nin aw-ari̇̀! Piro hikayi balè ay alwa. Ah! Mahampat dayi awod no peteg kawon aw-ari̇̀ ta emen moyo kayi makalamo nin mag-ari̇̀. 9Para kongko, hikayi ya hawhogò nin Diyos ay ginawà na nin pinaka-oltimo ha kaganawan tawo. Bilang kayin papatyen ya imparada ha intiron babon lotà nin impakit ha tawtawo kateng ha aw-anghil. 10Banà ha panhohomonol nawen koni Pangino--on Hisokristo, hay palagay konnawen ay tawtangah. Piro hikawo ya ampakilamo itaman koni Pangino--on Hisokristo ay an-ipalagay moyo nin maronong kawo. Hikayi ay makapey, hikawo balè ay mangakhaw! Amparangalan kawo nin tawtawo; hikayi balè ay anyamo-yamo--en la! 11Pa-ibat hin hato angga hapa--eg, hikayi ay angkabitlan boy angka-angan, boy hay dolo nawen ay gawgolot. Hikayi ay ampakakhitan boy ayin kayin sarilin dogal ya ampa-iriyan. 12Hikayi ay ampagpagal magtrabaho nin ikabiyay nawen. Maski ma--in ampipanla--et konnawen ay an-ingalowan nawen. No hikayi ay ampadya-dya--an ay ampagpasinsya kayi. 13No hikayi ay an-insoltowen ay mapanawa kayin antombay. Angga hapa--eg, hikayi ay bilang bongat basora boy ayin silbi bayri ha babon lotà. 14Habayti ya ombayri ya bawbagay ay agko inholat komoyo emen kawo mipareng--ey, no alwan anlabiyen katawon toro--an ta hikawo ay bilang kon sarilin aw-anak. 15Maski ma--in mapò ya liboy manonorò ya manorò komoyo nin tongkol koni Pangino--on Hisokristo ay hiko ya pinagkatatay moyo ha pantotompel koni Pangino--on Hisokristo, ta hiko ya nangi-aral komoyo nin Mahampat ya Balità. 16Hapa--eg, andawaten ko komoyo ya towaren moyoy anggaw--en ko. 17Kayà an-ihogò ko komoyo hi Timotiyo ya anlabiyen ko. Ha pantotompel na ha Pangino--on ay bilang ko yan anak, boy mapahimala--an ya ha pagsisirbi na ha Pangino--on. Ipa-ihip na komoyo no pangnoy pamakilamo ko koni Pangino--on Hisokristo. Habayti ay an-itorò ko ha kaganawan gropon mangama--in katetpel ha Diyos ha kaganawan dogal ya anlakwen ko. 18Ma--in ongno komoyo ya ampagmalhay ta wanla sigoro no agko makalako bahen nin manibaw komoyo. 19Piro no kalabayan nin Pangino--on ay tampol akon makalako bahen. Kayà panlomateng ko bahen, helken ko no anyay magawà nin hatoy ampipagmalhay ha kalak--an nin anhahalita--en la, 20ta hay pag-ari̇̀ nin Diyos ay alwan ha halità no alwan ha panggogomawà nin kapangyariyan nin Diyos. 21Hapa--eg ay anyay labay moyo? Mako ko nayi̇̀ bahen nin mandisiplinan makhit komoyo, o ha ma--in panlalabi boy ka-aypa--an nakem? Anti komoyo no anyay labay moyo.

will be added

X\