1 KORINTO 12

1Hapa--eg, pawpatel, labay kon matanda--an moyoy kaptegan nin tongkol ha kakayawan ya an-igwà nin Ispirito nin Diyos. 2Mismon hikawo ya magtandà nin hin agkawo et antompel ha Pangino--on ay maparah kawon magtan boy ma-itawon nin homamba ha alwan peteg diyos ya ahè ampakapaghalità. 3Hapa--eg ay itorò ko komoyo no pangno matanda--an ya hay Ispirito nin Diyos ay ampamo--on ha tawo. Hay tawoy ampaghalità nin kala-etan ya tongkol koni Apo Hisos ay alwan peteg nin Ispirito nin Diyos ya ampamo--on kona. Piro hay tawoy ampaghalità nin hi Apo Hisos ay Pangino--on ay peteg nin hay Ispirito nin Diyos ay ampamo--on kona. 4Hari-hari̇̀ ya klasin kakayawan ya an-igwà nin Ispirito nin Diyos, piro mimihay Ispirito ya ampambi. 5Hari-hari̇̀ ya klasi nin sirbisyo ya an-igwà nin Diyos, piro mimiha ni Pangino--on Hisos ya ampagsirbiyan tamo. 6Hari-hari̇̀ simpri ya klasin gawgawà ya pagsisirbi ha Diyos, piro mimihay Diyos ya ampambin kakayawan ha kaganawan gawà nin balang miha. 7Balang tawo ay ma--in kakayawan ya an-igwà kona nin Ispirito nin Diyos para ha ikahampat nin kaganawan. 8Hay kanayon ay ambiyan karonongan mangi-aral nin Halità nin Diyos, boy hay kanayon ay ambiyan pangingintindi nin mangipalinaw nin habayto. Ispirito nin Diyos ya ampambi nin habayti ya kagalingan. 9Habayto et ya Ispirito nin Diyos ya ampambi nin makhaw ya katetpel ha kanayon. Hay an-igwà itaman nin habaytoy Ispirito nin Diyos ha kanayon ay kakayawan mamakahampat nin ampipagmasakit. 10Hay kanayon ay ambiyan kakayawan makagawà nin pawpapag-ispantawan, boy hay kanayon ay ambiyan kakayawan nin mangi-aral Halità nin Diyos. Hay kanayon ay ambiyan kakayawan makatandà no hay kakayawan ya tinanggap nin kanayon ya tawo ay nangibat ha Ispirito nin Diyos o ahè. Ma--in ambiyan nin kakayawan maghalità nin hari-hari̇̀ ya klasin halità, boy hay kanayon ay ambiyan kakayawan nin mangipalinaw nin ombayroy hawhalità. 11Kaganawan nin habayti ya kakayawan ay mimihay pinangibatan. Ayin kanayon no alwan Ispirito nin Diyos. Hiya ya ampambi ha balang antompel ha Pangino--on kompormi ha labay nan igwà. 12No pangno nin hay mihay nawini ay angkabo--ò nin malakè ya parti ay ombayro hi Pangino--on Hisokristo. Hiya ay kowinta mimihay nawini ya kabo-o--an nin malakè ya parti. 13Hitamoy kaganawan, mag--in Hodiyo o alwa, alilà man o alwa ay nag--in mimihay nawini ta nabinyagan tamo ha mimihay Ispirito nin Diyos ya inggawà kontamon kaganawan. 14Hay nawini nin tawo ay nabo--ò nin malakè ya parti; alwan mimihay parti. 15No halita--en nin bitih ya, "Alwa kon gamet; kayà hiko ay alwan parti nin nawini," ha ombayro wari̇̀, hay bitih ay alwan parti nin nawini? 16No halita--en itaman nin tolih ya, "Alwa kon mata; kayà hiko ay alwan parti nin nawini," ha ombayro wari̇̀, hay tolih ay alwan parti nin nawini? 17No matan bongat ya kabo-o--an nin nawini ay pangno man makalengè? No tolin bongat itaman ya kabo-o--an nin nawini ay pangno makara--ep? 18Piro Diyos ya namalsa nin nawini kompormi ha kalabayan na. In-ayos nan mahampat ya pinangigwa--an na nin balang parti nin nawini. 19No hay kaganawan parti ay mimihay klasi ay pangno mag--in nawini bayto? 20Kayà hay nawini ay malakè ya parti piro mimihay nawini. 21Hay mata ay ahè ma-ari̇̀ maghalità ha gamet nin, "Alwa katan ka-ilangan." Hay olo itaman ay ahè simpri ma-ari̇̀ maghalità ha bitih nin, "Alwa katan ka-ilangan." 22Ha kaptegan, hay an-ibilang nin alwan ma-alagà ya parti nin nawini ay habayto ya mas ka-ilangan. 23Hay parti nin nawini ya an-ipalagay tamo nin alwan masyadon kaporipori ay lalò tamon ampa-alaga--an, boy hay parti nin nawini ya alwan magandan tegtegen ay habaytoy an-asiwa--en tamon mahampat. 24Piro hay parti nin nawini ya da--an anan maganda ay alwaynan ka-ilangan ayosen. Hay nawini ay in-ayos nin Diyos boy binyan dangal baytoy parti nin nawini ya an-ipalagay tamon alwan kaporipori. 25Ombayri ya ginawà nin Diyos emen balang parti nin nawini ay ahè magkama--in sigalotan no alwan mimamalasakit. 26No angkakhitan ya mihay parti nin nawini, hay kaganawan ay ampananam. No amparangalan ya mihay parti nin nawini, hay kaganawan ay angkatowà. 27Hikawoy kaganawan ay pinagkanawini ni Pangino--on Hisokristo, boy balang miha komoyo ay parti nin nawini na. 28Ha kaganawan gropon mangama--in katetpel ha Pangino--on, hay Diyos ay ma--in pinili̇̀ nin gaw--en ombayri. Hay ona ay hawhogò; ikalwa, mipangi-aral Halità nin Diyos; ikatlo, mipanorò. Ma--in et mipanggawà nin pawpapag-ispantawan, mipamakahampat nin ampipagmasakit, mipanambay, mipama-alà, boy mipaghalità nin hari-hari̇̀ ya klasin halità. 29Alwan kaganawan ay hawhogò, mipangi-aral Halità nin Diyos, o mipanorò; boy alwan kaganawan ay ambiyan kakayawan manggawà nin pawpapag-ispantawan, 30mipamakahampat nin ampipagmasakit, mipaghalità nin hari-hari̇̀ ya klasin halità boy mipangipalinaw nin habayto. 31Kayà pakahangaren moyo ya lalò ma-alagà ya kakayawan ya an-igwà nin Ispirito nin Diyos. Hapa--eg ay ipatandà ko komoyo ya pinakamahampat ha kaganawan.

will be added

X\