TITUS 3

1Pade ingetang anggote jemaahde adẽq ie pade tunduk lẽq pemrẽntah dait dengan-dengan saq bekuase, dait mẽlẽ ngelaksaneang sebilang pegawẽan saq solah. 2Badaq ie pade adẽqne ndaq pitnah dengan atao betungkasan kance sai juaq, laguq adẽqne gerasaq dait harus tetep lemah lembut tipaq selapuq dengan. 3Sẽngaq laẽq ite mẽsaq ẽndah bodo, sesat dait ndẽq taat. Ite tejariang hambe siq macem-macem napsu dait kemẽlẽq; ite idup siq niat-niat saq jahat dait talon atẽ, dait ite saling meriq. 4Laguq Allah, Juruselamette nyatayang kasih dait kesolahan-Ne tipaq ite. 5Lẽq waktu nike Ie sampun nyelametang ite, ndẽqne lantaran perbuatan solah saq sampun ite laksaneang, laguq lantaran rahmat-Ne. Allah nyelametang ite langan Roh-Ne saq ngicanin ite kelahiran baru dait idup baru, siq care persiq ite. 6Allah ngicanin ite Roh-Ne siq perantarean Deside Isa Almasih, Juruselamette, 7adẽq ite sebagẽ dengan saq tejariang kenaq lẽq arepan Allah sehingge hubungante kance Allah jari solah malik siq rahmat-Ne, berhak nerimaq idup saq kekel menurut pengharepante. 8Ucapan niki tetu-tetu kenaq. Dait tiang mẽlẽ adẽq side tegesang hal-hal niki, adẽq dengan-dengan saq percaye lẽq Allah tetu-tetu berusahe ngelaksaneang pegawẽan-pegawẽan saq solah dait bemanpaat tipaq selapuq dengan. 9Jaoqang diriqde lẽman pegejuhan saq ndẽq araq manpaatne, cerite-cerite silsilah, betungkasan dait besiaq mengenai Hukum Taurat. Selapuqne nike ndẽq araq manpaatne dait sie-sie. 10Dengan saq jari penyebap perpecahan lẽq dalem jemaah, harus side peringet sekali due; sesampun nike ndaq malik bebatur kance ie. 11Side nenaoq bahwe dengan saq maraq nike tetu-tetu sesat dait dose-dosene ngukum diriqne mẽsaq. 12Tiang gen becat ngutus Artemas atao Titikus ojok side, pade berusahe dateng ojok tiang lẽq Nikopolis, sẽngaq tiang sampun mutusang jari ndot lẽq derike sengonẽq musim telih. 13Pade berusahe pacu-pacu jari nulung Zenas, ahli Taurat nike, dait Apolos, adẽq ie pade bau berangkat dait ndẽqne kekurangan napi-napi. 14Dengan-dengante harus berajah ngelaksaneang hal-hal saq solah, adẽqne bau nyukupang keperluan-keperluan saq mule tetu-tetu teperluang; ndaq jangke ie pade idup ndẽq araq manpaatne. 15Selapuq semeton saq araq bareng tiang, ngirim salam tipaq side. Sampẽang salam tiang tipaq ie pade saq ngasihin tiang pade lẽq dalem iman. Rahmat Tuhan araq bareng kance side pade.

will be added

X\