TITUS 2

1Laguq side, Titus, side harus ngajahang pengajahan saq kenaq. 2Bẽng nasẽhat dengan-dengan mame saq lingsir, adẽq ie pade tao nahen diriqne, bijaksane, idup jari dengan saq patut tehormatin, idup dalem iman, kasih dait dalem ketekunan. 3Maraq nike ẽndah dengan-dengan nine saq lingsir, ie pade harus idup jari dengan-dengan saq beribadah, ndẽqne kanggo pitnah dengan lain, ndẽqne kanggo ketagihan ineman keras, laguq ie pade harus tao ngajahang hal-hal saq solah, 4adẽq siq care nike ie pade bau didik dengan-dengan nine saq masih bajang jari ngasihin semame dait bije-bijene, 5jari bijaksane, idup suci dait jari senine saq solah saq taat lẽq semamene. Siq care nike ndẽq araq dengan saq bau ngewade Manik Allah. 6Maraq nike ẽndah, bẽng nasẽhat dengan-dengan bajang adẽq ie pade nguasein diriqne dalem selapuq hal, 7dait side mẽsaq harus jari teladan kelakuan saq solah. Side harus jujur dait pacu-pacu ngajahang. 8Kadu base saq bijaksane, saq ndẽq bau tecele siq dengan, adẽq musuh-musuhde jari ilaq, sẽngaq ndẽq araq hal-hal saq lengẽ saq bau ie pade raosang mengenai ite. 9Hambe-hambe harus taat lẽq majikanne, dait nyenengang majikanne lẽq dalem selapuq hal. Ie pade ndẽq kanggo ngelawan, 10atao memaling. Ie pade harus nyatayang bahwe ie pade tetep tulus ihlas dait setie, adẽq dengan gen muji pengajahan mengenai Allah, Juruselamet ite. 11Sẽngaq rahmat Allah saq nyelametang selapuq manusie sampun nyate. 12Rahmat Allah nike didik ite adẽq ndẽq malik idup betentangan kance pekayunan Allah dait ndẽq turut kemẽlẽq duniawi. Ite tedidik jari idup bijaksane, adil dait beribadah lẽq dalem dunie niki. 13Mangkin niki ite ngantih pengharepan saq miaq bahagie serte berembẽ Allah dait Juruselamette Deside Isa Almasih nyatayang kemuliean-Ne saq Maheagung. 14Ie sampun ngurbanang diriq-Ne umaq ite jari bẽbasang ite lẽman selapuq kejahatan, dait nyuciang dengan-dengan saq jari dowẽ-Ne mẽsaq, dait saq rajin ngelaksaneang saq solah. 15Ajahang selapuqne nike, dait bẽng nasẽhat dait yakinang dengan-dengan saq dengahang side siq wibawe. Ndaq alurang sopoq dengan juaq ngerẽmẽhang side.

will be added

X\