ROMA 5

1Mangkin ite sampun tejariang kenaq lẽq arepan Allah sehingge hubungante kance Allah jari solah malik lantaran imante. Dait lantaran nike ite bedowẽ damẽ sejahtere kance Allah langan Junjungante Saq Mulie Deside Isa Almasih. 2Sẽngaq ite beriman lẽq dalem Deside Isa, langan Ie ite bau tame ojok dalem rahmat Allah, dait mangkin siq rahmat nike ite idup. Keranaq nike ite besukecite dait beharep bahwe ite gen nerimaq kemuliean Allah! 3Malahan luwẽqan malik, ite ẽndah besukecite lẽq dalem penderitean, sẽngaq ite nenaoq bahwe penderitean miaq dengan jari tekun. 4Dait ketekunan miaq dengan jari tahen uji; niki saq nimbulang pengharepan. 5Dait pengharepan saq maraq niki ndẽq gen ngecẽweang ite, sẽngaq atẽnte sampun teisiq siq Allah siq kasih-Ne. Hal nike telaksaneang siq Allah langan Roh Suci-Ne, saq sampun teicanin tipaq ite. 6Lẽq waktu ite dalem keadaan lemah, Almasih ninggal umaq ite dengan-dengan saq durhake, lẽq waktu saq tepat saq tetentuang siq Allah. 7Sẽngaq ndẽqne mudaq sopoq dengan rẽde matẽ umaq dengan saq kenaq, laguq sang umaq dengan saq solah araq dengan saq bani matẽ. 8Laguq Allah nyatayang kasih-Ne lẽq ite sewaktu Deside Isa ninggal umaq ite, lẽq waktu ite masih bedose. 9Mangkin ite sampun tejariang kenaq lẽq arepan Allah sehingge hubungante kance Allah jari solah malik langan ninggal-Ne Almasih; keranaq nike pasti ite gen teselametang ẽndah lẽman murke Allah siq Almasih. 10Lamun lẽq waktu ite masih jari musuh Allah, ite tedamẽang kance Allah siq ninggal Bije-Ne, lebih-lebih mangkin sesampun hubungante kance Allah solah malik, pasti ite gen teselametang ẽndah langan idup Almasih. 11Dait luwẽqan malik, ite ẽndah besukecite lẽq dalem Allah langan Junjungante Saq Mulie Deside Isa Almasih, sẽngaq langan Ie ite sampun nerimaq pendamẽan. 12Dose tame ojok dalem dunie langan sopoq dengan, dait lẽman dose nike sampun datengang kematẽan, akibatne, selapuq umat manusie gen ngalamin kematẽan, lantaran selapuq dengan bedose. 13Sendẽqman Hukum Taurat teturunang, dose sampun araq lẽq dalem dunie. Laguq dose ndẽqne teperitungang, sẽngaq ndẽq araq hukum saq bau telanggar. 14Timaq maraq nike, kematẽan nguasein selapuq manusie lẽman jaman Adam jangke jaman Musa, malahan dengan-dengan saq ndẽq miaq pelanggaran maraq saq telaksaneang siq Adam, dengan-dengan nike milu ẽndah tekuasein siq kematẽan. Adam nike jari gambaran sopoq dengan saq gen rauh. 15Laguq paice Allah tetu-tetu bẽde kance pelanggaran saq tepiaq siq Adam. Pelanggaran Adam jari penyebap luwẽq dengan matẽ, laguq jaoq belẽqan malik rahmat lẽman Allah saq teicanin tipaq dengan luwẽq, langan sopoq dengan, nike Deside Isa Almasih. 16Rahmat Allah ẽndah jaoq belẽqan lẽman dose sopoq dengan nike, sẽngaq penghakiman lẽq sopoq pelanggaran saq tepiaq siq Adam, nike jari penyebap penghukuman. Laguq rahmat Allah tipaq luwẽq pelanggaran, nike jari penyebap manusie tejariang kenaq lẽq arepan Allah. 17Langan sopoq pelanggaran saq tepiaq siq Adam kematẽan nguasein selapuq dengan. Laguq selapuq dengan saq nerimaq kelimpahan rahmat dait paice tejariang kenaq lẽq arepan Allah langan Deside Isa Almasih, gen idup dait bekuase. 18Sẽngaq sopoq pelanggaran saq tepiaq siq Adam, sampun datengang penghukuman tipaq sebilang manusie. Laguq sopoq karye Almasih saq jariang manusie kenaq lẽq arepan Allah, miaq selapuq dengan kenaq lẽq arepan Allah dait ngicanin ie pade idup. 19Dait maraq luwẽq dengan jari dengan bedose lantaran sopoq dengan saq ndẽq taat, maraq nike ẽndah luwẽq dengan gen bau tejariang kenaq lẽq arepan Allah lantaran sopoq dengan lain taat lẽq Allah. 20Allah ngicanin Hukum Taurat adẽq selapuq dengan bau serioq berembẽ bedosene ie pade, laguq sayan manusie bedose, sayan belimpah-limpah rahmat Allah. 21Pade maraq dose nguasein selapuq dengan dait datengang kematẽan, mangkin rahmat Allah bekuase dait jariang ite kenaq lẽq arepan Allah, sehingge ite nerimaq idup sejati dait kekel langan Junjungante Saq Mulie Deside Isa Almasih.

will be added

X\