WAHYU 7

1Sesampun nike, tiang serioq empat malaẽkat nganjeng lẽq keempat penjuru gumi. Ie pade nahen keempat angin lẽq gumi adẽq ndẽq araq angin saq betiup lẽq darat atao lẽq segare, atao lẽq leloloan. 2Terus tiang serioq sopoq malaẽkat saq lain sugul lẽman timuq. Ie jauq sẽgel lẽman Allah saq idup. Siq suare saq belẽq malaẽkat nike bekuih tipaq keempat malaẽkat saq sampun mauq kuase lẽman Allah jari nyẽdaq gumi dait segare. 3Malaẽkat nike bebase, "Ndaq nyẽdaq gumi atao segare, atao leloloan lamun tiang pade ndẽqman ngebẽng tande sẽgel lẽq telakar hambe-hambe Allahte." 4Beterus tiang dengah bahwe araq satus petang dase empat iyu dengan saq tebẽng tande sẽgel lẽman Allah lẽq telakar ie pade. Dengan-dengan nike tebait lẽman kedue olas suku bangse Israel. 5Lẽman suku Yehuda due olas iyu, lẽman suku Ruben due olas iyu, lẽman suku Gat due olas iyu, 6lẽman suku Asyer due olas iyu, lẽman suku Naptali due olas iyu, lẽman suku Manasye due olas iyu, 7lẽman suku Simeon due olas iyu, lẽman suku Lewi due olas iyu, lẽman suku Isakar due olas iyu, 8lẽman suku Zebulon due olas iyu, lẽman suku Yusup due olas iyu, dait lẽman suku Benyamin due olas iyu. 9Sesampun nike tiang serioq malik, terus penggitan kumpulan manusie saq luar biase luwẽqne -- ndẽq araq sopoq dengan juaq saq bau rẽkẽng jumlahne. Ie pade dengan-dengan lẽman sebilang bangse, suku, kaum, dait base. Lẽq arepan tahte dait lẽq arepan Anak Dombe nike ie pade selapuq nganjeng kadu jubah putẽq dait negel pẽmpang-pẽmpang lolo palem lẽq imene. 10Terus siq suare saq belẽq ie pade bekuih, "Keselametante datengne lẽman Allahte, saq melinggih lẽq atas tahte, dait lẽman Anak Dombe nike!" 11Selapuq malaẽkat nganjeng ngiterin tahte dait pare pemimpin dait keempat mahluk nike. Malaẽkat-malaẽkat nike nyungkur lẽq arepan tahte terus nyembah Allah. 12Ie pade bebase, "Amin! Ya Tuhan tiang pade, bagi Deside selapuq pujian, kemuliean, hikmat, ucapan syukur, hormat, kuase, dait kekuatan jangke selaẽq-laẽqne! Amin!" 13Salaq sopoq dengan lẽman pemimpin-pemimpin nike beketuan lẽq tiang, "Sai dengan-dengan saq bejubah putẽq niki dait lẽman mbẽ ie pade dateng?" 14"Mindah tiang, tuan. Pelungguh mẽsaq saq wikan," jawab tiang. Make ie bebase lẽq tiang, "Niki dengan-dengan saq sampun selamet lẽman mase penganiayean saq belẽq. Ie pade sampun popoq jubah ie pade dait tejariang putẽq kadu daraq Anak Dombe nike. 15Keranaq nike ie pade nganjeng lẽq arepan tahte Allah, dait beribadah tipaq Ie peteng menah lẽq dalem Gedẽng Suci Allah. Dait Ie saq melinggih lẽq atas tahte nike gen ngelindungin ie pade siq kẽmah-Ne. 16Ie pade ndẽq malik gen beridap lapah, atao bedak; jelo atao panas jelo ndẽq malik gen nimpe ie pade, 17sẽngaq Anak Dombe saq melinggih lẽq tengaq-tengaq tahte nike gen jari pengarat ie pade. Ie gen jauq ie pade ojok embulan aiq kehidupan. Dait Allah gen usap selapuq aiq penenteng lẽman penenteng ie pade."

will be added

X\