WAHYU 6

1Sesampun nike tiang serioq Anak Dombe nike bukaq sẽgel saq penembẽq lẽq antare kepituq sẽgel nike. Terus tiang dengah sopoq lẽq antare keempat mahluk nike bebase, "Silaq!" Suare mahluk nike maraq suare guntur. 2Make tiang serioq, terus penggitan sopoq jaran putẽq. Penunggangne negel sopoq panaq, dait ie teicanin sopoq mahkote. Terus ie maju sebagẽ pemenang jari ngerebut kemenangan. 3Beterus Anak Dombe nike bukaq sẽgel saq kedue, dait tiang dengah mahluk saq kedue bebase, "Silaq!" 4Terus sopoq jaran saq lain sugul malik. Jaran nike bẽaq warnene. Penunggangne teicanin kuase jari bait damẽ sejahtere lẽman gumi, adẽq manusie saling matẽq. Make ie teicanin sopoq klẽwang saq belẽq. 5Beterus Anak Dombe nike bukaq sẽgel saq ketelu. Dait tiang dengah mahluk saq ketelu bebase, "Silaq!" Make tiang serioq, terus penggitan sopoq jaran bideng. Penunggangne negel sepasang dacin lẽq imene. 6Dait tiang dengah maraq araq suare lẽq tengaq-tengaq keempat mahluk nike bebase, "Sekilo gandum saq solah, ajine maraq upaq sejelo, dait telu kilo gandum jenis saq lain ajine maraq upaq sejelo ẽndah. Laguq ndaq nyẽdaq minyak dait anggur nike!" 7Beterus Anak Dombe nike bukaq sẽgel saq keempat. Dait tiang dengah mahluk saq keempat bebase, "Silaq!" 8Tiang serioq, terus penggitan sopoq jaran saq ijo kuning. Aran penunggangne Maut dait alam maut milu bareng kance ie. Deduaqne teicanin kuase jari nyematẽq seperempat bagian gumi siq klẽwang, siq kelapahan, siq wabah penyakit dait siq binatang-binatang buas saq araq lẽq gumi. 9Sesampun nike Anak Dombe nike bukaq sẽgel saq kelime. Make tiang serioq lẽq bawaq mẽje taoq kurban, araq jiwe-jiwe dengan-dengan saq ninggal tematẽq lantaran Manik Allah dait lantaran kesaksian ie pade. 10Ie pade bekuih siq suare saq belẽq, "Ya Tuhan Saq Mahekuase, saq suci dait kenaq! Pire ngonẽq malik baruq Deside ngadilin penduduk gumi dait ngukum ie pade lantaran sampun nyematẽq tiang pade?" 11Ie pade sopoq-sopoq teicanin sopoq jubah saq putẽq. Terus ie pade tesuruq mentelah semendaq, jangke sampun cukup jumlah batur-batur seperjuangan dait semeton-semeton ie pade saq gen tematẽq maraq ie pade. 12Terus tiang serioq Anak Dombe nike bukaq sẽgel saq keenem. Araq lindur saq belẽq gati. Jelo jari bideng maraq kẽrẽng bideng saq kasar, dait bulan jari bẽaq maraq daraq. 13Bintang-bintang roroq lẽman langit ojok gumi maraq buaq are saq masih odaq roroq lẽman lolone sewaktu tegerik siq angin pusut. 14Langit keset maraq kertas tegulung, dait selapuq gunung dait pulao tegẽsẽr lẽman taoqne. 15Terus raje-raje dunie, pare pembelẽq, panglime-panglime, dengan-dengan sugih dait dengan-dengan bekuase, dait dengan-dengan saq lainne, hambe dait dengan merdẽke, selapuqne nyeboq lẽq dalem goe-goe dait lẽq selak-selak batu gunung. 16Tipaq gunung-gunung dait batu-batu nike ie pade bekuih, "Silaq endet tiang pade! Seboq tiang pade lẽman arepan Ie saq melinggih lẽq atas tahte, dait lẽman murke Anak Dombe nike! 17Sẽngaq jelo murke saq dahsyat sampun dateng, sai saq bau tahen?"

will be added

X\