WAHYU 22

1Tiang ẽndah tepetitoqang siq malaẽkat nike kokoq aiq kehidupan. Kokoq nike menẽng maraq kristal dait ngẽlẽk lẽman tahte Allah dait tahte Anak Dombe nike, 2lẽq tengaq-tengaq langan kote nike. Lẽq sedi kokoq nike, lẽq sebilang sedine araq lolo-lolo kehidupan, saq bebuaq due olas kali setaun, sekali sebulan. Daunne tekadu jari nyelahang bangse-bangse. 3Lẽq dalem kote nike ndẽq araq napi juaq saq kene siq kutuk Allah. Tahte Allah dait tahte Anak Dombe nike gen araq lẽq dalem kote nike. Hambe-hambe-Ne gen ibadah tipaq Ie, 4dait serioq penjarupan-Ne. Pesẽngan-Ne gen tetulis lẽq telakar ie pade. 5Ie pade ndẽq gen merluang dilah atao cahaye jelo, sẽngaq kelem ndẽq araq malik, dait Tuhan Allah mẽsaq gen menahin ie pade. Make ie pade gen mrẽntah jari raje selaẽq-laẽqne. 6Terus malaẽkat nike bebase lẽq tiang, "Manik-manik niki kenaq dait bau tepercaye. Tuhan Allah saq ngicanin Roh-Ne tipaq nabi-nabi, sampun ngutus malaẽkat-Ne jari nyatayang tipaq hambe-hambe-Ne napi saq harus becat telaksane." 7"Setetune Tiang gen becat dateng! Bahagie dengan saq taat lẽq pesen-pesen nubuat dalem kitab niki!" 8Tiang, Yahya, sampun dengah dait serioq selapuqne niki. Sesampun tiang engkah serioq dait dengah ie, tiang nyungkur lẽq julun malaẽkat saq sampun nyatayang selapuqne nike tipaq tiang, dait tiang gen nyembah ie, 9laguq ie bebase lẽq tiang, "Ndaq! Ndaq nyembah tiang! Pade sembah Allah! Sẽngaq tiang ẽndah hambe pade maraq side, dait maraq semeton-semetonde pare nabi dait selapuq dengan saq taat lẽq pesen-pesen dalem kitab niki!" 10Terus ie bebase malik, "Ndaq rahasieang pesen-pesen nubuat lẽq dalem kitab niki, sẽngaq sampun rapet waktune selapuqne niki gen telaksane. 11Dengan saq jahat, alurang terus gawẽq jahat; dengan saq najis, alurang najisang diriqne; dengan saq kenaq, alurang terus ngelaksaneang kebenaran, dait dengan saq idup husus bagi Allah, alurang terus idup husus bagi Allah." 12"Setetune ndẽqne ngonẽq malik Tiang gen becat dateng dait jauq pahale jari bales sebilang dengan menurut perbuatanne. 13Tiang niki saq penembẽq dait saq penutuq; Tiang Tuhan lẽman Penembẽq jangke Penutuq." 14Bahagie dengan saq popoq jubahne jangke bersi sehingge ie pade bedowẽ hak ngelorang buaq lẽman lolo kehidupan dait tame ojok dalem kote nike langan jebak belẽqne. 15Laguq dengan-dengan saq ngelaksaneang hal-hal saq ẽkẽk, tukang-tukang sẽhẽr, dengan-dengan saq gawẽq perbuatan saq cabul, saq nyematẽq, saq nyembah berhale, dait dengan-dengan saq beduste, siq ucapan-ucapan atao siq perbuatan, selapuq dengan nike taoqne lẽq luah kote nike. 16"Tiang, Isa, sampun ngirim malaẽkat Tiang tipaq side pade, adẽq ie ngebẽng kesaksian mengenai selapuq hal-hal niki jari kepentingan jemaah-jemaah. Tiang niki keturunan Daud; Tiang bintang timuq saq menah tandur nike." 17Roh Allah dait Pengantẽn Nine nike bebase, "Silaq!" Sebilang dengan saq dengah niki ẽndah harus ngucapang, "Silaq!". Sai saq bedak, ie harus dateng! Dait sai saq melẽt, ie harus bait aiq kehidupan nike secare cume-cume. 18Tipaq sebilang dengan saq dengah pesen-pesen nubuat lẽq dalem kitab niki, tiang, Yahya ngebẽng kesaksian: "Lamun sopoq dengan ngeromboqang sopoq hal lẽq pesen-pesen nubuat niki, make Allah gen ngeromboqang tipaq ie bencane-bencane saq tetulis lẽq dalem kitab niki. 19Dait lamun sopoq dengan ngurangin sopoq hal lẽman pesen-pesen nubuat niki, make Allah ẽndah gen ngurangin bagianne maraq saq tetulis lẽq dalem kitab niki -- nike bagian lẽman lolo kehidupan dait lẽman kote suci nike." 20Ie saq ngicanin kesaksian mengenai selapuqne niki bemanik, "Kenaq, Tiang gen becat dateng!" Amin! Silaq rauh, Junjungan Saq Mulie Deside Isa! 21Rahmat Junjungan Saq Mulie Deside Isa araq bareng kance side selapuq! Amin.

will be added

X\