WAHYU 13

1Beterus tiang serioq sopoq binatang sugul lẽman segare. Ie bedowẽ sepulu tanggẽq dait pituq otak. Lẽq sebilang tanggẽqne araq sopoq mahkote, dait lẽq sebilang otakne tetulis sopoq aran penghinean tipaq Allah. 2Binatang saq tiang serioq nike ruene maraq macan tutul, dait naẽne maraq naẽ beruang, biwihne maraq biwih singe. Terus binatang nike tebẽng siq nage nike kekuatanne mẽsaq, dait tahtene, dait kekuaseanne saq belẽq. 3Sopoq lẽman kepituq otak binatang nike ruene maraq bakat saq sampun parah gati, laguq bakat nike sampun selah. Seantẽro gumi jari takjub terus turut binatang nike. 4Dait ie pade nyembah nage nike sẽngaq ie sampun ngebẽng kekuaseanne tipaq binatang nike. Dait ie pade nyembah binatang nike ẽndah. Basen ie pade, "Ndẽq araq saq pade kance binatang niki! Ndẽq araq saq bau perang ngelawan ie!" 5Binatang nike teicanin biwih saq sombong gati dait menghine Allah. Ie teijinang mrẽntah petang dase due bulan ngonẽqne. 6Terus ie mulai menghine Allah, dait pesẽngan Allah. Maraq nike ẽndah taoq Allah meneng, dait selapuq saq araq lẽq sorge ẽndah tehine. 7Ie teijinang ẽndah ngelawan dengan-dengan saq tehususang bagi Allah dait ngalahang ie pade. Dait kekuasean lẽq selapuq suku, kaum, base, dait bangse teserahang lẽq ie. 8Binatang nike gen tesembah siq selapuq dengan saq idup lẽq gumi, kecuali dengan-dengan saq aranne sampun tetulis sendẽqman dunie tecipteang, lẽq dalem kitab kehidupan dowẽn Anak Dombe saq sampun tesembelẽh. 9Keranaq nike, lamun side pade bedowẽ kentok jari dedengah, dengahang berite niki: 10"Dengan saq harus tetahen, pasti gen tetahen. Dait dengan saq harus tematẽq kadu klẽwang, pasti gen tematẽq kadu klẽwang. Keranaq nike dengan-dengan saq tehususang bagi Allah harus tabah dait setie." 11Terus tiang serioq sopoq binatang lain sugul lẽman gumi. Ie bedowẽ due tanggẽq maraq tanggẽq anak dombe. Suarene maraq suare nage. 12Lẽq julu binatang saq penembẽq nike ie kadu kekuaseanne saq belẽq saq temauq lẽman binatang nike ẽndah. Seantẽro gumi dait selapuq saq araq lẽq dalemne, ie paksaq nyembah binatang saq penembẽq nike, saq sampun selah lẽman bakatne saq parah. 13Binatang saq kedue nike ngaraqang tande-tande saq ajaip. Lẽq julun selapuq dengan ie miaq api turun lẽman langit ojok gumi. 14Dait selapuq dengan saq idup lẽq gumi tesesatang siq tande-tande saq ie piaq lẽq julun binatang saq penembẽq nike. Dait ie pade selapuq ie suruq miaq sopoq tetato lẽman binatang saq sampun bakat siq klẽwang laguq tetep idup. 15Binatang saq kedue nike tebẽng kuase jari ngebẽng nyawe tipaq tetato nike, sehingge tetato nike tao ngeraos, dait nyematẽq selapuq dengan saq ndẽq mẽlẽ nyembah ie. 16Selapuq dengan, belẽq dait kodẽq, sugih dait miskin, hambe dait dengan merdẽke, tepaksaq siq binatang nike jari nerimaq tande lẽq ime kanan ie pade atao lẽq telakar ie pade. 17Ndẽq araq sopoq dengan juaq saq bau beli atao jual barang selain lẽman ie pade saq ngengadu tande nike, nike aran binatang nike mẽsaq, atao angke saq nyatayang aran nike. 18Lẽq dalem hal niki perlu araq hikmat. Dengan saq bijaksane tao ngerẽkẽng angke binatang nike, sẽngaq angke nike aran sopoq manusie. Angkene nike enem ratus enem dase enem.

will be added

X\