WAHYU 10

1Terus tiang serioq sopoq malaẽkat perkase saq lain turun lẽman sorge. Ie tekerubung siq awan, dait sopoq sabuk bidedari ngelingkerin ulune. Muene becahaye maraq jelo dait naẽne maraq teken api. 2Lẽq imene araq sopoq gulungan kitab kodẽq saq kebukaq. Naẽ kananne ngicaq segare, dait naẽ kirine lẽq darat. 3Terus ie bekuih siq suare saq belẽq maraq suare singe-singe saq ngeraq. Sesampun malaẽkat nike bekuih, kepituq guntur bejawab siq suare saq belẽq. 4Sesampun kepituq guntur nike besuare, tiang mẽlẽ nulis hal nike, laguq tiang dengah suare lẽman sorge, "Rahasieang napi saq tesampẽang siq pituq guntur nike; ndaq tulis hal nike!" 5Terus malaẽkat saq tiang serioq nganjeng lẽq segare dait lẽq darat nike ngangkat imene saq kanan ojok langit. 6Ie besumpah siq pesẽngan Allah saq idup selaẽq-laẽqne, saq cipteang langit, gumi dait segare dait selapuq saq araq lẽq dalemne. Basen malaẽkat nike, "Ndẽq gen tetunde malik waktune! 7Laguq sewaktu malaẽkat kepituq niup terompẽtne, Allah gen ngelaksaneang rencane rahasie-Ne, maraq saq sampun Ie sampẽang tipaq hambe-hambe-Ne, nike pare nabi." 8Beterus suare saq sampun tiang dengah lẽman sorge nike bebase malik lẽq tiang, "Silaq lumbar bait gulungan kitab saq kebukaq lẽq ime malaẽkat saq nganjeng lẽq segare dait lẽq darat nike." 9Beterus tiang lalo ojok malaẽkat nike dait tunas adẽq ie ngicanin tiang gulungan kitab nike. Malaẽkat nike bebase, "Silaq bait dait kelorang niki. Lẽq dalem tiande ie gen jari pait, laguq lẽq dalem biwihde ie manis maraq madulani." 10Tiang bait gulungan kitab nike lẽman imene, terus tiang kelor. Lẽq biwih rasene maraq madulani, laguq sesampun tiang belet ie, lẽq dalem tian ie jari pait. 11Beterus ie bebase lẽq tiang, "Sampẽang karing sekali nubuat tipaq luwẽq bangse, kaum, base, dait raje."

will be added

X\