YAKUB 3

1Semeton senamian! Ndaq lẽq antare side luwẽq saq mẽlẽ jari guru. Side pade nenaoq bahwe ite saq jari guru gen teadilin beratan tebanding dengan lain. 2Ite selapuq kereng miaq kesalaqan. Laguq dengan saq ndẽq uwah miaq kesalaqan siq ucapan-ucapanne, ie dengan saq sempurne, saq bau nguasein selapuq awakne. 3Ite masang plẽbẽk lẽq biwih jaran adẽq ie mẽlẽ turut kemẽlẽqte, make ite bau ngatur selapuq awak jaran nike. 4Bait ẽndah conto sopoq kapal. Timaq kapal nike belẽq gati dait tedorong siq angin saq keras, laguq ie teatur siq kemudi saq kodẽq gati, menurut kemẽlẽq jurumudi. 5Maraq nike ẽndah ẽlaqte, timaq ẽlaq nike bagian awak saq kodẽq, laguq ie bau nyombongang diriq mengenai hal-hal saq belẽq-belẽq. Cobaq serioq, gawah saq belẽq bau tesedut siq api saq kodẽq! 6~Elaq ẽndah pade maraq api. Lẽq antare bagian-bagian awakte, ẽlaq nike sumber kejahatan saq bau piaq najis selapuq awak dait ngidupang rode kehidupan, ẽlaq nike mẽsaq tenyalaqang siq api nerake. 7Segale macem binatang buas, kedit, binatang saq ngumang dait empaq, bau tepiaq isah, dait sampun ẽndah tepiaq isah siq manusie. 8Laguq ẽlaq manusie ndẽqne bau tepiaq isah siq sai juaq. ~Elaq nike jahat dait ndẽqne bau tekuasein; penoq siq racun saq nyematẽq. 9Ite kadu ẽlaq nike jari ngucapang syukur lẽq Tuhan dait Bapante, laguq ẽndah jari ngutuk sepade manusie, saq sampun tecipteang menurut gambar Allah. 10Lẽman biwih saq pade sugul ucapan-ucapan berkah dait ẽndah ucapan-ucapan kutukan. Sepatutne ndẽqne maraq nike. 11Napi araq pengembulan nyugulang aiq due macem, aiq tawah kance aiq pait lẽman pengembulan saq pade? 12Semeton tiang senamian! Lolo are ndẽqne bau ngasilang buaq Zaitun, dait lolo anggur ndẽqne bau ẽndah ngasilang buaq are. Pengembulan saq aiqne paẽq ndẽqne bau ẽndah nyugulang aiq saq tawah. 13Sai lẽq antare side pade saq bijaksane dait bebudi? Ie harus nyatayang hal nike langan perbuatanne saq solah saq tebarengin siq kebijaksanean saq dateng lẽman atẽ saq lemah lembut. 14Laguq lamun side pade talon atẽ dait mentingang diriqde mẽsaq, ndaq side pade banggeang diriq dait ndaq beduste ngelawan kebenaran. 15Kebijaksanean maraq nike ndẽqne berasal lẽman sorge. Ie berasal lẽman dunie, dait napsu manusie, dait lẽman sẽtan. 16Lẽq mbẽ araq talon atẽ dait mentingang diriq mẽsaq, lẽq derike ẽndah araq keributan dait segale macem perbuatan saq jahat. 17Laguq kebijaksanean saq asalne lẽman atas, pertame-tame murni, beterus demen bedamẽ, gerasaq, penurut, penoq belas kasihan dait ngasilang perbuatan-perbuatan saq solah, ndẽq bepihak dait ndẽq munapik. 18Buaq-buaq lẽman kebenaran nike tesawur lẽq dalem damẽ umaq dengan saq demen bedamẽ.

will be added

X\