YAKUB 1

1Semeton senamian, dengan-dengan saq tehususang bagi Allah saq nyebar lẽq seantẽro dunie! Salam lẽman tiang, Yakub, hambe Allah dait hambe Junjungan Saq Mulie Deside Isa Almasih. 2Semeton senamian! Lamun side pade ngalamin macem-macem cobe, side pade harus anggep hal nike jari kebahagiean. 3Sẽngaq side pade nenaoq, bahwe ujian tipaq imande nike ngasilang ketekunan. 4Jagaq adẽq ketekunande nike ngasilang kesempurnean, adẽq side pade jari sempurne dait lengkap, ndẽq kekurangan lẽq hal napi juaq. 5Lamun araq sopoq dengan lẽq antare side saq kekurangan hikmat, ie harus tunas lẽman Allah, make Allah gen ngicanin ie; sẽngaq lẽq sebilang dengan, Allah ngicanin secare murah atẽ dait nẽnten ngungkit-ngungkit kesalaqanne. 6Laguq dengan saq nunas dalem iman, ie ndẽq kanggo bimbang. Sẽngaq dengan saq bimbang angenne maraq umbak lẽq segare dait lito latẽ tetiup siq angin. 7Dengan saq maraq nike ndẽqne tetep pikiranne; ie ndẽqne bau bait keputusan napi-napi lẽq selapuq saq ie laksaneang. Keranaq nike ndaq ie harepang ẽndah gen mauq napi-napi lẽman Tuhan. 9Alurang semeton saq idupne sederhane merase bangge lantaran kedudukanne saq atas. 10Maraq nike ẽndah halne lẽq dengan sugih lantaran kedudukanne saq rendah, sẽngaq ie gen musnah maraq kembang pupaq. 11Sewaktu tiwoq jelo siq panasne saq keras, make pupaq nike gen jari layu sehingge roroq kembangne dait telang ẽndah kesolahanne. Maraq nike ẽndah dengan saq sugih; ie gen ancur lẽq waktu ie kenyeke berusahe. 12Bahagie dengan saq tahen sewaktu ie tecobe. Sẽngaq sesampun ie bau tahen lẽq cobe nike, ie gen nerimaq upaqne, nike mahkote kehidupan saq tejanjiqang siq Allah tipaq dengan-dengan saq ngasihin Ie. 13Lamun sopoq dengan mauq cobe, ndaq ie bebase, "Cobe niki datengne lẽman Allah!" Sẽngaq Allah ndẽqne bau tecobe siq kejahatan, dait Ie ẽndah ndẽq cobe sai juaq. 14Laguq dengan tecobe siq kemẽlẽqne mẽsaq, teoros dait tetipu siq kemẽlẽqne. 15Beterus, lamun kemẽlẽq saq jahat nike teturut, make gen datengang dose; dait lamun dose sampun masak, make kematẽan saq jari akibatne. 16Semeton senamian saq tiang kasihin; ndaq side pade jari sesat. 17Selapuq hal saq solah saq teicanin dait paice saq sempurne datengne lẽman sorge, teturunang siq Bapa, sumber selapuq cahaye dait saq ndẽq iniq berobah atao bekurang lantaran perobahan. 18Siq pekayunan-Ne mẽsaq Ie sampun jariang ite ciptean baru siq manik kebenaran, Ie ngelaksaneang nike adẽq ite jari bije saq sengake lẽq antare selapuq mahluk ciptean-Ne. 19Pade perhatiang niki solah-solah, semeton senamian saq tiang kasihin! Sebilang dengan harus becat dedengah, laguq ndẽqne becat bebase dait ndẽqne becat gedek. 20Dengan saq gedek ndẽqne bau ngelaksaneang saq kenaq lẽq arepan Allah. 21Keranaq nike, tetẽh selapuq kebiasean saq lengẽ dait saq jahat. Terimaq Manik Allah setulusne lẽq dalem atẽnde, sẽngaq Manik nike bedowẽ kekuatan jari nyelametang side pade. 22Side pade harus jari dengan-dengan saq ngelaksaneang Manik Tuhan, ndaq cume dengah doang, sehingge siq care nike side nipu diriqde mẽsaq. 23Dengan saq dengahang Manik Allah, laguq ndẽqne ngelaksaneang, nike maraq dengan saq kenyeke merhatiang ruene mẽsaq lẽq julu kesene. 24Sesampunne perhatiang solah-solah, ie lumbar dait langsung ngelupaqang berembẽ rue muene nike. 25Hukum Allah sempurne dait bedowẽ kekuatan jari merdẽkeang manusie. Dait dengan saq nyelidik dait pacu-pacu merhatiang dait ngelaksaneang hukum-hukum nike, dait ndẽqne cume dengah doang beterus lupaq, dengan nike gen bahagie lẽq napi juaq saq ie laksaneang. 26Lamun araq sopoq dengan saq merase diriqne ngelaksaneang ibadah, laguq ie ndẽq jagaq ucapanne, ie nipu diriqne mẽsaq; ibadahne ndẽq araq manpaatne. 27Ibadah saq murni dait sejati menurut Allah Bapante: Nulung anak-anak iwoq dait bebalu-bebalu saq menderite, dait jagaq diriq mẽsaq adẽq ndaq tesẽdaq siq dunie niki.

will be added

X\