IBRANI 6

1Keranaq nike silaq ite bilin dasar-dasar penembẽq lẽman pengajahan mengenai Almasih ngalih ojok tingket kedẽwasean. Ndaq malik ite ngulang perajahan dasar bahwe dengan harus engkah ngelaksaneang hal-hal saq ndẽq bemanpaat, dait harus percaye tipaq Allah, 2atao perajahan dasar mengenai pembaptisan, atao mengenai noloq ime lẽq atas dengan, atao mengenai idup malik sesampun ninggal atao hukuman saq kekel. 3Dait hal nike saq gen ite piaq, lamun Allah ngijinang. 4Sẽngaq, dengan-dengan saq sampun murtat, ndẽqne mungkin tebimbing malik. Laẽq ie pade sampun araq lẽq dalem terang lẽman Allah, dait sampun ngeraseang paice sorge. Ie pade ẽndah sampun mauq bagian lẽq dalem Roh Suci. 5Ie pade nenaoq lẽman pengalaman ie pade bahwe Manik Allah nike solah, dait ie pade sampun ngeraseang paice-paice saq penoq kuase lẽman jaman saq gen dateng. 6Laguq sesampun nike ie pade murtat, ndẽqne mungkin ie pade bau tebimbing malik adẽqne tobat lẽman dose-dose ie pade. Sẽngaq ie pade pakuq malik lẽq kayuq salib Bije saq asalne lẽman Allah dait miaq Ie tehine lẽq julun dengan luwẽq. 7Tanaq saq ngisep aiq ujan saq kereng turun lẽq atasne, beterus ngasilang taletan-taletan saq bemanpaat umaq penyakapne, tanaq nike teberkahin siq Allah. 8Laguq lamun tanaq nike ngasilang lolo rẽ dait taletan saq beduwi, make tanaq nike ndẽq araq manpaatne dait ẽraq gen tekutuk siq Allah, dait selanjutne gen tetunuq jangke bis. 9Laguq semeton senamian saq tiang kasihin, timaq tiang pade nyampẽang maraq nike, laguq tiang pade yakin mengenai side pade. Tiang pade yakin bahwe side pade sampun nerimaq hal-hal saq solahan, nike berkah-berkah saq jari bagian lẽman keselametande. 10Sẽngaq Allah nẽnten Allah saq nẽnten adil. Allah nẽnten gen lupaq napi saq sampun side pade laksaneang bagi Allah, dait kasih saq sampun side pade nyatayang tipaq pesẽngan-Ne sewaktu nulung dengan-dengan saq tehususang bagi Allah saq jangke mangkin masih side pade laksaneang. 11Tiang pade melẽt gati adẽq side pade sopoq-sopoq tetep besemanget jangke dateng penutuqne, adẽq side pade pasti mauq napi saq side pade harepang nike. 12Tiang pade ndẽq mẽlẽ side pade jari mayus. Laguq tiang pade melẽt adẽq side pade idup maraq dengan-dengan saq bedowẽ napi saq tejanjiqang siq Allah, saq ie pade terimaq lantaran iman dait kesabaran ie pade. 13Sewaktu Allah bejanji tipaq Ibrahim, Ie besumpah demi diriq-Ne mẽsaq, sẽngaq ndẽq araq saq atasan lẽman Ie. 14Allah bemanik, "Tiang bejanji gen ngebẽng side berkah saq belimpah-limpah dait gen miaq keturunande jari luwẽq." 15Ibrahim sabar ngantos, make ie nerimaq napi saq tejanjiqang siq Allah lẽq ie. 16Lamun dengan besumpah, ie besumpah demi aran dengan saq atasan lẽman ie, sehingge ndẽq araq dengan saq nentang sumpah nike. 17Keranaq nike, jari ngeyakinang ie pade saq berhak nerimaq janji nike mengenai kepastian keputusan-Ne, Allah sampun jamin diriq-Ne kadu sumpah. 18Kedue hal nike ndẽqne bau berobah: Allah nẽnten mungkin beduste mengenai janji dait sumpah-Ne. Keranaq nike, ite saq boyaq perlindungan lẽq Allah, bedowẽ kebanian saq kuat jari mauq pengharepan saq araq lẽq julunte. 19Pengharepante nike maraq jangkar saq tetalet dalem gati dait taoqte betegelan saq kuat dait aman umaq jiwente, saq sampun nembus kelambu saq begantung lẽq dalem Gedẽng Suci Allah, 20lẽq taoq nike Deside Isa sampun tame dait bukaqang ite langan, nike sesampun Ie jari Imam Agung selaẽq-laẽqne, menurut aturan Imam Melkisedek.

will be added

X\