KISAH RASUL-RASUL 27

1Sesampun teputusang bahwe tiang pade harus belayar ojok Italia, Paulus dait pire dengan tahenan saq lain teserahang ojok Yulius, prewire pasukan tentere Roma saq tesebut "Pasukan Kaisar". 2Tiang pade taẽk ojok kapal saq dateng lẽman Adramitium, beterus berangkat kadu kapal nike saq sampun siep belayar ojok pelabuan-pelabuan lẽq propinsi Asia. Aristarkus, dengan Makedonia saq dateng lẽman Tesalonika, belayar ẽndah bareng kance tiang pade. 3Jemaqne tiang pade dateng lẽq Sidon. Paulus teperlakuang secare bagus gati siq Yulius. Ie teijinang jangoq batur-baturne adẽq ie pade iniq ngebẽng napi saq ie perluang. 4Lẽman derike tiang pade belayar malik. Sẽngaq angin dateng belainan arah kance kapal, tiang pade terus belayar bedurus lẽq pesisi pulao Siprus. 5Beterus tiang pade babar segare saq berandangan kance Kilikia dait Pampilia terus dateng lẽq Mira lẽq negeri Likia. 6Lẽq derike prewire nike ndait sopoq kapal lẽman Aleksandria saq mẽlẽ belayar ojok Italia. Beterus ie alih tiang pade ojok kapal nike. 7Pire jelo ngonẽqne, tiang pade belayar adẽng gati, dait sengke gati tiang pade belayar jangke bau dateng dẽkẽt kote Knidus. Sẽngaq angin masih doang ndẽq bagus, tiang pade ndẽq bau belayar ojok jurusan semule. Make tiang pade belayar ojok lauq pulao Kreta langan Tanjung Salmone. 8Sengke gati tiang pade belayar bedurus lẽq pesisi pulao nike, ahirne tiang pade dateng lẽq sopoq taoq aranne Pelabuan Indah, ndẽqne jaoq lẽman kote Lasea. 9Waktu nike Jelo Puase dengan Yahudi sampun liwat. Tiang pade sampun luwẽq bisang waktu sie-sie, sehingge ndẽq aman malik jari belayar. Keranaq nike Paulus peringet ie pade, 10"Semeton-semeton, menurut pendapet tiang, gen bahaye gati lamun ite belayar terus. Ite gen ngalamin kerugian belẽq ndẽqne cume lẽq muatante dait kapalte, laguq nyawente ẽndah gen celake." 11Laguq prewire nike lebih percaye lẽq jurumudi dait kapten kapal nike ketimbang ucapan-ucapan Paulus. 12Pelabuan lẽq derike mule ndẽq bagus jari taoq ndot kapal-kapal sengonẽq musim telih. Keranaq nike luwẽqan anak buah kapal setuju belayar malik bilin pelabuan nike sẽngaq ie pade mẽlẽ berusahe adẽq bau dateng lẽq Peniks dait ndot lẽq derike sengonẽq musim telih. Peniks nike sopoq pelabuan lẽq Kreta saq andang bat daye dait bat lauq. 13Lẽq waktu nike dateng angin lẽman lauq adẽng-adẽng. Anak buah kapal nike laporan ie pade gen bau belayar malik. Jari ie pade ngangkat jangkar terus belayar bedurus lẽq pesisi pulao Kreta. 14Laguq ndẽq ngonẽq sesampun nike, dateng angin belẽq gati -- nike angin saq tesebut angin Timuq Segare -- keras gati dateng lẽman darat, 15dait ngampes kapal tiang pade. Keranaq nike ndẽq mungkin kapal nike belayar terus ngelawan angin, make tiang pade nyerah doang dait ngalurang kapal nike ẽlẽh tejauq siq angin. 16Tiang pade merase aman sekediq waktu tiang pade liwat lẽq lauq pulao Kauda saq kodẽq nike. Lẽq derike sengke gati tiang pade bau nguasein perau kodẽq saq araq lẽq kapal tiang pade. 17Sesampun perau kodẽq nike tetaẽkang ojok kapal, terus kapal nike teteguqang kadu tali saq tetaliq ngelingkerin kapal nike. Sẽngaq takut kesandek lẽq dasar gerẽs Sirtis saq dawot, layar teturunang, terus kapal tealurang nurut angin. 18Angin terus ngamuk, sehingge jemaqne, muatan kapal mulai tetetẽh ojok segare. 19Jelo selanjutne anak buah kapal nike netẽh ẽndah pekakas-pekakas kapal ojok segare kadu imene mẽsaq. 20Bejelo-jeloan ngonẽqne tiang pade ndẽq serioq jelo dait bintang, dait angin tetep ngamuk. Ahirne telang harepan tiang pade gen bau selamet. 21Pire waktu ngonẽqne dengan-dengan nike ndẽq bekelor. Beterus Paulus nganjeng lẽq tengaq-tengaq ie pade dait bebase, "Semeton-semeton! Lamun side pade turut nasẽhat tiang dait ndẽq belayar lẽman Kreta, ite ndẽq ngalamin selapuq saq lengẽ dait rugi maraq niki. 22Laguq mangkin sanget siq tiang tunas adẽq side pade belẽqang angen. Ndẽq araq sopoq dengan juaq lẽman side saq gen ninggal; ite cume gen kẽlangan kapal niki doang. 23Sẽngaq uwiq bian malaẽkat lẽman Allah saq tiang sembah, Ie Allah saq dowẽang tiang, rauh tipaq tiang. 24Manik malaẽkat nike, 'Ndaq takut, Paulus! Sẽngaq side gen ngadep Kaisar. Dait setetune lantaran rahmat Allah, selapuq dengan saq belayar kance side gen selamet lantaran side.' 25Keranaq nike, semeton-semeton, side pade harus tabah! Sẽngaq tiang percaye lẽq Allah bahwe selapuqne gen telaksane maraq saq temanikang tipaq tiang. 26Laguq ite gen kesasar lẽq sopoq pulao." 27Lẽq kelem saq keempat olas tiang pade kenyeke ngompal lẽq Segare Adria. Kire-kire tengaq kelem anak buah kapal merase kapal kenyeke ngerapetin darat. 28Jari ie pade ngulurang tali saq tegantungin batu jari ngukur dalemne segare. Ternyate taoq nike dalemne petang dase mẽter kurang sekediq. Ndẽq ngonẽq sesampun nike, ie pade ngukur malik, dait kire-kire telung dase mẽter dalemne lẽq taoq nike. 29Ie pade takut kapal gen kandas lẽq batu karang, jari ie pade nurunang empat jangkar lẽman bagian mudi kapal, terus beharep lamun bau becat-becat menah. 30Tedoq-tedoq pare anak buah kapal berusahe pelai lẽman kapal nike. Ie pade nurunang perau kodẽq ojok aiq, maraqne gen nurunang jangkar lẽman julu kapal. 31Laguq Paulus bebase tipaq prewire dait prajurit-prajurit saq lẽq kapal nike, "Lamun anak buah kapal niki ndẽq ndot lẽq kapal, semeton-semeton selapuqne ndẽq gen selamet." 32Keranaq nike, prajurit-prajurit nike peleng tali perau kodẽq nike, sehingge perau kodẽq nike ẽlẽh. 33Lẽq waktu sendẽqman tiwoq jelo, Paulus nganjurang adẽq ie pade selapuq bekelor. Paulus bebase, "Sampun empat olas jelo ngonẽqne semeton selapuqne cume ngantih-ngantih doang siq rase takut dait ndẽq ngelorang napi-napi. 34Tiang nganjurang, bekelor sekediq. Nike solah umaq side pade, adẽq side pade kuat malik. Sẽngaq semeton selapuqne gen selamet dait ndẽq kurang napi-napi." 35Sesampun bebase maraq nike Paulus bait ruti terus ngucapang syukur tipaq Allah lẽq julu ie pade selapuq. Beterus ie bagi-bagiang ruti nike, dait bekelor. 36Beterus ie pade selapuq besemanget malik dait milu bekelor ẽndah. 37Selapuq saq araq lẽq kapal nike araq satak pituq pulu enem dengan. 38Sesampun selapuqne bekelor secukupne, ie pade tetẽh muatan gandum ojok segare adẽq kapal jari dẽang. 39Sesampun menah, anak buah kapal serioq daratan, laguq ie pade ndẽq taoq daratan napi nike. Ie pade serioq sopoq pulao kodẽq kance pesisine. Jari ie pade beniat belabuh lẽq derike, lamun bau. 40Make tali-tali jangkar tepeleng terus jangkar-jangkar nike tealurang ketelep lẽq segare. Lẽq waktu nike ẽndah ie pade ngelepas tali saq naliq kemudi-kemudi. Beterus ie pade taẽkang layar lẽq bagian julu kapal adẽq angin tiup kapal nike ojok pesisi. 41Laguq kapal nike kesandek lẽq dasar gerẽs. Bagian julune ketalet dait ndẽq iniq nguit, dait bagian mudine remuk teampes siq umbak saq keras. 42Prajurit-prajurit lẽq kapal nike beniat nyematẽq selapuq dengan tahenan, sẽngaq ie pade takut ndaq-ndaq laun araq saq ngonong ojok darat dait pelai. 43Laguq prewire nike segah niat ie pade sẽngaq ie mẽlẽ nyelametang Paulus. Ie suruq selapuq dengan saq tao ngonong nimproh juluan dait ngonong ojok pesisi; 44saq lain turut mudi dait betegelan lẽq papan-papan atao kayuq peleng-pelengan kapal nike. Siq care nike tiang pade selapuq selamet jangke dateng darat.

will be added

X\