2 YAHYA 1

1Tipaq Inaq saq tepilẽq siq Allah, dait tipaq bije-bijene saq tetu-tetu tiang kasihin. Lẽman tiang, pemimpin jemaah dait selapuq dengan saq nenaoq kebenaran. 2Sẽngaq Allah araq lẽq dalem atẽnte, dait gen tetep araq bareng kance ite selaẽq-laẽqne. 3Paice, rahmat dait damẽ sejahtere lẽman Allah Bapa, dait lẽman Deside Isa Almasih, Bije saq asalne lẽman Bapa nike, gen araq bareng kance ite lẽq dalem kebenaran dait dalem kasih. 4Tiang gembire gati nenaoq bahwe araq separo bije-bijende idup menurut kebenaran, maraq saq sampun teprẽntahang siq Allah Bapa tipaq ite. 5Keranaq nike, Inaq, sanget siq tiang tunas adẽq ite selapuq saling kasihin. Napi saq tiang nyatayang niki ndẽqne sopoq prẽntah saq baru umaq side, laguq menurut prẽntah saq sampun araq lẽq ite lẽman penembẽq ite percaye. 6Kasih nike artine ite idup menurut prẽntah-prẽntah-Ne. Dait prẽntah saq sampun side pade dengah lẽman penembẽqne nike, bahwe side pade harus idup siq care saling kasihin sopoq kance saq lain. 7Luwẽq penyesat sampun nyebar ojok seantẽro dunie. Ie pade dengan-dengan saq ndẽq ngakuq bahwe Deside Isa Almasih sampun rauh ojok dunie jari sopoq manusie. Nike penyesat dait penentang Almasih. 8Keranaq nike jagaq ndaq jangke side pade kẽlangan napi saq sampun tiang pade usaheang umaq side pade. Pade berusahe adẽq side pade nerimaq selapuq upaqde lẽman Allah. 9Dengan saq ndẽq percaye lẽq pengajahan Almasih, laguq nyimpang lẽman napi saq teajahang siq Ie, dengan nike ndẽq bedowẽ Allah. Dengan saq tetep lẽq dalem pengajahan Almasih, artine ie bedowẽ Allah Bapa dait Bije saq asalne lẽman Allah. 10Keranaq nike, lamun araq dengan dateng dait nyampẽang lẽq side pengajahan saq ndẽq teajahang siq Almasih, ndaq nerimaq dengan nike lẽq dalem balẽnde atao ngebẽng salam tipaq ie. 11Sẽngaq dengan saq ngebẽng salam tipaq dengan saq maraq nike milu ẽndah kance dengan nike gawẽq perbuatan saq jahat. 12Luwẽq gati saq perlu tiang badaq tipaq side, laguq bagusan ndẽq langan surat. Tiang beharep gen bau dateng dait ngeraos langsung kance side pade, adẽq sukecitente jari sempurne. 13Bije-bije semetonde saq nine, saq tepilẽq ẽndah siq Allah ngirim salam tipaq side.

will be added

X\