1 TIMOTIUS 2

1Pertame-tame, sanget siq tiang tunas adẽq petunasan, do'e serte ucapan syukur tesampẽang tipaq Allah umaq selapuq dengan; 2umaq raje-raje dait umaq selapuq dengan saq bekuase. Tunas adẽq ite bau idup tenang dait tentrem dalem selapuq kesolẽhan dait kehormatan. 3Nike saq solah dait saq nyenengang Allah, Juruselamette. 4Allah kayun adẽq selapuq dengan teselametang dait mauq penenaoq mengenai kebenaran. 5Sẽngaq, cume araq sopoq Allah, dait cume sopoq perantare antare Allah kance manusie, nike manusie Deside Isa Almasih. 6Ie sopoq manusie saq sampun nyerahang diriq-Ne jari nebus selapuq dengan: Kesaksian nike tenyatayang lẽq waktu saq tepat. 7Dait lantaran nike tiang sampun tetentuang jari dengan saq nyampẽang berite dait jari rasul serte guru umaq dengan-dengan saq ndẽq Yahudi lẽq dalem iman dait kebenaran. Napi saq tiang sampẽang niki setetune kenaq, tiang ndẽq beduste. 8Tiang mẽlẽ adẽq lẽq sebilang taoq, dengan mame bedo'e dait nengadahang kedue imene saq suci, ndẽq tebarengin rase gedek atao betungkasan. 9Maraq nike ẽndah dengan-dengan nine, harus ngerias diriqne secare sederhane dait kadu kelambi saq pantes. Ndaq ngengadu potongan bulu saq macem-macem ruene, atao periasan-periasan emas atao mutiare, atao kelambi saq mahel-mahel. 10Sebalikne, dengan-dengan nine harus ngerias diriqne siq perbuatan-perbuatan saq solah, pade maraq saq telaksaneang siq dengan nine saq beribadah. 11Dengan nine harus tedoq dait patuh sewaktu nerimaq pengajahan. 12Tiang ndẽq ngijinang lamun dengan nine ngajah atao mrẽntah dengan mame; ie pade harus tedoq. 13Sẽngaq saq penembẽq tecipteang nike Adam dait sesampun nike baruq Hawa. 14Dait ndẽqne Adam saq tetipu, laguq Hawa, sehingge ngelanggar prẽntah Allah. 15Timaqne maraq nike, dengan nine gen teselametang lantaran nganak, asal ie tekun lẽq dalem iman, kasih dait kesucian dait idup sederhane.

will be added

X\