1 TESALONIKA 5

1Semeton senamian, tiang pade ndẽq perlu nulis tipaq side piran waktune saq tepat hal-hal nike gen telaksane. 2Sẽngaq side mẽsaq nenaoq secare jelas bahwe jelo kerauhan Tuhan nike gen dateng maraq maling lẽq kekelem. 3Lamun dengan bebase, "Selapuqne aman dait tentrem," make waktu nike selung-selung ie pade gen tetimpe siq kebinasean, dait ndẽq araq sopoq dengan juaq saq bau luput. Hal nike gen telaksane selung-selung maraq dengan nine saq kenyeke sakit gen nganak. 4Laguq side pade ndẽqne dengan saq idup lẽq dalem peteng, sehingge jelo nike miaq side pade tinjot maraq tedatengin maling. 5Side pade selapuq bije-bije terang; side pade golongan dengan saq idup lẽq dalem terang lẽq waktu tengari. Ite ndẽqne dengan saq idup lẽq dalem peteng, atao golongan dengan saq araq lẽq kelem saq peteng. 6Keranaq nike ndaq ite tindoq maraq dengan-dengan lain. Ite harus bejage-jage dait sadar. 7Lẽq kekelem dengan tindoq, dait lẽq kekelem ẽndah dengan jari bowos. 8Laguq ite niki golongan dengan-dengan saq idup lẽq menah kenjelo; keranaq nike ite harus sadar, kadu kelambi besi, nike kasih dait iman sebagẽ pelindung, dait kadu ketopong, nike pengharepan keselametan. 9Allah nẽnten nentuang ite jari tehukum, laguq jari teselametang langan Junjungante Saq Mulie Deside Isa Almasih. 10Ie ninggal umaq ite adẽq lẽq waktu Ie rauh ẽraq -- napi ite masih idup, atao ite sampun ninggal -- ite bau idup bareng kance Ie. 11Keranaq nike, side pade harus tetep saling nasẽhatin dait saling neguqang, pade maraq saq kenyeke side pade laksaneang mangkin niki. 12Semeton senamian, sanget siq tiang pade tunas adẽq side pade hargein dengan-dengan saq lelah begawẽan lẽq tengaq-tengaqde; ie pade saq sampun tepilẽq siq Tuhan jari mimpin dait peringet side pade. 13Pacu-pacu hormatin ie pade siq kasih lantaran inget napi saq ie pade laksaneang. Pade tetep idup lẽq dalem damẽ sopoq kance saq lain. 14Semeton senamian, tiang pade ẽndah ngebẽng nasẽhat, peringet ie pade saq idup ndẽq tertib; hibur dengan saq kuatir angenne; pade tulung dengan saq lemah dait sabar lẽq selapuq dengan. 15Jagaq adẽq ndaq araq saq bales kejahatan siq kejahatan. Tetep berusahe jari laksaneang saq solah, sopoq kance saq lain dait tipaq selapuq dengan. 16Pade tetep besukecite. 17Dait pade tetep bedo'e. 18Besyukur lẽq dalem selapuq hal, sẽngaq nike saq tekayunang siq Allah lẽman side pade sebagẽ dengan saq idup lẽq dalem Deside Isa Almasih. 19Ndaq pedaqang Roh, 20dait ndaq ngerẽmẽhang nubuat-nubuat. 21Uji selapuq hal dait tegel napi saq solah. 22Jaoqang diriqde lẽman segale macem kejahatan. 23Semoge Allah damẽ sejahtere nyuciang side selapuqne dait semoge roh, jiwe dait awakde tepeliharaq secare sempurne dait ndẽq bedowẽ cacat cele lẽq waktu kerauhan Deside Isa Almasih, Junjungante Saq Mulie. 24Ie saq ngemanikang side nike setie, Ie ẽndah saq gen genepang hal nike. 25Semeton senamian, do'eang tiang pade! 26Sampẽang salam tiang pade tipaq selapuq semeton siq penoq kasih. 27Siq kuase Tuhan, sanget siq tiang tunas adẽq side baceang surat niki lẽq selapuq semeton saq seiman. 28Rahmat Deside Isa Almasih, Junjungante Saq Mulie, araq bareng kance side pade.

will be added

X\