1 PETRUS 1

1Semeton senamian dengan-dengan saq tehususang bagi Allah, saq nyebar lẽq perantoan lẽq daẽrah Pontus, Galatia, Kapadokia, Asia Kodẽq dait Bitinia! Tiang, Petrus, rasul Deside Isa Almasih, beharep semoge Allah ngicanin rahmat dait damẽ sejahtere saq belimpah-limpah. Side pade tepilẽq jari dengan-dengan saq tehususang bagi Allah sesuai kance rencane Allah Bapa, dait tesuciang siq Roh Allah adẽq side pade taat lẽq Deside Isa Almasih dait tepersiq siq ketisan daraq-Ne. 3Silaq ite besyukur lẽq Allah, Bapa Junjungante Saq Mulie Deside Isa Almasih! Lantaran rahmat-Ne saq belẽq gati, Ie ngicanin idup saq baru tipaq ite, siq care ngidupang malik Deside Isa Almasih lẽman tengaq-tengaq dengan ninggal. Hal nike ngebẽng ite harepan saq pasti. 4Ite beharep jari nerimaq sopoq bagian saq ndẽq bau binase saq ndẽq bedowẽ cacat cele dait saq ndẽq layu, saq tesimpen lẽq sorge umaq side. 5Sẽngaq side pade beriman lẽq Allah, Ie gen jagaq side pade siq kuase-Ne, jangke side pade nerimaq keselametan saq sampun siep tenyatayang lẽq ahir jaman ẽraq. 6Pade besukecite siq hal nike, timaq mangkin sementare waktu side pade harus bedukecite lantaran side pade ngalamin macem-macem cobe. 7Maksut selapuqne nike jari buktiang kemurnian iman side pade. Emas saq bau sẽde doang, teuji kadu api. Maraq nike ẽndah iman side pade saq jaoq mahelan ajine lẽman emas, harus teuji ẽndah, sehingge side pade gen tepuji dait tehormatin dait temulieang lẽq jelo Deside Isa Almasih rauh malik. 8Side pade ngasihin Ie, timaq side pade ndẽq uwah serioq Ie. Dait side pade percaye lẽq Ie timaq mangkin side pade ndẽq serioq Ie. Keranaq nike side pade gembire sẽngaq sukecite saq mulie dait ndẽq bau teucapang. 9Sẽngaq side pade sampun dateng lẽq tujuan imande, nike keselametan jiwende. 10Keselametan niki saq teteliti dait teselidik siq pare nabi, dait ie pade sampun benubuat mengenai rahmat saq tesedieang siq Allah tipaq side. 11Ie pade selidik berembẽ dait piran hal nike gen telaksane, saq temaksut siq Roh Almasih saq araq lẽq dalem diriq ie pade, nike Roh saq sendẽqmanne ngebẽng kesaksian mengenai selapuq penderitean saq harus tealamin siq Almasih dait mengenai selapuq kemuliean saq gen telaksane sesampun nike. 12Tipaq nabi-nabi nike, Allah sampun nyatayang bahwe napi saq ie pade laksaneang -- nike hal-hal saq mangkin niki side pade dengah lẽman ie pade siq nyampẽang Kabar Solah tipaq side pade siq perantarean kuase Roh Allah saq teturunang lẽman sorge -- ndẽqne jari kepentinganne mẽsaq, laguq jari ngelayanin side. Malahan malaẽkat-malaẽkat ẽndah melẽt wikan kabar saq ie pade sampẽang nike. 13Keranaq nike, pade siepang pikirande dait waspade dait beharep sepenoqne lẽq rahmat saq gen teicanin tipaq side lẽq waktu Deside Isa Almasih rauh ẽraq. 14Idup sebagẽ bije-bije saq taat lẽq Allah. Ndaq side turut selapuq hawe napsu saq nguasein side pade lẽq waktu side pade ndẽqman kenal kance Allah. 15Sebalikne, side pade harus suci lẽq dalem selapuq saq side pade laksaneang, pade maraq Allah saq manikang side pade nike suci. 16Sẽngaq araq tetulis, "Side harus suci, sẽngaq Tiang suci." 17Side pade nyebut Allah nike Bapa, nike Allah saq hakimin manusie setimpal kance perbuatanne sopoq-sopoq ndẽqne bẽde-bẽdeang dengan. Keranaq nike sengonẽq side pade masih araq lẽq dunie niki, side pade harus idup takut lẽq Ie. 18Sẽngaq side pade nenaoq bahwe side pade sampun tetebus lẽman kehidupande saq sie-sie saq tewarisang siq leluhurde. Ie nebus side ndẽq kadu barang-barang saq gen binase maraq emas atao perak, 19laguq siq daraq saq mahel, nike daraq Almasih mẽsaq, saq jari maraq anak dombe saq ndẽq bedowẽ cacat cele saq tekurbanang tipaq Allah. 20Almasih sampun tepilẽq siq Allah sendẽqman dunie tecipteang, laguq baruq tenyatayang lẽq jaman ahir niki demi side. 21Langan Almasih nike side pade percaye lẽq Allah saq sampun ngidupang Ie lẽman ninggal dait saq mulieang Ie, sehingge imande dait pengharepande tetujuang tipaq Allah. 22Side pade sampun nyuciang diriq lantaran side pade taat lẽq kebenaran, sehingge side pade bau ngasihin selapuq semeton secare tulus ihlas. Keranaq nike, side pade harus saling kasihin sopoq kance saq lainne siq sepenoq angen. 23Sẽngaq mangkin side pade sampun tebijeang malik ndẽqne lẽman binẽq manusie saq bau binase, laguq lẽman binẽq saq ndẽq binase, nike Manik Allah saq idup dait saq kekel. 24Dalem Kitab Suci tetulis maraq niki, "Selapuq umat manusie maraq pupaq, dait selapuq kemulieanne maraq kembang pupaq. Pupaq jari layu, kembang ẽndah jari roroq, 25laguq manik Tuhan kekel selaẽq-laẽqne." Manik nike Kabar Solah saq sampun tesampẽang tipaq side.

will be added

X\