1 KORINTUS 14

1Jariang kasih nike tujuan side pade saq paling utame. Dait berusahe ẽndah jari mauq paice-paice saq teican siq Roh Allah, terutame gati paice benubuat. 2Dengan saq ngeraos kadu base-base saq ajaip, ie ndẽqne ngeraos tipaq manusie laguq tipaq Allah. Ndẽq araq dengan saq ngerti napi saq ie raosang, sẽngaq Roh Allah saq miaq ie ngucapang hal-hal saq rahasie nike. 3Sebalikne dengan saq benubuat, ie ngeraos kance manusie; jari pesolah ie pade, ngebẽng nasẽhat dait hibur ie pade. 4Dengan saq ngeraos kadu base saq ajaip, ie cume pesolah diriqne mẽsaq. Laguq dengan saq benubuat ie pesolah jemaah. 5Bagus gati lamun semeton senamian tao ngeraos kadu base-base saq ajaip. Laguq saq paling bagus, lamun semeton senamian benubuat. Sẽngaq dengan saq benubuat lebih beraji ketimbang dengan saq tao ngeraos kadu base saq ajaip; lain halne lamun dengan saq ngeraos kadu base saq ajaip nike iniq jelasang mẽsaq napi saq ie ucapang nike adẽq bau pesolah selapuq jemaah. 6Lamun misalne tiang dateng ojok side terus tiang ngeraos kadu macem-macem base saq ajaip napi manpaatne nike umaq side pade? Tetu-tetu ndẽq araq manpaatne! Lain halne lamun tiang nyatayang sopoq rahasie lẽman Allah, atao tiang jelasang sopoq hal mengenai Allah, atao tiang nyampẽang nubuat, atao tiang ngajahang. 7Alat-alat tetabuhan saq ndẽq bedowẽ nyawe maraq misalne suling dait kecapi, lamun tepuniqang ndẽq keruan-ruan, berembẽ dengan nenaoq lagu napi saq tepuniqang nike? 8Sopoq conto saq lainne malik: Lamun terompẽt tetiup semẽlẽ-mẽlẽ, sai saq gen siep lumbar perang? 9Maraq nike ẽndah siq kepinteran side ngeraos kadu macem-macem base saq ajaip. Lamun siq kepinterande nike side bebase kadu base saq ndẽq jelas, ndẽq araq sopoq dengan juaq saq iniq ngerti napi saq side ucapang. Ucapan-ucapande nike gen sie-sie. 10Lẽq dunie niki araq luwẽq gati base, laguq ndẽq araq sopoq juaq lẽman base-base nike saq ndẽq bedowẽ arti. 11Laguq lamun tiang ndẽq ngerti base saq teucapang siq sopoq dengan, make dengan saq ngeraos kadu base saq ndẽq tiang ngerti nike jari dengan asing lẽq tiang, maraq nike juaq tiang lẽq dengan nike. 12Mengenai side mẽsaq, tiang nenaoq side pade melẽt gati mauq paice-paice lẽman Roh Allah. Laguq saq terutame gati, side pade harus berusahe kadu kemampuande jari pesolah jemaah. 13Keranaq nike dengan saq ngeraos kadu base saq ajaip, harus bedo'e adẽq ie ẽndah teicanin paice jari jelasang napi saq ie ucapang nike. 14Sẽngaq lamun tiang bedo'e kadu base saq ajaip, roh tiang mule bedo'e laguq pikiran tiang ndẽq milu bedo'e. 15Jari, napi saq harus tiang laksaneang? Niki saq tiang laksaneang: Tiang bedo'e siq roh tiang, laguq tiang ẽndah gen bedo'e siq pikiran tiang. Tiang gen benyanyi siq roh tiang dait tiang ẽndah gen benyanyi siq pikiran tiang. 16Sẽngaq lamun side ngucap syukur lẽq Allah siq rohde doang, dait araq dengan lain saq ndẽq ngerti base ajaip lẽman Roh Allah nike, segerah dengan nike tao ngucapang, "Amin" lẽq do'e syukurde nike? Sẽngaq ie ndẽq nenaoq napi saq side ucapang. 17Timaq do'e syukurde tipaq Tuhan nike solah gati, laguq do'e nike ndẽq pesolah dengan lain. 18Tiang besyukur lẽq Allah sẽngaq tiang mẽsaq tao ngeraos kadu base saq ajaip nike lebih lẽman side pade. 19Laguq lẽq dalem kumpulan-kumpulan ibadah tipaq Tuhan, tiang demenan ngucapang lime ucapan saq bau piaq dengan paham ketimbang ngucapang beribu-ribu ucapan kadu base saq ajaip, adẽq tiang bau ngajah dengan lain. 20Semeton senamian, ndaq side bedowẽ pikiran maraq kanak-kanak. Lẽq hal kejahatan, side harus maraq kanak kodẽq. Laguq lẽq hal pikiran, side harus jari dengan saq dẽwase. 21Lẽq dalem Hukum Taurat araq tetulis, "Manik Tuhan, 'Lẽman dengan-dengan saq bedowẽ base saq lain, dait lẽman biwih dengan-dengan pendateng, Tiang gen bemanik tipaq bangse niki, timaq maraq nike ie pade ndẽq gen dengahang Tiang.' " 22Jari, paice ngeraos kadu base saq ajaip nike tande, ndẽqne jari dengan saq beriman, laguq jari dengan saq ndẽq beriman; dait paice jari benubuat nike tande, ndẽqne jari dengan saq ndẽq beriman, laguq jari dengan saq beriman. 23Keranaq nike, lamun misalne lẽq dalem kumpulan jemaah, selapuq jemaah ngeraos kadu base ajaip, terus araq dateng dengan luah, atao dengan-dengan saq ndẽq percaye lẽq Almasih, pasti dengan-dengan nike gen anggep side pade selapuq sampun jogang! 24Laguq lamun side selapuq benubuat, terus dateng dengan luah atao dengan saq ndẽq percaye lẽq Almasih, make hal-hal saq side kabarang nike gen nyatayang dose-dose dengan nike dait piaq ie sadar lẽq dose-dosene. 25Hal-hal saq ndẽq penggitan dalem atẽne gen tenyatayang, sehingge ie gen ngerendahang diriqne, beterus nyembah Allah. Ie gen ngaku bahwe Allah tetu-tetu araq lẽq tengaq-tengaq side pade. 26Jari, semeton senamian, napi arti selapuqne nike? Lamun side pade bekumpul, sebilang dengan harus araq saq teaturang: Sopoq dengan benyanyi, saq lain ngajahang, atao araq saq nyampẽang berite lẽman Allah, atao paice jari ngeraos kadu base saq ajaip, atao paice jari jelasang base saq ajaip nike, laguq selapuqne nike harus tekadu jari ngajahang dait jari pesolah selapuqne. 27Lamun araq saq mẽlẽ ngeraos kadu base saq ajaip, harus araq due atao paling luwẽq telu dengan doang secare begiliran, dait harus araq ẽndah saq jelasang napi artine saq teucapang siq dengan saq ngeraos nike. 28Lamun ndẽq araq saq tao jelasang hal nike, make dengan-dengan saq ngeraos kadu base saq ajaip nike harus engkah ngeraos lẽq dalem kumpulan ibadah nike. Alurang ie pade ngeraos lẽq dalem angenne mẽsaq tipaq Allah. 29Umaq ie pade saq mauq paice jari nabi, cume due atao telu dengan lẽq antare ie pade saq kanggo benubuat, dait saq lain merhatiang napi saq ie pade ucapang nike. 30Laguq lamun misalne berite lẽman Allah nike dateng tipaq sopoq dengan lain saq tokol lẽq dalem kumpulan ibadah nike, make dengan saq kenyeke ngeraos nike harus engkah ngeraos. 31Siq care nike, semeton senamian sopoq-sopoq bau benubuat; adẽq selapuqne bau nerimaq perajahan dait mauq kekuatan. 32Paice jari benubuat takluk tipaq nabi saq bedowẽ paice nike. 33Sẽngaq Allah nẽnten suke kekacoan, laguq damẽ sejahtere. Maraq saq berlaku lẽq dalem selapuq jemaah Allah, 34dengan nine harus tedoq lẽq dalem kumpulan jemaah. Ie pade ndẽq kanggo ngeraos. Ie pade harus taat lẽq prẽntah, maraq saq teatur lẽq Hukum Taurat. 35Lamun ie pade mẽlẽ nenaoq sopoq hal, solahan ie pade beketuan lẽq semamene lẽq balẽ. Ndẽqne patut lamun araq dengan nine ngeraos lẽq dalem kumpulan jemaah. 36Napi Manik Allah dateng lẽman side pade? Atao cume tipaq side doang manik nike tesampẽang? 37Lamun araq dengan saq merase bedowẽ paice jari nabi, atao bedowẽ paice saq lain, dengan nike harus sadar bahwe napi saq tiang tulis niki prẽntah lẽman Tuhan. 38Laguq lamun araq saq ndẽq mẽlẽ nerimaq, ndaq perhatiang ie. 39Keranaq nike semeton senamian, pade berusahe adẽq mauq paice benubuat, dait ndaq balaq dengan saq mẽlẽ ngeraos kadu macem-macem base saq ajaip. 40Laguq selapuqne harus telaksaneang secare bagus dait tertib.

will be added

X\