ROME 8

1Fadeso, azo so aga oko na Jésus Christ awe, ngbanga ayeke na li ti ala mbeni pepe. 2Biani, Ndia ti Yingo ayeke mu fini na zo na lege ti gango so zo ni aga oko na Jésus Christ. Ndia ti Yingo ni azi mbi na gbe ti ndia ti siokpari nga na ti kuâ awe. 3Ndia ti Moïse alingbi ti sara ye so lani pepe, ngbanga ti so aye so atia na ya ti fini ti zo akanga lege na ndia ti sarango ni, me Nzapa asara ni: lo tokua Molenge ti lo wani so amu tere ti zo – tere so ayeke tongana ti zo ti siokpari – titene lo zi azo na ya ti siokpari. Na lege so, Nzapa afâ ngbanga na ndö ti siokpari so ayeke sara kua na ya ti tere ti zo. 4Nzapa asara ye so titene e sara ye ti mbirimbiri so Ndia ahunda na e na ngangu ti sara; e so e yeke sara ye alingbi na asioni nzara ti be ti e mbeni pepe, me alingbi na ye so Yingo aye. 5Biani, azo so ayeke sara ye alingbi na asioni nzara ti be ti ala, be ti ala kue ayeke gi na ndö ni; me ala so ayeke sara ye alingbi na ye so Yingo aye, be ti ala kue ayeke gi na ndö ti aye ti Yingo. 6Asioni nzara ti be ti zo ayeke gue na lo na kuâ; me zo so be ti lo ayeke gi na ndö ti ye so Yingo aye, fade lo yeke duti na fini nga na siriri. 7Azo so be ti ala ayeke gi na ndö ti asioni nzara ti be ti ala, ala yeke awato ti Nzapa; ala ke ti sara ye alingbi na Ndia ti Nzapa, ala lingbi nga ti sara ni oko pepe. 8Azo so ayeke sara ye alingbi na asioni nzara ti be ti ala, be ti Nzapa alingbi ti nzere na ala pepe. 9Ti ala, ala yeke sara ye alingbi na asioni nzara ti be ti ala pepe, me ala yeke sara ye alingbi na ye so Yingo aye, ngbanga ti so Yingo ti Nzapa ayeke duti na be ti ala. Tongana zo ayeke na Yingo ti Christ pepe, lo yeke zo ti Christ pepe. 10Tongana Christ ayeke na be ti ala, Yingo ti lo ayeke sara si ala duti na fini, ngbanga ti so, na le ti Nzapa, ala ga azo ti mbirimbiri awe, ataa so tere ti ala aduti ti ku gi kuâ ndali ti siokpari. 11Nzapa azingo Jésus na kuâ. Tongana Yingo ti Nzapa ayeke duti na be ti ala, fade Nzapa so azingo Jésus Christ na kuâ ayeke sara titene tere ti ala so ayeke kui kuingo so aduti na fini na lege ti Yingo ti lo so aduti na be ti ala. 12Ndani laa a-ita, ambeni ye ayeke daa so alingbi e sara ni, me e yeke sara ni ndali ti asioni nzara ti be ti e pepe: ti duti na fini na lege ti anzara ti be ni. 13Tongana ala yeke duti na fini na lege ti asioni nzara ti be ti ala, fade ala yeke kui; me na lege ti Yingo, tongana ala zi na ya ti fini ti ala asioni sarango ye ti ala ti zo, fade ala yeke duti na fini. 14Biani, azo so Yingo ti Nzapa ayeke fa lege na ala, ala yeke amolenge ti Nzapa. 15Yingo so ala wara ayeke Yingo ti sarango ala na ngbaa pepe, Yingo ti ziango mbeto na be ti ala pepe, me Yingo so ayeke sara titene ala ga amolenge ti Nzapa. Na lege ti lo, e yeke dekongo na Nzapa, e tene: “Abba!”, so ti tene “Babâ!” 16Yingo-Vuru wani laa ayeke tene na yingo ti e, atene: e yeke amolenge ti Nzapa. 17So e yeke amolenge ti Nzapa, e yeke wara nga anzoni ye ti lo so lo mu zendo ni na azo ti lo; e na Christ laa e yeke wara anzoni ye ni. Biani, so e na Christ e yeke baa pasi legeoko so, fade e na lo nga, e yeke duti na ya ti gonda ti lo. 18Mbi baa mbi tene, apasi so e yeke baa laso so, a lingbi ti haka ni na gonda ti Nzapa pepe, gonda so lo yeke fa ni na le ti e gbanda so. 19Aye so kue Nzapa asara ayeke na nzara mingi ti ku ti baa amolenge ti Nzapa so lo yeke fa ande ala polele. 20Andaa aye ni ati na gbe ti buba ye awe. Aye ni wani laa ayeda ti ti pepe, Nzapa laa azia ala titene ala ti. Me aye ni angba lakue ti ku, 21ngbanga ti so fade a yeke zi ala na gbe ti ye so ayeke sara ala na ngbaa si ayeke buba ala so. Tongaso ala yeke li na ya ti gonda so ayeke ti amolenge ti Nzapa so asigigi na gbe ti ngbaa. 22Biani, e hinga so laso, aye ti dunia so kue Nzapa asara ayeke baa pasi si ala yeke dema tongana wali so ayeke du molenge. 23Gi aye ti dunia oko pepe si ayeke dema: e so e wara Yingo tongana kozo nzoni ye so Nzapa amu na e, e nga, e yeke dema na ya ti be ti e ti ku titene Nzapa asara si e ga amolenge ti lo, so ti tene lo zi e na gbe ti ngbaa, e na tere ti e kue. 24Andaa Nzapa asoo e na kuâ awe gi na lege so e zia be ti e ti ku ye so lo mu na e. Me ye so zo azia be ti lo ti ku ni, tongana lo baa ni awe, lo lingbi ti kiri ti zia be ti lo ti ku ni pepe. Tongana zo abaa ye awe, fade lo yeke kiri ti zia be ti lo ti ku ni? 25Me tongana e zia be ti e ti ku ye so le ti e ade ti baa pepe, fade e yeke kanga be ti e ti ku ni. 26Yingo-Vuru nga ayeke mu maboko na e, e so e de ti kpengba pepe so. Biani, e hinga ti sambela na legeni pepe, me Yingo wani ayeke sambela ndali ti e, lo yeke dema na lege ti atënë so zo alingbi ti tene pepe. 27Nzapa so ayeke baa ya ti be ti zo ahinga ye so Yingo aye. Biani, Yingo ayeke sambela ndali ti azo ti Nzapa na lege so Nzapa aye. 28E hinga so, ye kue abongbi ti sara nzoni na azo so aye Nzapa, azo so lo iri ala na lege so be ti lo aye. 29Biani, azo so Nzapa asoro ala kozoni, lo leke na be ti lo kozoni ti sara si ala ga tongana Molenge ti lo, tongaso si Molenge ni aga yaya ti a-ita mingi. 30Azo so Nzapa aleke ye so kozoni na be ti lo ndali ti ala, lo iri nga ala, ala so lo iri ala, lo sara si ala ga nga mbirimbiri, ala so lo sara si ala ga mbirimbiri, lo gonda nga ala. 31Tongaso, fade e yeke tene nyen na ndö ti tënë so? Tongana Nzapa ayeke na e, zo wa laa alingbi ti ke e? 32Nzapa agbanzi Molenge ti lo na e pepe, me lo ka lo ndali ti e kue; fade lo yeke ke ti mu na e aye kue tongana nyen? 33Azo so Nzapa asoro ala awe so, zo wa laa alingbi ti bi tënë na li ti ala? Zo oko pepe, ngbanga ti so Nzapa asara si ala ga mbirimbiri awe. 34Zo wa laa alingbi ti fâ ngbanga na li ti ala? Zo oko pepe, ngbanga ti so Jésus Christ akui awe si na pekoni, lo zingo na kuâ, lo yeke duti na tere ti Nzapa, na mbage ti maboko ti lo ti koli si lo yeke sambela ndali ti e. 35Zo wa laa alingbi ti kangbi e na ndoye ti Christ? Pasi, wala mbeto, wala aye ti ngangu, wala nzara, wala dutingo na ye pepe, wala ye ti sioni so ayeke hara e wala kuâ? 36Tongana ti so Mbeti ti Nzapa atene: “Lakue, ti londo na ndaperere ngbii asi na lakui, azo ayeke gi e ti fâ e ndali ti mo; azo ayeke baa e tongana ataba so a yeke gue na ala na ndo ti fango ala.” 37Me na ya ti aye so kue, e hon na ngangu ndali ti Jésus so aye e. 38Biani, mbi hinga so mbeni ye ti kangbi e na ndoye ti Christ ayeke daa pepe: ataa kuâ, ataa fini, ataa a-ange, ataa angangu yingo so ayeke sara komandema, ataa aye ti fadeso, ataa aye ti kekereke, 39ataa angangu ti nduzu, ataa angangu ti gbe ti sese, ataa mbeni ye oko so Nzapa asara, mbeni ye oko alingbi ti kangbi e pepe na ndoye so Nzapa afa na e na lege ti Jésus Christ, Kota Gbia ti e.

will be added

X\