ROME 6

1Tongaso, fade e yeke tene nyen? Alingbi e ngba na ya ti siokpari si nzoni be ti Nzapa awu ahon ndoni? 2Oko pepe! E so e kui si e kangbi na siokpari awe so, fade e yeke ngba na ya ti siokpari tongana nyen? 3Ala hinga pepe? E wara bateme titene e duti oko na Jésus Christ, so ti tene e wara bateme ni ti duti oko na lo na lege ti kuâ so lo kui. 4Tongaso, na lege ti bateme, a lu e legeoko na Christ si e ga oko na lo na lege ti kuâ so lo kui; me Christ azingo na kuâ na lege ti ngangu ti Babâ titene e nga, e sara si dutingo ti e aga nde. 5Biani, so e ga oko biani na Christ na lege ti kuâ so e kui tongana lo, e yeke ga nga oko na lo na lege ti zingongo na kuâ tongana ti lo. 6E hinga so dutingo ti e ti kozo akui legeoko na Christ na ndö ti keke ti kroa awe. Tongaso sioni nzara ti be ti e akui nga si e kiri e duti na gbe ti ngbaa ti siokpari pepe. 7Biani, zo so akui awe, lo sigigi na gbe ti ngangu ti siokpari awe. 8Me so e na Christ e kui awe so, e ma na be so e na lo e yeke duti nga na fini. 9E hinga nga so Christ azingo na kuâ awe, lo yeke kiri ti kui pepe, kuâ ayeke na ngangu na ndö ti lo mbeni pepe. 10Kuâ so Christ akui, lo kui gi fani oko awe ndali ti siokpari; me fini so lo yeke na ni fadeso, lo yeke na ni ndali ti Nzapa. 11Ala nga, alingbi ala baa tere ti ala tongana ti so ala kui awe ti kangbi na siokpari si na lege ti gango so ala ga oko na Jésus Christ, ala yeke na fini ndali ti Nzapa. 12Nilaa, alingbi siokpari akiri ale-gbia pepe na ndö ti tere ti ala so ayeke kui ande kuingo so, tongaso si ala sara ye na lege ti asioni nzara ti be ti ala pepe. 13Ala mu mbage ti tere ti ala oko pepe ti sara na siokpari si aga ye ti sarango na ye ti kirikiri. Me ala mu tere ti ala kue na Nzapa tongana azo so azingo na kuâ awe si ayeke na fini; ala mu tere ti ala kue ti sara na kua ti lo si tere ti ala ni aga ye ti sarango na ye ti mbirimbiri. 14Biani, siokpari ayeke kiri ti sara komandema na ndö ti ala pepe, ngbanga ti so ala yeke na gbe ti Ndia mbeni pepe, me na gbe ti nzoni be ti Nzapa. 15Nyen? So e sigigi na gbe ti Ndia awe si e yeke na gbe ti nzoni be ti Nzapa so, so laa ayeke mu lege na e ti sara siokpari? Oko pepe! 16Ala hinga pepe? Tongana ala mu tere ti ala na ngbaa na gbe ti mbeni zo, ti ma yanga ti lo, ala ga angbaa ti zo so ala yeke ma yanga ti lo so awe. So ti tene, tongana ala mu tere ti ala na siokpari, ala ga angbaa ti siokpari awe si siokpari ayeke gue na ala na kuâ, me tongana ala mu tere ti ala ti ma yanga ti Nzapa, Nzapa ayeke sara si ala ga mbirimbiri na le ti lo. 17E mu singila na Nzapa: ando, ala yeke angbaa ti siokpari, me fadeso, ala yeda na be ti ala kue na taa-tënë so a fa na azo kue si ala, azo ti Rome, ala yeda nga na ni. 18Nzapa azi ala na gbe ti siokpari awe si ala ga angbaa ti sarango ye ti mbirimbiri. 19Mbi yeke mu tapande ti dutingo ti azo ndali ti so hingango ndo ti ala ayeke ngangu. Ando, ala mu tere ti ala na ngbaa ti sara na aye ti kamene na aye ti kirikiri, aye so asara si ala ke yanga ti Nzapa. Legeoko nga, fadeso, alingbi ala mu nga tere ti ala na ngbaa ti sara aye ti mbirimbiri, so ayeke sara si fini ti ala aduti nde ndali ti Nzapa. 20So ala yeke ando angbaa ti siokpari, sarango ye ti mbirimbiri anzere na be ti ala pepe! 21Aye so ando ala yeke sara so, nzoni ye ti nyen laa ala wara daa? Fadeso aye ni asara ala kamene, ngbanga ti so ye ti peko ni ayeke gi kuâ! 22Ti fadeso, Nzapa azi ala na gbe ti ngbaa ti siokpari awe si ala ga angbaa ti lo. Ye so ala yeke wara na peko ni ayeke fini so a zia nde ndali ti Nzapa si na ndani, ayeke fini so angba lakue lakue. 23Biani, futa ti siokpari ayeke kuâ; me nzoni ye so Nzapa ayeke mu na zo senge senge ayeke fini so angba lakue lakue, na lege ti gango so e ga oko na Jésus Christ, Kota Gbia ti e.

will be added

X\