ROME 3

1Tongaso, ye so azuife ahon azo ti amara nde na ni ayeke nyen? Ye ti nzoni so zo ayeke wara na lege ti fango ganza ayeke nyen? 2Biani, ye ti nzoni ni ayeke kota na ya ti aye mingi. Kozo ye ni ayeke so Nzapa azia atënë ti lo na maboko ti azuife. 3Nyen? So ambeni zuife ake ti bata tënë ti yanga ti lo so, so laa akanga lege na Nzapa ti bata tënë ti yanga ti lo? 4Oko pepe! Alingbi azo ahinga atene, Nzapa ayeke sara ye na lege ti taa-tënë, me azo kue ayeke azo ti mvene. Nilaa Mbeti ti Nzapa atene: “Fade azo ayeke hinga atene, mo yeke mbirimbiri na lege ti tënë ti yanga ti mo si na ndembe so azo aye ti fâ ngbanga ti mo, mo sigigi na ya ti tënë ni.” 5Me so sarango ye ti kirikiri ti e asara si mbirimbiri ti Nzapa asigigi na le ti azo kue so, mbeni tënë ti tenengo ni ayeke daa? Nzapa ayeke kirikiri, ngbanga ti so lo yeke pika e na ngonzo ti lo? (Mbi tene tënë so tongana ti so azo ayeke tene.) 6Oko pepe! Tongana ye ni ayeke tongaso, fade Nzapa ayeke fâ ngbanga ti azo tongana nyen? 7Me tongana mvene ti mbi ayeke sara titene taa-tënë ti Nzapa asigigi polele si azo ayeke gonda lo, ndali ti nyen si a fâ ngbanga na li ti mbi tongana zo ti siokpari so? 8Ngbanga ti nyen si e lingbi ti tene pepe, e tene: “E sara ye ti sioni si nzoni ye asigigi daa”? Biani, ambeni zo ni ayeke zonga mbi si ala yeke du mvene na li ti mbi atene, mbi laa mbi tene tënë so. Ti azo ni so, ala lingbi titene Nzapa afâ ngbanga na li ti ala! 9Nyen? E azuife, e hon tanga ti azo kue? Oko pepe! Mbi fa tënë so kozoni awe, mbi tene: azuife na azo ti amara nde kue ayeke na gbe ti komandema ti siokpari. 10Mbeti ti Nzapa atene: “Zo ti mbirimbiri ayeke daa pepe, ataa oko ayeke daa pepe. 11Zo ti hingango ndo ayeke daa pepe, zo ti gingo lege ti Nzapa ayeke daa pepe. 12Azo kue azia nzoni lege awe, ala kue abuba awe. Zo ti sarango nzoni ayeke daa pepe, ataa oko ayeke daa pepe. 13Tënë ti yanga ti ala ayeke fâ zo fango, menga ti ala ayeke ti handango na zo, tënë ti yanga ti ala ayeke sara sioni tongana ngu ti yanga ti ngbo. 14Atënë ti yanga ti ala asi singo na tënë ti dengo ba nga na tënë ti songo be. 15Gere ti ala ayapu ti gue ti tuku mene, 16ndo so kue ala hon daa, ala yeke buba ye si ala yeke zia azo na ya ti vundu, 17ala hinga lege ti dutingo na siriri pepe. 18Ala yeke kpe mbeto ti Nzapa oko pepe. 19E hinga so atënë ti Ndia kue abaa azo so ayeke na gbe ti Ndia. Tongaso si zo oko awara tënë ti kiringo na ni pepe si na le ti Nzapa, ngbanga ayeke na li ti azo ti dunia kue. 20Ndani laa, tongana zo asara ye kue alingbi na Ndia, so laa ayeke sara si lo ga mbirimbiri na le ti Nzapa pepe. Andaa Ndia ayeke mu gi lege na zo ti hinga so lo sara siokpari awe. 21Me fadeso, Nzapa afa so, zo yeke ga mbirimbiri na lege ti Ndia pepe. Ndia ti Moïse na ambeti ti awayanga-Nzapa afa tënë ni awe. 22Nzapa asara si azo aga mbirimbiri na le ti lo na lege so ala ma na be na Jésus Christ. Lo sara ni ndali ti azo so kue ama na be na Christ, ngbanga ti so kangbi ayeke na popo ti ala pepe: 23azo kue asara siokpari awe, ala lingbi ti baa gonda ti Nzapa pepe. 24Me na lege ti nzoni be ti Nzapa, lo sara si azo aga mbirimbiri gi senge senge na lege ti Jésus Christ so azi ala na ya ti siokpari. 25Nzapa amu Jésus Christ na sandaga si na lege ti mene ti lo, Christ azi siokpari ti azo so ama na be. Nzapa asara so ti fa atene, lo yeke mbirimbiri: asiokpari so azo asara ando, lo fâ ngbanga na li ti ala ndali ni pepe 26na ngoi so lo kanga be ti lo ti ku ala. Ti fadeso, lo fa so lo yeke mbirimbiri si lo ye titene azo so ama na be na Jésus aga mbirimbiri na le ti lo. 27Ye titene zo agonda tere ti lo ngbanga ni ayeke daa? Oko pepe! Lo yeke gonda tere ti lo ngbanga ti nyen? Ngbanga ti so lo sara ye alingbi na Ndia? Oko pepe! Me ngbanga ti so lo ma na be. 28Biani, e lingbi ti tene tongaso: zo ayeke ga mbirimbiri na le ti Nzapa na lege ti mabe, me ndali ti sarango ye ti lo na lege ti Ndia pepe. 29Wala Nzapa ayeke gi Nzapa ti azuife awe? Lo yeke nga Nzapa ti azo ti mara nde pepe? Biani, lo yeke nga Nzapa ti azo ti amara nde, 30ngbanga ti so Nzapa ayeke gi oko. Lo yeke sara titene azuife na azo ti amara nde kue aga mbirimbiri na le ti lo na lege ti mabe. 31Tongaso, na lege ti mabe, e yeke baa Ndia tongana senge ye? Oko pepe! Me e mu nengo na Ndia.

will be added

X\