ROME 16

1Mbi hunda na ala ti yamba Febe, ita ti e ti wali, lo yeke diakre na Eglize ti Sankre. 2Na lege ti gango so e ga oko na Kota Gbia, ala yamba lo tongana ti so azo ti Nzapa ayeke sara lakue. Tongana lo hunda na ala mbeni ye so atia lo, ala mu maboko na lo, ngbanga ti so lo mu maboko na azo mingi; mbi nga, lo mu maboko na mbi. 3Ala bara na mbi Priscille na Akilas, amba ti mbi so mbi na ala, e yeke sara kua ti Jésus Christ. 4Angba kete ala wara kuâ ndali ti mbi na ndembe so ala ye ti soo mbi na kuâ. Gi mbi oko laa mbi yeke mu singila na ala pepe, me a-Eglize kue ti amara nde. 5Ala bara na mbi azo ti Eglize so ayeke bongbi na da ti Priscille na Akilas. Ala bara na mbi Epainete so mbi ye lo mingi; lo yeke kozo zo ti sese ti Azii so ama na be na Christ. 6Ala bara na mbi Marie so asara kua mingi ndali ti ala. 7Ala bara na mbi Andronikus na Yunias; ala yeke azo ti sewa ti mbi so lani mbi na ala e yeke na da ti kanga; ala yeke awatokua ti Christ so azo ahinga ala nzoni mingi, ala yeke azo so amu tere ti ala na Christ kozo ti mbi. 8Ala bara na mbi Ampliatus so mbi ye lo mingi na lege ti gango so e ga oko na Kota Gbia. 9Ala bara na mbi Urben, mba ti e so e na lo, e yeke sara kua ti Christ; lo na Stakis, ita so mbi ye lo mingi. 10Ala bara na mbi Apeles so afa biani so lo yeke taa zo ti Christ. Ala bara na mbi azo ti da ti Aristobule. 11Ala bara na mbi Herodion, zo ti sewa ti mbi. Ala bara na mbi azo ti da ti Narcisse, ala so aga oko na Kota Gbia. 12Ala bara na mbi Trifene na Trifoze so amu be ti ala kue ti sara kua na Kota Gbia. Ala bara na mbi Perside so mbi ye lo mingi, lo so lo mu be ti lo kue ti sara kua na Kota Gbia. 13Ala bara na mbi Rufus so Kota Gbia asoro lo; ala bara nga na mbi mama ti lo so ayeke nga tongana mama ti mbi. 14Ala bara na mbi Asenkrite, Flegon, Hermes, Patrobas, Hermas na a-ita so kue ayeke na tere ti ala. 15Ala bara na mbi Filologe na Julie, Nere na ita ti lo ti wali; ala bara nga na mbi Olenpas na azo ti Nzapa so kue ayeke na tere ti ala. 16Ala bara tere na popo ti ala na lege ti sungo ngbangba so ayeke nzoni na le ti Nzapa. A-Eglize ti Christ kue abara ala. 17A-ita, ye so mbi hunda na ala mingi ayeke so: ala sara hange na azo so ayeke ga na tënë ti kangbi nga na tënë so asara si azo ati na ya ti siokpari; azo ni azia lege ti tënë so e fa na ala so awe. Ala zia lege ti azo ni so, 18ngbanga ti so azo ni ayeke sara kua ti Christ, Kota Gbia ti e pepe, me ala yeke gi gi kobe ti ya ti ala. Anzoni tënë na anzerengo tënë ayeke sigigi na yanga ti ala ti handa na azo so le ti ala azi pepe. 19Ti ala, a-ita, azo kue ahinga atene, ala yeke azo ti mango tënë. Tongaso be ti mbi anzere na ala, me mbi ye titene ala duti azo ti ndara ti sara ye so ayeke nzoni, ala duti nzoni ti ke lege ti ye ti sioni. 20Nzapa so ayeke mu siriri na zo aga nduru ti nika Satan na gbe ti gere ti ala awe. Ayeke nzoni Kota Gbia ti e Jésus asara nzoni be na ala! 21Timothée, mba ti mbi so mbi na lo e yeke sara kua abara ala. Lusius, Yason na Sosipater, azo ti sewa ti mbi nga abara ala. 22Mbi Tersius, zo ti sungo mbeti so, mbi bara ala na iri ti Kota Gbia. 23Gaius so ayamba mbi na da ti lo abara ala; azo ti Eglize ayeke bongbi na da ti lo. Eraste, wabatango-nginza ti gbata ni, lo na Kartus, ita ti e, abara ala. [ 24Ayeke nzoni Kota Gbia ti e Jésus asara nzoni be na ala kue! Amen.] 25Ayeke nzoni e gonda Nzapa! Lo yeke na ngangu ti sara si ala kpengba na lege ti mabe so alingbi gi na Nzoni Tënë ti Jésus Christ so mbi yeke fa. Nzoni Tënë ni ayeke tënë so Nzapa ahonde ando ngu na ngu si lo fa ni na e fadeso. 26Fadeso, a fa tënë ni polele na ya ti ambeti ti awayanga-Nzapa. Nzapa so ayeke kpu na kpu, lo mu yanga si a fa tënë so na azo ti amara kue titene ala ma na be si ala ma yanga ti lo. 27Nzapa oko laa ayeke na ndara. Gonda ayeke ti lo kpu na kpu na lege ti Jésus Christ! Amen.

will be added

X\