ROME 13

1Alingbi azo kue ama yanga ti akota zo ti li ti kodro, ngbanga ti so komandema kue alondo na Nzapa; akota zo ti li ti kodro, Nzapa laa azia ala na ndö ti mbata ti komandema. 2Tongaso, zo so ake ti ma yanga ti akota zo ti li ti kodro, andaa lo ke ye so Nzapa aleke ni awe. Azo so asara ngangu li na akota zo ti li ti kodro, fade ala wani ayeke gi ngbanga na li ti ala. 3Zo so ayeke sara nzoni ye, mbeto ti azo ti komandema alingbi ti sara lo pepe, me zo so asara sioni ye, lo laa lo lingbi ti sara mbeto ti azo ti komandema. Tongana mo ye titene mbeto ti akota zo ti li ti kodro asara mo pepe, ayeke nzoni mo sara nzoni ye si fade ala gonda mo. 4Biani, akota zo ti li ti kodro ayeke sara kua na Nzapa ti pusu mo ti sara nzoni ye. Me tongana mo sara sioni ye, mo sara mbeto ti ala! So ala yeke na ngangu ti fango ngbanga na li ti azo, nda ni ayeke daa: tongana ala yeke fâ ngbanga, ala yeke sara kua na Nzapa ti sara si ngonzo ti lo alondo na tere ti azo so asara sioni. 5Ndani laa, ayeke nzoni ala ma yanga ti akota zo ti li ti kodro; ala sara ni gi ti kpe ngonzo ti Nzapa pepe, me ngbanga ti so ala hinga na be ti ala atene, so ayeke na legeni. 6Ndani so ala yeke futa nga lapo laa. Biani, azo ti rongo nginza ti lapo ayeke sara kua na Nzapa na ndembe so ala yeke sara kua ti ala. 7Ala futa na zo oko oko ye so alingbi ala futa na lo: ala futa lapo na azo ti rongo nginza ti lapo, ala futa nga lapo ti ndö ti aye nde nde na azo so alingbi ala futa ni na ala. Ala kpe mbeto ti zo so alingbi ala kpe mbeto ti lo, ala ne zo so alingbi ala ne lo. 8Ala sara si yongo ti mbeni zo angba na li ti ala pepe, me gi yongo ti yengo tere ti ala na popo ti ala. Zo so aye amba ti lo, andaa lo sara awe ye so kue Ndia atene tënë ni. 9Biani, atënë ti ndia atene: “Mo gi wali wala koli ti zo pepe, mo fâ zo pepe, mo nzi pepe, mo sara nzara ti ye ti zo pepe.” Andaa atënë ti ndia so na atanga ni kue abongbi oko na ya ti tënë oko so atene: “Mo ye mba ti mo zo tongana ti so mo ye tere ti mo wani.” 10Tongana zo aye mba ti lo, lo yeke sara sioni na mba ti lo ni pepe. Nilaa, zo so aye mba ti lo, andaa lo sara awe ye so kue Ndia atene tënë ni. 11Ala sara tongaso, ndali ti so ala hinga ngoi so e yeke daa fadeso awe: ngoi titene ala zingo na lango alingbi awe! Fadeso, ngoi titene Nzapa asoo e na kuâ aga nduru awe ahon ti lani so e ma na be. 12Ndo avuko aninga awe, ndo aga nduru ti han. Tongaso, e zia lege ti sarango aye ti vukongo ndo, e yu aye ti bira ti kota lâ. 13Alingbi fini ti e aduti na legeni mbirimbiri tongana ti azo so ayeke sara ye na kota lâ. E te kobe wala e nyon samba ahon ndoni pepe, e sara aye ti kirikiri wala aye ti ndumba pepe, e papa wala e sara kota be pepe. 14Me ala yu Kota Gbia Jésus Christ tongana ye ti bira. Ala zia lege pepe na be ti ala so ayeke pusu ala ti sara ye alingbi na asioni nzara ti lo.

will be added

X\