ROME 11

1Mbi hunda ndo, mbi tene: Nzapa ake azo ti lo awe? Oko pepe! Mbi wani, mbi yeke nga zo ti Israel, mbi yeke hale ti Abraham, zo ti mara ti Benjamin. 2Nzapa ake azo ti lo pepe, azo ti lo so lo soro ala kozoni so. Na ya ti Mbeti ti Nzapa, ala hinga pepe tënë ti Élie so adema tere ti lo na Nzapa ndali ti sarango ye ti azo ti Israel so? Lo tene: 3“Kota Gbia, ala fâ awayanga ti mo awe si ala buba nga agbalaka ti mo awe; mbi ngba gi mbi oko si ala yeke gi lege ti fâ mbi.” 4Me tënë ti nyen laa Nzapa akiri na ni na lo? Nzapa atene: “Azo saki mbarambara ayeke daa, mbi bata ala ndali ti mbi wani, ala yeke azo so ake ti kuku na gbe ti nzapa Baal.” 5Na ngoi ti fadeso nga, tanga ti ambeni zo angba, ala so Nzapa asoro ala na lege ti nzoni be ti lo. 6Nzapa asoro azo na lege ti nzoni be ti lo, lo soro ala ndali ti sarango ye ti ala pepe. Tongaso pepe, ka nzoni be ti Nzapa angba nzoni be mbeni pepe. 7Nyen? Ye so azo ti Israel agi, ala wara ni pepe, gi azo so Nzapa asoro ala laa awara ye ni. Me ti tanga ti azo ni, Nzapa asara si mango ya ti tënë ni aga ngangu na ala, 8tongana ti so Mbeti ti Nzapa atene: “Nzapa akanga lege ti hingango ndo ti ala, lo kanga le ti ala titene ala baa ndo pepe, lo kanga mê ti ala titene ala ma tënë pepe; lo sara tongaso ngbii asi laso.” 9David atene nga, atene: “Ayeke nzoni akobe ti matanga ti ala aga kuku ndali ti ala, aga gbanda ti gbungo ala, aga mbeni ye ti kindango ala, futa ti asioni ti ala! 10Ayeke nzoni le ti ala avuko, ala kiri abaa ndo oko pepe! Sara si peko ti ala aba bango lakue!” 11Tongaso mbi hunda ndo, mbi tene: so azuife apika gere ti ala si ala ti so, ala ti biani biani awe? Oko pepe! Me ndali ti tingo ti azuife, azo ti amara nde awara lege ti soo kuâ, tongaso si kota be asara azuife. 12Ndali ti so azuife ake ti ma yanga ti Nzapa, azo ti dunia awara anzoni ye mingi; na lege ti tingo ti ala, azo ti amara nde awara nga anzoni ye mingi. Tongana azuife kue akiri ande ti soo kuâ, fade anzoni ye ni ayeke kiri ti hon ndoni pepe? 13Ala so ayeke azo ti amara nde, fadeso mbi yeke tene tënë na ala: mbi wani, mbi yeke watokua ti azo ti amara nde. Mbi yeke gonda kua ti mbi ni, 14ti sara si, tongana lege ayeke daa, azo ti mara ti mbi asara kota be si mbi soo ambeni na popo ti ala. 15So Nzapa apusu azuife yamba so, ni laa asara si songo akiri na popo ti azo ti dunia na Nzapa. Tongana Nzapa akiri ande na azuife na tere ti lo, fade ye ni ayeke duti tongana nyen? Ye ni ayeke duti tongana ti azo so akui si akiri na fini! 16Tongana a zia akozo mapa nde ndali ti Nzapa, tanga ti mapa ni kue ayeke ti lo. Tongana zo amu gunda ti keke na Nzapa, amaboko ti keke ni kue ayeke nga ti lo. 17Azo ti Israel ayeke tongana keke ti olive ti yaka so a fâ ambeni maboko ni. Ti mo, mo yeke tongana maboko ti keke ti olive ti ngonda; a mu mo si a gerefe mo na popo ti amaboko so angba na ndö ti keke ti yaka ni. Fadeso mo lingbi nga ti baa nzoni legeoko na amaboko ti keke ti yaka ni ndali ti ngu so alondo na ya ti gunda ni. 18Ndani laa, mo pika kate ti mo pepe, mo tene, mo laa mo hon amaboko ti keke so a fâ ni so. Mo ye ti gonda tere ti mo? Mo laa mo yo gunda ti keke ni pepe, me gunda ti keke ni laa ayo mo! 19Fade mo yeke tene: “A fâ amaboko ti keke ni titene a gerefe mbi na ndö ti keke ni.” 20Tënë ni laa. Me a fâ amaboko ti keke ni, ngbanga ti so ala ma na be pepe. Ti mo, mo ngba na tere ti keke ni, ngbanga ti so mo ma na be. Tongaso, mo pika kete ti mo pepe, me mo sara gi hange. 21Biani, so Nzapa afâ taa amaboko ti keke ni so, mo laa Nzapa ayeke bata ande mo? 22Baa, Nzapa ayeke Nzapa ti nzoni be, lo yeke nga Nzapa so fango ngbanga ti lo aso mingi. Fango ngbanga ti lo aso na tere ti azo so ati, me lo yeke sara nzoni be na mo. Alingbi mo ngba ti duti na ya nzoni be ti lo, tongaso pepe, fade a yeke zi nga mo tongana ti so a zi maboko ti keke so. 23Ti azuife, tongana ala yeda ti ma na be, fade lo yeke kiri ti gerefe ala na ndö ti keke ni, ngbanga ti so lo yeke na ngangu ti kiri ti gerefe ala. 24Mo, mo yeke tongana maboko ti keke ti olive ti ngonda so Nzapa afâ si agerefe ni na ndö ti keke ti olive ti yaka, ataa so lege ti sarango ni laa pepe. Ti azuife, ala yeke tongana amaboko ti keke ti olive ti yaka. Tongaso, fade Nzapa ayeke kiri ti gerefe ala nzoni mingi na ndö ti keke so ala sigigi lani daa! 25A-ita, mbi ye titene ala hinga taa-tënë so a sigigi na nda ni awe, tongaso si ala baa tere ti ala tongana azo ti ndara pepe. Tënë ni ayeke so: fade ambeni zo ti Israel ayeke ngba ti sara ngangu li ngbii asi na ndembe so wungo ti azo ti amara nde alingbi, so ti tene ala so ayeke li na popo ti azo ti Nzapa. 26Tongaso laa, fade a yeke soo azo ti Israel kue na kuâ, tongana ti so Mbeti ti Nzapa atene: “Fade zo ti zingo azo ayeke londo na Sion ti ga, lo yeke zi asioni kue na popo ti azo ti mara ti Jacob. 27Baa, mbuki so mbi na ala e yeke sara ni laa, tongana mbi yeke zi asiokpari ti ala.” 28Azuife ake Nzoni Tënë awe, nilaa ala ga awato ti Nzapa; ye so asi ndali ti nzoni ti ala, azo ti amara nde. Me Nzapa asoro azuife titene ala ga azo ti lo, lo ye ala ndali ti akotara ti ala. 29Biani, tongana Nzapa amu ye na zo awe, lo yeke kiri ti zi ni na maboko ti lo pepe; tongana Nzapa airi mbeni zo awe, lo yeke kiri ti ke lo pepe. 30Ando, ala azo ti amara nde, ala ke yanga ti Nzapa; me fadeso, Nzapa abaa mawa ti ala, ndali ti so azuife ama yanga ti lo pepe. 31Ti azuife, ye ni ayeke nga tongaso: fadeso, ala ke ti ma yanga ti Nzapa titene Nzapa abaa mawa ti ala, azo ti amara nde. Tongaso, ti fadeso, Nzapa alingbi ti baa nga mawa ti azuife. 32Biani, Nzapa asara si azo kue aga azo ti kanga ndali ti kengo yanga, tongaso si lo baa mawa ti azo kue. 33Anzoni ye ti Nzapa ayeke kota biani! Ndara ti lo na hingango ye ti lo ayeke kota ahon ndoni! Zo wa laa alingbi ti hinga nda ti fango ngbanga ti lo? Zo wa laa alingbi ti hinga tënë ti be ti lo? 34Mbeti ti Nzapa atene: “Zo wa laa ahinga tënë ti be ti Kota Gbia? Zo wa laa alingbi ti mu wango na lo? 35Zo wa laa amu ye na Nzapa kozoni titene Nzapa akiri afuta mbeni ye na lo?” 36Biani, ye kue alondo na Nzapa, ye kue ayeke duti na lege ti lo, ye kue ayeke ndali ti lo. Gonda ayeke ti lo kpu na kpu! Amen.

will be added

X\