ROME 10

1A-ita, tënë so agbu be ti mbi si mbi yeke sambela Nzapa ndali ti azuife, ayeke titene ala soo kuâ. 2Biani, ye so mbi hinga si mbi yeke tene tënë ni ayeke so, azuife ayeke na nzara mingi ti sarango kua ti Nzapa, me ala hinga taa lege ti kua ni pepe. 3Lege so Nzapa aleke titene zo amu si lo ga mbirimbiri na le ti lo, azuife ahinga ni pepe, ala leke lege ti ala wani ti ga mbirimbiri. Tongaso ala ke lege so Nzapa aleke titene zo amu si lo ga mbirimbiri. 4Biani, Christ asara si Ndia ti Moïse asi na nda ni, tongaso si azo so kue ama na be, ala ga mbirimbiri na le ti Nzapa. 5Na ndö ti tënë ti gango mbirimbiri na lege ti sarango ye so Ndia afa, Moïse asu na mbeti, atene: “Zo so asara ye alingbi na atënë ti ndia, fade lo yeke na fini ndali ni.” 6Me tënë ti gango mbirimbiri na lege ti mabe, a tene tongaso: “Ayeke nzoni mo tene na be ti mo pepe, mo tene: ‘Zo wa laa ayeke gue ande na yayu?’ Tongana mo tene tongaso, andaa mo ye ti mu Christ ti zu na lo na sese. 7Mo tene nga pepe, mo tene: ‘Zo wa laa ayeke li ande na gbe ti sese?’ Tongana mo tene tongaso, andaa mo ye ti mu Christ na popo ti akuâ ti sigigi na lo.” 8Tënë ni atene: “Tënë ni ayeke nduru na tere ti mo, tënë ni ayeke na yanga ti mo, tënë ni ayeke na be ti mo.” Tënë ni ayeke tënë ti mabe so e yeke fa. 9Tongana mo tene na yanga ti mo wani, mo tene: “Jésus ayeke Kota Gbia” si mo ma na be so Nzapa azingo lo na popo ti akuâ, fade mo yeke soo kuâ. 10Biani, tongana zo ama na be, lo ga mbirimbiri; tongana lo tene tënë ni na yanga ti lo, lo yeke soo kuâ. 11Mbeti ti Nzapa atene: “Zo so ama na be na lo, fade kamene ayeke sara lo pepe.” 12Tongaso, azuife na azo ti amara nde kue ayeke gi legeoko: Kota Gbia ti ala ayeke gi oko, lo yeke mu anzoni ye mingi na ala so kue airi lo titene lo mu maboko na ala. 13Ndani laa, Mbeti ti Nzapa atene: “Zo so kue ayeke iri Kota Gbia ti mu maboko na lo, fade lo yeke soo kuâ.” 14Me fade azo ayeke iri lo titene lo mu maboko na ala tongana nyen so ala ma na be na lo pepe so? Fade ala yeke ma na be na lo tongana nyen so ala ma tënë ti lo pepe so? Fade ala yeke ma tënë ti lo tongana nyen so zo ti fango tënë ti lo na ala ayeke daa pepe so? 15Fade azo ayeke fa tënë ni tongana nyen so a tokua ala pepe so? Mbeti ti Nzapa atene nga: “So ayeke nzoni ye mingi ti baa azo so aga ti fa anzoni tënë!” 16Me azo kue laa ayeda na Nzoni Tënë ni pepe, nilaa Ésaïe atene: “Kota Gbia, zo wa laa ayeda na tënë so e fa?” 17Tongaso, mabe aga na lege ti mango tënë, mango tënë aga na lege ti fango tënë ti Christ. 18Tongaso mbi hunda ndo, mbi tene: azo ti Israel ama tënë so a yeke fa so pepe? Biani, ala ma tënë ni kue! Mbeti ti Nzapa atene: “Azo ama go ti azo ti fango tënë na ndö ti sese kue, tënë ti ala asi na nda ti dunia kue.” 19Mbi kiri mbi hunda ndo, mbi tene: azo ti Israel ade ti ma ya ti tënë so pepe? Moïse ayeke kozo zo ti kiri tënë, lo tene: “Fade mbi yeke sara si kota be asara ala na tere ti azo so mara ti ala ayeke taa mara pepe; mbi yeke sara si be ti ala aso na tere ti azo ti mara so ahinga ndo pepe.” 20Ésaïe atene tënë ni na mbeto pepe, lo tene: “Azo so agi mbi pepe, ala laa awara mbi; azo so ahunda ye na mbi pepe, ala laa mbi fa tere ti mbi na ala.” 21Me na ndö ti tënë ti azo ti Israel, Nzapa atene: “Lakue, ti londo na ndaperere ngbii asi na lakui, mbi yeke gi lege ti sara songo na azo, andaa azo ni ayeke azo ti kengo yanga, ala yeke nga azo ti ngangu li.”

will be added

X\