AYE SO NZAPA AFA 9

1Oku ange ni ahuru tatalita ti lo. Mbi baa mbeni tongoro so alondo na nduzu ati na sese; a mu na lo kerere ti yanga ti kota du so alinda mingi. 2Lo zi yanga ti kota du ni, mbeni guru alondo na ya ni si ayeke sigigi; guru ni akpa guru ti mbeni kota wâ, asara si le ti nduzu na le ti lâ avuko.. 3Agbadola alondo na ya ti guru ni si ayeke sigigi, ala mu ndö ti sese kue; a mu na agbadola ni gi mara ti ngangu so akparakongo ti sese ayeke na ni. 4A mu yanga na ala ti sara sioni pepe na apere, wala akugbe, wala akeke, me ti sara sioni gi na azo so ayeke na nzoroko ti Nzapa na ndö ti le ti ala pepe. 5A mu lege na agbadola ni ti fâ azo ni pepe, me ti sara pasi na ala na ya ti nze oku. Tongana ala kpo zo, mo baa mo tene, kparakongo laa akpo zo ni. 6Na ndembe ni so, fade azo ayeke gi ti kui, me ala yeke kui pepe; nzara ti kuâ ayeke sara ala, me kuâ ayeke kpe ala ti hon yongoro. 7Agbadola ni akpa ambarata so azo aleke ala ndali ti bira. Mbeni ye ayeke na li ti ala tongana akpoto ti gbia so a sara ni na lôro; le ti ala akpa le ti zo. 8Kua ti li ti ala akpa kua ti li ti wali, pembe ti ala akpa pembe ti bamara. 9Ala yu na kate ti ala mbeni ye so akpa kazaka ti wen, toto ti kpangi ti ala akpa toto ti apusu ti bira so ambarata mingi laa ayeke gboto ni. 10Damba ti ala akpa damba ti akparakongo so yanga ni ti kpongo na zo ayeke daa; ngangu ti ala ayeke na ya ti damba ti ala ni. Na ngangu so laa ala yeke sara pasi na azo na ya ti nze oku. 11Gbia ti agbadola ni ayeke ange ti ya ti kota du so alinda mingi. Iri ti lo na yanga ti hebro ayeke “Abadon”; iri ti lo na yanga ti greke ayeke “Apolion”, nda ti iri so atene “zo ti bubango ye”. 12Kozo ye ti mawa ni ahon awe; me ambeni use angba si ayeke ga na peko. 13Omene ange ni ahuru tatalita ti lo. Mbi ma mbeni go so alondo na mbage ti andangoro osio ti gbalaka so asara na lôro si ayeke na dawa ti Nzapa so. 14Go ni atene na omene ange so ayeke gbu tatalita na maboko ti lo so, atene: “Zi a-ange osio so a kanga ala na tere ti kota bale ti Efrate so.” 15A zi a-ange so; ala leke tere ti ala awe ti ku na ngu, na nze, na lango, na ngbonga ti fango azo ti dunia; na popo ti azo ota, ala yeke fa zo oko. 16A fa na mbi wungo ti aturugu so ayeke kpe na ambarata: ala yeke kutu ngbangbo use. 17Ambarata na azo so aduti na ndö ti ala si mbi baa ala na ya ti mbeni ye tongana bango-li, lege ni ayeke tongaso: kazaka ti wen so ayeke na kate ti ala, nzoroko ni abe tongana wâ, avuko tongana le ti nduzu si ayeke nga tongana sufre; li ti ambarata ni akpa li ti abamara. Wâ, na guru ti wâ na sufre ayeke sigigi na yanga ti ala. 18Aye ti sioni ota so: wâ, guru ti wâ na sufre ayeke sigigi na yanga ti ambarata ni ayeke fâ azo na ndo kue; na popo ti azo ota, a fâ zo oko. 19Andaa ngangu ti ambarata ni ayeke na yanga ti ala nga na damba ti ala. Damba ti ala ni akpa ngbo, li ni ayeke daa; na ni laa ala yeke na ngangu ti sara sioni na azo. 20Tanga ti azo so kue akui na lege ti asioni ye so pepe, ala zia pepe lege ti sarango asioni ye ti ala. Ala zia lege ti vorongo asioni yingo pepe; ala ngba ti voro ayanda so a sara na lôro, na wen ti nginza, na bengba wen, na têne nga na keke. Ayanda ni ayeke baa ndo pepe, ala yeke ma ndo pepe, ala yeke tambula nga pepe. 21Azo ni azia nga lege ti fango zo, guengo na gbe ti yoro, sarango aye ti ndumba wala nzi pepe.

will be added

X\