AYE SO NZAPA AFA 5

1Mbi baa mbeni mbeti so a rule ni rulengo; mbeti ni ayeke na maboko ti koli so aduti na ndö ti mbata ti gbia so. A su mbeti na ya ni nga na peko ni kue, a zia anzoroko mbarambara na ndö ni ti kanga na ni. 2Mbi baa mbeni ngangu ange so ayeke dekongo ngangu, atene: “Zo wa laa alingbi ti zi anzoroko ni, ti zi ya ti mbeti ni?” 3Me na yayu, wala na ndö ti sese, wala na gbe ti sese, zo oko ayeke daa pepe so alingbi ti zi ya ti mbeti ni ti baa ya ni. 4Mbi toto mingi, ngbanga ti so mbeni zo oko ayeke daa pepe so alingbi ti zi ya ti mbeti ni ti baa ya ni. 5Me mbeni kangba ni oko atene na mbi: “Toto pepe! Baa, bamara ti mara ti Juda so ayeke hale ti David, lo so benda awe; lo lingbi ti zi anzoroko mbarambara ni nga ti zi ya ti mbeti ni.” 6Na pekoni, mbi baa mbeni Molenge ti Taba, lo yeke luti na tere ti mbata ti gbia so ayeke na popo ti aye osio so ayeke na fini na akangba. Molenge ti Taba ni akpa taba so azo afâ lo awe. Adidi ti lo ayeke mbarambara. Ale ti lo ti bango na ndo ayeke mbarambara; ale ni ayeke ayingo mbarambara so Nzapa atokua ala na ndö ti sese mobimba. 7Molenge ti Taba ni ague, lo mu mbeti ni na maboko ti lo so aduti na ndö ti mbata ti gbia; mbeti ni ayeke na maboko ti lo ti koli. 8So lo mu ni awe, aye osio so ayeke na fini na akangba baleuse na osio kue akuku na gbe ti lo. Ala kue ayeke na akundi nga na akopo ti lôro so yombo asi singo na ya ni; yombo ni ayeke sambela ti azo ti Nzapa. 9Ala yeke he fini bia, atene: “Mo lingbi ti mu mbeti ni ti zi anzoroko ni, ngbanga ti so a fâ mo ando awe. Mo futa ngere ti vongo azo na mene ti mo titene mo vo azo ti akete mara kue na Nzapa, azo ti ayanga ti kodro kue, azo ti akodro kue na azo ti amara kue. 10Mo sara si ala ga azo ti Kodro-gbia ti Nzapa, awayango-sandaga ti sara kua na Nzapa ti e; fade ala yeke le-gbia na ndö ti sese.” 11Mbi kiri mbi baa ndo, mbi ma go ti a-ange kutu kutu, gbani gbani, saki saki, gbani gbani. Ala ngoro tere ti mbata ti gbia na aye osio so ayeke na fini na akangba ni kue. 12Ala yeke dekongo, atene: “Taba so azo afâ lo, lo lingbi titene azo asepela lo ndali ti ngangu, na mosoro, na ndara, na komandema ti lo; lo lingbi titene azo ane lo, agonda lo si avoro lo!” 13Mbi ma go ti aye so kue Nzapa asara: aye ti yayu, aye ti sese, aye ti gbe ti sese na aye ti ya ti kota ngu-ingo, atene: “Lo so lo duti na ndö ti mbata ti gbia, lo na Molenge ti Taba, ayeke nzoni azo asepela lo si ane lo, gonda na komandema ayeke ti lo, kpu na kpu!” 14Aye osio so ayeke na fini atene: “Amen!” Akangba ni akuku si ala voro Nzapa na Molenge ti Taba ni.

will be added

X\